الخميس، 17 آب/أغسطس 2017

board

سمعتو ولا جابو ليك

>  ننتظر قرار الكاف اليوم
>  المريخ والنجم وفيروفيارو وأسود شيكان وزيسكو والفريق الانجولي
>  لو تلاحظوا ديل ستة فرق من مجموعتين

>  المجموعتين فيهن تمنية فرق تنتظر قرار الكاف
>  أساساً كل مجموعة فيها أربعة فرق
>  يعني المجموعتين فيهن تمنية فرق
>  الزنطور وسموحة لا يعنيهم القرار في شيء
>  ديل ايد البدري قامت بدري وجدعتهم خارج المنافسة بدري
>  طاروا قبل التجميد
>  معتصم رئيس طايرين
>  سيف الكاملين رئيس طايرين
>  مافي رئيس طايرين
>  زنطور مجموعتنا وزنطور مجموعة اسد شيكان عرفو قدر نفسهما بدري
>  اتخارجو من عصراً بدري
>  ومن عصراً شديد
>  وبالرغم من كل ذلك نجد الصحف (الزرقاء) شغالة بقرار الكاف شديييد
>  بخصكم في شنو يا روشا ???
>  بتكسبوا من وراهو شنو يا رمضان ???
>  ده شعراً ما عندكم ليهو رقبة يا فطومة يا اختي
>  او قل دي رقبة ما عندكم ليها كسكتة يا انت
>  ويمكننا القول دي رقبة ما عندكم ليها شعر يا فطومة يا اختي
>  يبقى شهراً ما عندكم فيهو نفقه ما تعدوا أيامو يا خالد عزالدين
> الطاروا ما يخصهم يخش المريخ ويطير معاهم فيارو
>  ولا بخصهم لو طار المريخ (لا قدر الله ) ودخل فيارو
>  لان الطيران موت
>  ولكن يختلف الفطيس من الشهيد اكيد
>  وحقو الناس بدل تضيع زمنها في انتظار قرار مابخصها
>  حقو يهتموا بي روحهم
>  عندهم نواة طيبة لفريق ملاكمة جيد بي كبتنو الاسمو شيبوب
>  خلوا الكورة لي ناسها وشوفوا ملاكمتكم وين
>  وبالمناسبة
>  تكررت بإحدى الإذاعات مقولة احمد وحاج احمد
>  الزول ده يقصد بهما المريخ والهلال
>  وقال احمد وحاج احمد زي بعض
>  ما عندهم انجازات اطلاقاً زي الفرق الاخري
>  وضرب مثل بالاهلي و الزمالك
>  يا هذا
>  شنو الجاب احمد الذي سجل اسمه باحرف من نور علي صفحات التاريخ وعلى لوح الشرف الافريقي وعلى سجل الاندية الحاصلة على بطولات الكاف
>  شنو الجابو لحاج احمد الذي جلس وهو على صفره تمنية وتمنين سنة دون أن يسجل اسمه حتى على سجلات التأمين الصحي ??
>  شن جاب احمد الأنيق صاحب السجل الإقليمي بثلاث سيكافات لحاج احمد صاحب التسعة اخفاقات سيكافات ??
>  يا هذا
>  شنو الجاب احمد بطل دبي والشارقة وجوبا والذي أصبحت انجازاته صديقة لخطوط الطيران العالمية لحاج احمد الذي يحلم لليوم بالسفر بالقطر ويا حليل القطر
>  يا هذا
>  قدموا نقدكم لتيمكم الضعيف المتهالك التسعة وتمنين سنة دون الزج بمريخ البطولات الجوية مع حاج هكر الفي الصفر محكر ده
>  يا هذا
>  إن كان المنبر الذي تطل منه يدعي الحياد
>  نرجو ألا تحرج ذلك المنبر بهرطقات تبين نواياكم (الزرغاء)
>  والمابتلحقو جدعو
>  ايها الناس
>  قدامنا بطولة عربية
>  هي الهدف
>  لا تنسوا
>  المهم
>  اتنين لذيذين بتونسوا
>  الاول قال للتاني سمعت بالكلاب المتوحشة ?
>  التاني قال ليهو سمعت
>  الاول: سمعت بالمكوه ام ديك ?
>  التاني : سمعت
>  الاول : سمعت بابو القنفت السعرو مليون ?
>  التاني : سمعت
>  الاول : سمعت بالنيقا?
>  التاني : سمعت
>  الاول : سمعت بالجقر الاكل الكبري ?
>  التاني : سمعت
>  الاول : سمعت بالكديسة الركبت القطر?
>  التاني : سمعت
>  الاول : سمعت بالخطف ???
>  التاني : سمعت
>  الاول : سمعت بتجارة الاعضاء ?
>  التاني : سمعت
>  الاول : سمعت بيهو حصل اتنين وعشرين الف ?
>  التاني : معقولة! لا… ما سمعت
> الاول : تسمع كيف وانت بتسمع في الفارغة
>  ايها الناس
>  إن تنصروا الله ينصركم
>  اها
>  نجي لي شمارات والي الخرتوم
>  كان شفت يا والينا
>  قالوا جابت ليها مغربيات ينضفن لينا
>  شركات يا والينا
>  وقالوا تاني عربية النفايات تمنية مساء شوكة بتجينا
>  تاني الشافنا من المغربية راجين النفايات المغربية ما كضب فينا
>  الخوف نرفع الكيس ونركب معاهو يا والينا
سلك كهربا

ننساك كيف والكلب قال سمع أضاني النسوان قالن دي حالة أخير منها عربيتنا المابتجينا… مغربية وجايي داقشي المغربية !!!!
والي لقاء
سلك