الثلاثاء، 17 تشرين1/أكتوير 2017

board

البذورة طقطقوا الكورة

> درس بليغ لقنته العلمية والمنهجية السعودية للعشوائية السودانية المتحدة
> مشاركة الهلال السعودي بفريقه الرديف في البطولة فيه رسائل يجب ان يقرأها بتمعن المرسل اليه وهو نحنا ومن شابهنا والناس،العلي شاكلتنا

> الرسالة الاولي تقول ان التخطيط السليم البعيد عن العنتريات والخطب الرنانة والنفخه الكضابة وجدنا تهراقا واسسنا الاتحاد الافريقي
> هو بوابة النجاح التي تلج من خلالها كل النجاحات
 > الرسالة التانية للاتحادات الوطنية وتقول الرسالة
> الاهتمام بالنشئ لايكون بتكوين فرق الاشبال والرديف
> بل يكون بالاهتمام بها و دعمها ماديا و علميا وتفعيلها عملينا
> فهل تتطور كرة اشبالها ورديفها بدون دوري معروف ??
> يا اخوانا
شفع الهلال السعودي بلعبوا كورة علمية من كانوا في صلب آبائهم
ومشاركة الهلال السعودي بالرديف في البطولة فيها درس للخرمجة العندنا ودليل علي فائدة تفعيل دوريات المراحل السنية والاهتمام بهم وثقة في ثمار المراحل السنية التي بنوها بالعلمية والمنهجية
تقول لي سيف الكاملين وحميدتي
> ايها الناس
> دولتنا بت ام رويحتنا دي عندها ميزانية مخصصة و واضحه للرياضة لتنفيذ استراتيجية (دي كتيرة ) معينة تهدف للوصول بالمستوي لمصاف العالمية
> ولا شغالين لسة بي اننا ومن هذا المنطلق ولكننا
> ونشرب البحر جووووت
> وبعد داك يقف حمار مستوانا الهزيل علي عقبة البامبرز بعد شربنا البحر جوووووت
 > الناس شغالة بعلمية ومنهجية مدروسة
> ونحنا لسه مابين عراك معتصم ومجموعة المدهش
> الناس عندها علم الوطن علي صدر المنتخب اهم شي
> ونحنا منتخبنا يغيب عنه اللاعبون باوامر اداراتهم علنا وتحديا
> ونجد لهم العذر
> ونحل مشاكلنا بالجوديات
> ونكسر رقبة القانون كشششش
> لاجل وأد المخالفات
> واذا سئلت باي ذنب قتلت دسا ولم تقتل بحثا لتحل بعلمية وفقا للقانون واحترام الآخر قبل الذات
> لا نجد مبررا نقوله لمشاكلنا التي وأدناها سترة للعيب دون حلها
 > ايها الناس
> رسائل كثيرة و دروس وعبر
> للناس العبر
> لو انها تعبر
> وتظل كرتنا عبرة
> فكورتنا لازم تشبه عيشتنا البتشبه وجبتنا البتشبه نضافة عاصمتنا البتشبه مويتنا البتشبه عملتنا وسط العملات
 > ايها الناس
> نرجع لي كورتنا ضد طيور الجنة السعودية
> الشفع ديل استلام وتمرير مية المية
> لانهم علميا اخدوا درس الاستلام والتمرير في سن السادسة
> و رمضان عجب في الشوط التاني ثبت كورة مع اللاين براهو
> ساكيها لي دايرة السنتر
> كورة ولا ارنب اصلو
> مع العلم لو وجد رمضان ما وجده شفع السعودية في نفس السن
> كان غلب منتخب قريش ولو مدربو ابولهب زاتو
> ولكنه الفرق بين العقول التي تدير الكرة عندهم
> والفواخير التي تتحكم في كرتنا
> ويدفع الثمن لاعبنا الذي عاني الاهمال في سن الاكتساب
