الأربعاء، 22 تشرين2/نوفمبر 2017

board

خرخرة ورجوع لي ورا

>  أجمل حاجة في الدنيا دي الشفع
>  حياتهم تمضي ببراءة وبدون خبث ولا إستراتيجيات
>  يحبون لأنهم أحبوا من أحبوا

>  وينفرون عندما لاتستريح وجوههم للخلقة القدامهم
>  ومن الأشياء الجميلة لعب الشفع
>  في لعبات كده بقطعوها من ريسينهم ويستمتعون بها
>  والقصة دي في العالم كلو ماعندنا برانا
>  فشليل وينو ممكن جداً تلقاها في يوغسلافيا الكانت موحدة بمسمى يوغسلافي بالطبع
>  مثلاً ممكن اسمها يكون باليوغسلافي
>  شليلوفيتش وينسكي
>  وممكن تلقاها في جيكيا بمسمى شليل هافي وينسلوفا
>  وممكن تلقاها بالبحريني تحت مسمى
>  وين راح ها المسخ !
>  المهم
>  تتعدد الأسماء وتتباين بحسب الدولة وتبقى ألعاب الأطفال سمراً بريئاً يستمتعون به بكل براءة
>  وبرغم كل ذلك في شفع خرخارين خرخارين لدرجة مزعجه
>  وفي،الحتة دي بشاركوا إخوتنا الأهلة في الخرخرة المودياهم وموديانا لي ورا
>  وفي النوع البشيل كورتو و يمشي
>  زي ده الله يكفيكم شرو
>  النوع ده بشبه لي معتصم جعفر
>  شال كورتو ومشى خلى الميدان خلا
>  الرفيق الفسل طار قبل معتصم يشيل كورتو
>  لكن نحنا ذنبنا شنو
>  المهم
>  تعامل معتصم مع الورطة الانحنا فيها دي ذكرني لعبة الشفع بتاعة دس دس
>  الغماد مغمد وما جايب خبر
>  الشفع دخلوا تحت المراتب المختوتة فوق بعضها تحوطاً للمناسبات في مخزن البيت الصغير
>  الغماد فتش أي حتة مالقى الشفع
>  دخل المخزن ومرق مالقاهم
>  مشى يفتش في اتجاه تاني
>  موش في شافع شليق كده بطلع ويرقص بكوميديا لافتاً نظر الغماد عشان يسكهم ?
>  آها دي العملها معتصم مع الفيفا
>  لفت نظرها كغماد وورتنا ليك السك سك المابنعرفوا
>  وفي لعبة اسمها كمبلت
>  في نوع من الشفع كده غشيم وكيشة وحركتو تقيلة واللعبة دي ما بشبهو
>  مع بداية اللعبة ومع أول جدعة يلبعوهوا ليك بالكورة ويتفنقل
>  ويخرخر ويقول ليك مامارق
>  وينكر كياشتو وعدم علاقتو باللعبة
>  أساساً هو بكون غير راغب فيها
>  لكن تحريض الكبار ليهو بعبارات أمشي ألعب معاهم
>  هم أحسن منك في شنو
>  دي كلها البتدفعو للمشاركة في قيم كمبلت ياخد لبعتو في الدقيقة الأولى ويقول ما مارق
>  ده موقف بشبة لي موقف سرالختم من الأزمة الأخيرة
>  المهم
>  الناس بتمشي لي قدام ونحنا راجعين لي ورا
>  حقو نخلي عرس المسخرة
>  أم العروس دايرة فلوس بتبني كبري في نهر عطبرة
>  ونحنا بايتين القوى
>  أيها الناس
>  واهم من يقول المريخ والهلال الاتنين طارو
>  ويبرر ذلك بأن الفريقين خارج المنافسة
>  ويقول ماتو
>  لأنو الموت ذاتو خشوم بيوت
>  فيهو فطيس وفيهو شهيد
>  نحنا غايتو يا محمد عبد الماجد استشهدنا على حقول الألغام لأنهم استخدمونا كاسحات ألغام وما كتير على وطن لم نستطع أن نقدم له شيئاً إلا أضعف الإيمان
>  القلب ذاتو احتاج قسطرة
>  ده موقفنا وقصة موتنا
>  شوف يا خالدونا الرقد نام تاني ما قام
>  حتى الموت خشم بيوت
>  المهم
>  نعود للعب الشفع
>  معتصم نوع الشفع الكان اتغلب بكلم
>  بقول مشينا البحر
>  زي ده تسوقو بكلم
>  تخليهو بكلم ويجيب الفيفا في البحر
>  اما سر الختم
>  فمن النوع البباري الشفع وماعندو موهبة تمكنو من الإبداع في أية لعبة يشارك فيها
>  ماعارف قانون اللعبة
> يتغلب يخرخر وما يمرق
>  ايها الناس
>  أرى أن من أسباب الأزمة الحقيقية الخبث في استغلال البعض لجهل البعض الآخر ببواطن الأمور
>  يبقى ضعنا ما بين خبث وجهل
>  والجميع يصر على أنه ليس السبب
>  بل الآخر هو السبب
>  ودي ذاتها في لعبة الشفع سموها من سرق الروب
>  أيها الناس
>  مجلسنا ما غير الصامت لي هزاز إن شاء الله.
>  ولا ناسنوا في الصامت من دخلوا الجامع ?
>  أيها الناس
>  إن تنصروا الله ينصركم
>  آها
>  نجي لي شمارات والي الخرتوم
>  كان شفت يا والينا
>  شليل طارت لينا
>  وعازة ياعازة مالك بتبكي عايزة أيه !
>  كمبلت فينا
سلك كهربا
ننساك كيف والكلب آنا سرقو ؟ انا ما سرقو…. هذا سرقو… ورينا مؤشر وين يابوبي
والي لقاء
سلك

الأعمدة