الأربعاء، 18 تشرين1/أكتوير 2017

board

حمودي ركب الموتر

>  قصة واقعية
>  قصة حمودي
>  أرجو إنو الناس تصدقها

>  والمامصدقها
>  حمودي قاااااعد
>  و الأستاذ عمر القمر المحامي خال حمودي قاعد
>  أها
>  كان في عرس في صالة
>  كل الأهل اتلموا وهيصوا وفرحوا
>  عشاء زي العشاء
>  في صحانة كده الجداده بتجيك كااااملة
>  وفي ناس بجيهم صدرين
>  إنت وحظك
>  طبعاً في ناس كده حظهم نحس
>  أي مناسبة يمشوها
>  في صالة
>  في نادي
>  في صيوان
>  في بيت العرس
>  ما بقع ليهم إلا جناح
>  التقول باكات
>  أي صحن يرفعوهوا يلقوا فيهو جناح
>  المهم
>  في عرس أهل القمر الناس مبسوطة وهايصة
>  الناس اللايصة بره الصالة بسيطين
>  النوع البخت الكراسي في الضلمة داك
>  طبعاً ما بقعدوا في الاتجاه الفيهو حمامات الصالة
>  لأنو داك موقع مزعج
>  تلقي النسوان ديل أربعة مارقات وأربعة داخلات
>  وكلو واحدة ماسكة ليها شافع من إيدو داخله بيهو
>  الشفع ديل التقول عندهم سكري
>  الغريبة في تلاتة
>  كلو واحدة جات براها
>  وسايقات نفس الطفل
>  طفل ولا إبريق؟ !
>  طفل بمشي الحمام تلاتة مرات في عشرة دقائق !
>  عملنها ظااااهرة
 >  المهم
>  ناس هايصة وناس لايصة والشفع يلعبوا بمزاج
>  فجأة جات طفلة
>  أخت حمودي
>  جات لي أمها
>  وقالت ليها
>  ماما… ماما
>  الأم تظاهرت بالزهج برغم إنها في حقيقة الأمر كانت قاشرة بقولة ماما
>  حاجة تثبت إنها نظام ما بايرة وكده
>  وإنتاجها ظاااهر ومنجزة
>  تاني البت قالت ليها ماما
>  الأم : مالك يابت… الممو
>  البت قالت : شفتي حمودي ركب مع زول موتر
>  الزول قال ليهو تعال أوصلك
>  الدنيا الحلوة خربت
>  الحفلة وقفت
>  الثكلي ضرب
>  الفنان قعد في واطات الله دي
>  الجماعة الحالقين بي هنا وبي هنا ديك انخضوا
>  فيهم واحدين تحت تحت ثكلوا
>  الرجال أبان عمم (ماسكاهم الرطوبة )
>  تلقي الواحد جاري في مكانو
>  والجميع خرج من الصالة في رحلة بحث غير مجدية عن حمودي الركب الموتر مع عمو القال ليهو تعال أوصلك
>  واحد عامل قندف قال
>  الحتة دي كلها ناس
>  وناس الشرطة أهو ديل قاعدين
>  يعني حمودي ده لو قال لي أي زول
>  عمو… عمو… أنا مخطوف
>  موش كان أنقذو؟
>  ولا حمودي ده مابي الإنقاذ
>  شايف الخطف أخير ليهو من الإنقاذ والعودة للبيت الممل !
>  نط واحد تاني قال ليهو
>  هو الخطفوهم ديل كلهم المامابي الإنقاذ فيهم منو ؟؟
>  عمك سيس الموقف وتاجر بالقضية لاغراض حزبية طوالي
>  والقصة كل الفيها شافع من صالة عرس تم اختطافو بي موتر واختو جات كلمت أمها
>  الدخل ترامب والملك سلمان هنا شنو ؟؟
>  المهم
>  كلما مر الوقت
>  مرار داخل الحلاقيم يتركز
>  و دموع
>  وبدأت تظهر إغماءات
>  اتنين من الحالقين كده في تضامنهم مع الحدث قاعدين في الشارع مع الناس وبلعبو في ليدو
>  مجرد وجودهم يعتبر مشاركة في رحلة البحث ومشاركة في الحزن
>  أما أم حمودي فلا زالت عبارة حمودي ركب الموتر تقطع أحشائها وترن في أذنها حتي وقع الحلق بتاع الدهب منها دون أن تشعر
>  دهب صيني وغيرو بجي
 >  وتأزم الموقف