> ويصبح سخرية للناس
> عليكم الله
> شفتوا رمية التماس اللعبها نمر ?
> لاقاكم زول بجدع الكورة بي ايدو في راسو بي ورا ?
> الكورة زاتها احتارت
> قامت جات بي قدامو
> سكاها
> الحكم ماقال شئ
> لانو دي ما ادوها ليهو
> وفي قانون حمورابي مافي خليهو في قانون التحكيم
> الحكم قال اخليها ويحلها الحلال
> اللقطة دي الحمدلله ماشافتها الفيفا
> لانو لو شافتها ما كان جمدتنا
> كان جضمتنا
> وشطبتنا
> واتغابت العرفة فينا
> ايها الناس
> المشكلة ليست في اللعب ضد شباب الهلال السعودي
> في الآخر كورة
> المشكلة في لعب الليدو
> الناس البتلعب ليدو حقو يهتموا بالليدو ويخلو ناس ميدو
> وقون العقرب دخل في هلالين
> لانو شوف عيني مكسيم ناطي مع حارس شباب السعودي
> ويمكن يكون مكسيم ضاراهو
> لو خلاهو كان قبضها
> مكسيم دايما
> متعووووويده
 > ولسه نفخر باننا احسن ناس
> والزينا منو
> ونستمتع بصور الخرطوم سنة ستين مقارنة بالرياض وابو ظبي في ذلك الوقت
> ناس من الامس
> حتي افراحنا ذكريات
> والدنيا بتقول لينا نحنا ولاد النهار ده
> وجاي تفتش الماضي !
> خلاص الماضي ولي زمان
> جاي تفتش الماضي ?
> خلاص جيب برعي ومنزول و الزعيم الازهري زاتو
> ايها الناس
> والله مانبطل حركاتنا دي
> يجي يوم يحكي فيهو الناس لاطفالهم
> كان يا ما كان
> في قديم الزمان
> بلد اسمو السودان
> وناس اسمهم السودانيين يامان
> جنهم كلمة زمان و زمان
> ولما فعلنا ولما تركنا
> واخيرا قرضهم الباعوض والضبان
> ايها الناس
> اما آن اوان ترك الفخر في غير موضعه والعمل بجدية لاجل وطن يسأل الله الناس عنه دنيا واخري ????
> اما آن لنا ان نتطور ?
> اما آن لجنيهنا ان يثبت ويبطل سردبة مخجله ?
> اما آن لكراسي الوطنالمناسبة ان يجلس عليها الرجال المناسبون???
> اما آن ان نعيد انشودة في الجزيرة نزرع قطنا نزرع نتيرب نحقق امالنا ?
> اما آن ان يدور قطرنا ???
 > وللغالي اكرم زكي انشودة لقطرنا بتقول في مطلعها
> صفر قطار واتحركن عجلاتو
> نفض الغبار وقودو نابع من ذاتو
> اعطال كتييرة في السكة كترن وقفاتو
> وقفات طويييله في فجة محطاتو
> وقفات كتيييرة وصلوا المن بعدنا فاتو
> ولما زهجنا وصبرنا صقر
> زي ديل يسوقوا فينا الله يستر
> (زي ديل يقصد بهم صديقي اكرم ناس الاتحاد )
> ماتفهموا غلط
> غايتو جنس غايتو
> المهم
> حمودي السعودي قرب يركبنا الموتر
> وقالوا فيهم واحد قريب آخر الكورة مرق
> قال ماما قالت لي نوم بدري
> ماما يا ولدي لو شافت نمر
> لو شافت نمر جدع الكورة كيف كان نكرتك
> ايها الناس
> ان تنصروا الله ينصركم
> اها
> نجي لي شمارات والي الخرتوم
> انت يا والينا
> قطرنا متين برجع لينا ??
سلك كهربا
ننساك كيف و الكلب قال لو قلت ليك راجي القطر بتصدق !!!
والي لقاء
سلك

الأعمدة