الإثنين، 18 كانون1/ديسمبر 2017

board

كفرنا وجنيهنا

>  كفرنا
>  بفتح الكاف
>  مافي زول يضم الكاف يدخلنا في حيص بيص

>  كفرنا بفتح الكاف
>  وجنيهنا بكسر الجيم وقد الجيب
>  بتشابهو
 >  الاتنين في الداون لما التاون بقت في الداون
>  لكن الأسباب بالنسبة لكفرنا معروفة
>  سوء تخطيط
>  تخبط
>  عدم قناعة دولة
>  عدم دراية من القادة الذين لاعلاقة لهم بي كفرنا
>  عدم الوجيع
>  عدم الرغبة في التطور
>  عدم ترك نغمة كنا وكنا وللاتحاد الإفريقي أسسنا
>  كل من هب ودب في البلد دي لقى ليهو قرشين
>  مامهم جابن من وين
>  بكمل الصورة بمجلس إدارة نادي قمة ودخول البرلمان
>  دي الفكرة
>  جيبو بكون مليان
>  حتى في الغسيل بتتنسي باقي قروش في الجيوب
>  بخت البكوي
>  جيبو بكون مليان
>  لكن غالباً الفاخورة فاوة يا مان
>  زي ده يقرر في مصير امة ويدير نادي قمة
>  لأن الدراهم للأسف في بلدي تكسب الرجال هيبة ومهابة
>  فهي اللسان إن أراد كلاماً
>  هي السيوف إن أراد قتالاً
>  وما أكثر المرتزقة اليومين دي
 >  ده جزء من أسباب تدهور كفرنا
>  أما أسباب انهيار جنيهنا فما عارفها
>  ويتخيل لي مافي أسباب
>  انهيار بدون أسباب
>  قدر سااااي
>  طالما البلد تدار اقتصادياً بهذا الوعي الكبير
>  وبهذه العفة التي تتمتع بها القيادات
>  وبهذه الحرب الضروس المعني بها الفساد
>  وبهذا الشعار
>  لا لدنيا قد عملنا
>  يبقى انحطاط الجنيه نتيجة الانهيار قدر ساي
>  قدر أراد لنا الشقاء
>  قدر ده
>  المهم
>  مشاركة السودان في البطولة العربية كانت بحقارة من العرب واضحة
>  ثم تواصلت الحقارة في مرحلة المجموعات ضغطاً على المريخ
>  ودفع العرب الى ذلك إننا نجري خلف الدعم وحوافز المشاركات حتى ولو كان ذلك على حساب كرامتنا لنصبح ضحية
>  ضحية وكرامة
>  شنو البلعب السودان ضد جيبوتي وموريتانيا قبل المجموعات ويعفي أندية السعودية ومصر وغيرها من تلك المراحل؟
>  الكاش ولا شئ غيرو؟
>  شنو البلعب المريخ ضد الترجي بتحكيم مصري صرف والمباراة تهم أهلي مصر كثيراً ليصعد كأفضل الثواني
>  ولا يتحقق له ذلك إلا اذا خسر المريخ من الترجي؟
>  موش مفروض كان نرفض اللعب بالتحكيم المصري المترصد والساعي لمصلحة اهلي مصر؟
>  يا يتغير التحكيم يانرفض اللعب
>  ولكن اذا رفضنا اللعب قد يسقط حافز المشاركة
>  وبذا نفقد الهدف الكبير و الوحيد من مشاركتنا
>  إذن.. فالينهزم المريخ هزيمة مقبوضة التمن
>  وليرضي العرب عنا
>  فافريقيا أرادتنا رأساً لها ولكننا اخترنا ذيل العرب
 >  أيها الناس
>  العقرب أخطأ واستحق الطرد
>  تجب محاسبته
>  هدف النعسان صحيح
>  وضربة جزاء مع الغربال مسكوت عنها
>  لأننا سكتنا عن الكثير
 >  أيها الناس
>  البطولة العربية تحتاج لكلام كتير وتفصيلي وبوضوح شديد
>  نسأل الله أن يحلل عقدة من لساننا عند تناول ذلك الموضوع
>  بركة الرجعت الكهرباء للأستاد
>  هي جات ما لقتنا ولا الحاصل شنو؟
>  افتقدناها طوووويلاً
>  ولكن
>  جمال سالم مالوووووو
>  في شنووووو+ وشنوووو+ و أخبار خط هيثرو شنوووو+ وشنوووو
>  أيها الناس
>  بصراحة
>  باسكال وكليتشي وكواسي وتالا ومامادو وكونلي
>  هيا البلد طايقة أهلها؟؟
>  الأجنبي يأتي ليحقق الفارق
>  اذا عجز عن ذلك فإنه يحقق الفارغ
>  واذا حقق الفارغ يبقى كلام الاحتفاظ به كلام فارغ
 >  أيها الناس
>  في ديربي آربجي بالأمس
>  المشعل جندل الشاطئ بثنائية دورية نارية رائعة
>  والبحر اليومين دي زايد
>  عشان كده طين الشاطئ
>  مبروك المشعل وهاردلك للشاطئ
 >  اها
>  ناس روشا
>  الناس البلعبوا الليدو
>  الناس المرمطهم ميدو
> اليومين دي فرحانين
>  طبعاً ما عندهم إنجاز يفرحهم
>  ولكن كل أفراحهم تأتي عندما نخفق
>  اليومين دي خلوا الليدو واحتفلوا
>  وللأسف تاني راجعين يلعبوا ليدو
>  بالمناسبة كلاب الليدو مسكينة خلاص
>  تقعد لما ربك رب الخير يغفر ليها
>  حتى تجي ستة تمرقها من بيتها
>  وبعد تمرق كم خطوة كده
>  تنضرب وتدخل بيتها تاني
>  وحلك لمن تجي ستة تاني
>  مسكينة كلاب الليدو
>  الكلاب الوحيدة المابتعضي
>  كلاب الليدو و كلاب السيجة
>  ولا عندك رأي يا روشا
>  باقي انتوا ناس ليدو وبتعرفوا كلاب الليدو كوييييس
>  قلبي علي وطني وعلي كلاب الليدو
 >  و كلاب الليدو
 >  المهم
>  إسلام عندها ليدو قديييييمة
>  قالت لي يا بابا جيب لي معاك ليها كلاب
>  قلت ليها يا بتي الزهر بجيبو ليك كلو ستات كمان
>  الستة جهات ستة
>  لكن كلاب الليدو دي ما بعرف محلها الا تجيبها ليك فطومة عمتك
 >  قلبي علي وطني
>  وبس
>  ايها الناس
>  إن تنصروا الله ينصركم
>  بطلوا حركات
>  اها
>  نجي لي شمارات والي الخرتوم
>  كان شفت يا والينا
>  واحد قال لينا
>  اننا من هذا المنطلق
>  ووفقاً لإستراتيجيات ودراسات و حاجات
>  او كما قال
>  ولكننا إن شاء الله
>  سوف نجتمع بالذين قاموا
>  والذين قعدوا
>  لأنو القاموا قبل كده قعدوا معانا
>  والقعدوا قبل كده رفضوا يقعدوا
>  ولكن إنا إن شاء الله معهم جميعاً قاعدون
>  وقررنا وفقاً للجهود المبذولة والميزانيات المصدقة لينا
>  أن نهتم بكم ولن نقصر والسلام عليكم ورحمة الله
>  فهمت شيء يا والينا
>  ولا نحنا
سلك كهربا
ننساك كيف و الكلب قال اسي الدخل ترامب والسعودية شنوووو
والي لقاء
سلك