>  فإذا بحمودي يظهر من خلف سلم الصالة الخارجي وهو يضحك بأعلي صوت
>  تمثيلية قام بها الطفل حمودي وبعض أقرانه لعب بها على عقول ناس كبااااااار
>  حمودي ألف القصة وكتب السيناريو ووزع الأدوار
>  أعطى أخته مهمة تبليغ الوالدة
>  لعب حمودي بعقول الكبار بتمثيلية نال عليها علقة ساخنة وكم جضيمة في الحقيقة كانت تستحق تلك الجضيمات خدود الناس الكبار اللعب بيهم حمودي
 >  المهم
>  الجماعة قالوا يرجعوا لي حفلتهم
>  لقوا الفنان شتت قبيييل
>  حمودي قال ليهم
>  الفنان ركب الموتر
>  وأضحت عبارة حمودي ركب الموتر لزمة وقفشة متداولة بين الناس
 >  أسي هلال الابيض لاعب إفريقياً
>  والمريخ لاعب عربياً
>  و الهلال
>  حمودي ركب الموتر
>  ركب الموتر بدري
>  وما قدر يقول ياعمو ياعمو أنا مخطوف
>  ميدو كان سايق الموتر شدييييد
 >  فطومة
>  قلتي لي حموديكم ركب الموتر بدري وبقي يلعب مع الجريف وكوبر والزومة تزوغ منو ويلعب الليدو ؟
>  ده كلو من ميدو
 >  المهم
>  اليوم نبدأ مشوار بطولة بإذن الله
>  نحنا كبار وما عندنا كبير غيرنا
>  هلال الحرمين ياخد الكوتة قونين زي هلال الصفرين
>  ولو وقف جميع هلالات العالم في خط دفاع الهلال السعودي
>  لن يوقفوا العقرب وميدو والسماني
>  نسأل الله التوفيق
>  وبعد الكورة نسمع بحمودي الهلال السعودي ركب الموتر وهو يصيح
>  ياعمو.. ياعمو أنا مخطوف
 >  فطومة طبعاً في سرها بتقول ميدو ده إن شاء الله يركب الموتر زي حمودي
>  كدي نزلوا حمودي من الموتر بعيدين شوفوا طريقة ركبوا ميدو
>  أيها الناس
>  ربنا ينصرنا عربياً كيتاً على الذين تآمروا علينا إفريقياً
>  الليلة لو غلبنا كتير
>  بجمدوها تاني
>  الله يجمد جثثكم ما تلقى البدفنها
 >  غايتو جمال الوالي طلع خاطف كبير وتاجر أعضاء
>  خطف العقرب وميدو والسماني
>  وباع ليكم أعضاء جابسون وبقايا اوكرا وابراهومة الحرق فشافيشكم
>  فضل يا والي زول واحد
>  يركب الموتر
>  وحمودي تاني ما ينزل من الموتر
>  فطومة
>  ما شفتي
>  حمودي ركب الموتر
>  أيها الناس
>  إن تنصروا الله ينصركم
>  أها
>  نجي لي شمارات والي الخرتوم
>  كان شفت يا والينا
>  كايسين للخطف مالقينا
>  أظن عشان ريسيننا القوية دي مافي زول بشترينا
>  تقيف حافلة مظللة جمبنا يا والينا
>  نقول خلاس ده الخلاص قرر يجينا
>  مافي زول ينزل منها يخطفنا او يعضينا
>  نقول يمكن الخاطف متحسس و خجلان مننا يا والينا
>  نمشي عليهونقول نركب برانا يقول ما ماشين يا أخينا
>  قلنا يخطفونا وثقتنا فيكم كبيرة تاني تجوا تنقذونا يا والينا
سلك كهربا
ننساك كيف و الكلب قال تااااني  ينقذوكم !!! ؟؟ جربوا الخطف سنتين تلاتة يمكن تغيروا رايكم
والي لقاء
سلك

الأعمدة

د. حسن التجاني

الثلاثاء، 17 تشرين1/أكتوير 2017

خالد كسلا

الثلاثاء، 17 تشرين1/أكتوير 2017

بابكر سلك

الثلاثاء، 17 تشرين1/أكتوير 2017

إسحق فضل الله

الثلاثاء، 17 تشرين1/أكتوير 2017

الصادق الرزيقي

الثلاثاء، 17 تشرين1/أكتوير 2017

خالد كسلا

الإثنين، 16 تشرين1/أكتوير 2017

إسحق فضل الله

الإثنين، 16 تشرين1/أكتوير 2017