الأربعاء، 13 كانون1/ديسمبر 2017

board

خمسة وعشرين سنة !

> نقابل نفط العراق
> بنظرة فنية المباراة مفيدة ومكسب
> وبالنظرة الحسابية المباراة لا تسمن ولا تستر عظم ولا تصنع عظيم ولا اي حاجة

> ولكن فنياً مفيدة جداً
> المهم
> اذا كان جمال سالم يمارس الطنقعة والدلال علينا
> عليهو يسهل وعلينا يمهل
> اما اذا كان عندو سبب تاني
> زي مثلاً متأخرات حقوق ما استلمها
> فيطبق عليه قانون مصعب
> لأنو مصعب لما اضرب عن اللعب زمن ونسي
> الرأي السائد كان ان مصعب من حقو
> ومسألة ولاء دي انتهت في زمن الاحتراف
> وانما يربط مصعب بالمريخ عقد ينص على التزامات متبادلة
> اذا قصر المريخ في الوفاء بالتزامه يحق لمصعب الاضراب عن اللعب وهو التزامه العقدي
> فهل سنتعامل مع جمال سالم بفرضية انو حردان وما قبض
> بقانون مصعب
> ام تغير القانون بذهاب مصعب
> وذهاب ونسي ?
> بكم مكيال نكيل نحن اهل المريخ بربكم ?
 > المهم
> فرصة لغرزة كي يشرك عناصر جديدة يمتحنها في مباراة اليوم
> بعض العناصر حاتجيب النمرة الكاملة
> لو تاشيو مسيو غارزيتو
> بالعربي يعني التش يا سيد غارزيتو
> لو تاشيو
 > ايها الناس
> لاحظتوا شيء
> الترجي الزمنا بالاصفر وما جانا بالاحمر
> لما نزلوا الملعب
> قلت ده شنو اللابسو الترجي ده
> اسلام عاينت ليهم وقالت لي
> اجي يا البرقش
> موش قالوا جايين بالاحمر !!
 > قلت ليها يابت انتي بتعرفي اكتر من ناس البعثة الادارية؟
 > المهم
> زمان قالوا واحد مصري قال
> السودان آلت ناكل مما نزرع
> ومصر تدحك (تضحك)
> السودان زرعت الأمح (القمح )
> ومصر تضحك
> السودان حصدت الأمح
> ومصر تدحك
> السودان كلت (أكلت )
> ومصر تدحك
> امريكا وقفت المعونة
> مصر الضحك شرطها
 > تذكرت هذا الكلام وانتخابات الهلال تبث على الهواء مباشرة على شاشة قناة الهلال من موقعها داخل الجوهرة الزرقاء
> ومصر تدحك نورها يا دوب رجع ليهو يومين
 > ولكن لفت نظري خطاب الحبيب عماد الطيب
> عمدة دفعة واخ وحبيب
> لمن اتخرجنا ما سمعتو كضب
> عشان كده لما قال الهلال شال الممتاز الفين واربعطاشر وخمسطاشر وسطاشر
> قلت عمدة ما بكضب
> ومابخرش
> ومابتاع بحر
> لكن الزهايمر جوه الجامع بجي
 > وسقط عن عمدة سهواً اعظم انجازات مجلس كردنة
> وهو دعم المريخ بالعقرب وميدو وترك السماني للمريخ واستبداله باب ستة ولم نفايات المريخ امثال جابسون ركبة وبقية العقد الفريد
 > ومن خطاب الميزانية فهمت انو كردنة دفع في الجوهرة ميتين وعشرة مليار جنيه
> اعفى منها مية وستين مليار جنيه
> يعني في خمسين مليار مديونية تنتظر من يتجرأ علي الجلوس فوق عرش كردنة
> واعجبني شكر عماد لمستأجري دكاكين الهلال لأنهم تبرعوا للهلال بستة مليار
> تبرعوا ياعمدة ؟
> تبرعوا بالتا !!!
> ولا بالطبلة القفلوها وبضاعتهم جوه يا انت !
> ياتمضي يا تتطلب الله
> وقرار النائب العام ما بياكل عيش مع تاتشرات مافيها لوحات
> قال تبرعوا قال
> وكمان ياعمدة زادوا الايجار
> براهم كده بس هفت ليهم
 > اللهم ما تجيب لينا قرش يوم القيامة تجهجهنا بيهو ولما تسألنا من وين جبتوهوا ما نعرف نقول شنو
 > ايها الناس
> البلد دي حيرتنا
> كلو يوم تصحي تلقي مية عمارة قامت
> سودانير لو بتقوم زي العمارات البتقوم دي ماكان بعنا خط هيثرو
> تنوم تخلي البيت المقابلك خرابة
> تصحي تلقاهم بالليل لحقوهوا أمات طه
>تنوم تخلي البيت القصادك دلجة ساااي لأنهم لحقوهوا امات طه
> تصحي تلقي البيت الدلجة القصادك اربعة طوابق
> لو قلنا العربات العاملات زي النسوان لمن يلمن شعرهن لي نضافة العيد ديل بجيبن الخرسانة جاااهزة
> الشمس البتنشف دي بالليل بجيبوها من وين !!!
> حيرونا شغلهم كلو بالليل
> العمارة بقت تقوم فجأة زي اللغم
> الناس دي بتبني كيف
> اذا كان انا داير ابني حيطة واااحدة مساهر عشرة يوم اضرب واحسب
> ياربي اشيل تمويل اصغر ولا اكبر
> ياربي اخش صندوق ؟
> اضربها القاها لو خشيت تابوت مابتلفق
> الناس دي بتبني كيف بس !
> طه يبني وهاشم يبني
> موش في مدحة كده ؟
> احبك واحييك يا رسول الله
> اللهم اغننا بحلالك
> غايتو الحيطة دي لو ناس اسلام مصرين عليها الا الحكم يعد لينا المسافة القانونية ونقيف حيطة
 > المهم
> والأهم
> اكتب بعد نهاية شوط مباراة المنتخب الاول والذي انتهي تعادلي
> تمنياتي للمنتخب بالفوز
> ففي المنتخب رائحة الوطن العنيد
> فهو الذي يوحدنا تحت رايته او يفترض ان يوحدنا تحت رايته
 > ايها الناس
> شيعت جماهير الرياضة المغفور له ميرغني الامين والراحل زكي عباس
> لهما الرحمة ولنا الصبر وحسن العزاء
> وفي عزاء الفقيد ميرغني الامين تلاحظ وجود الاتحادين
> بركة الفيفا الماجات الفراش
> كان جضمتنا
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> حيطة واحدة أبت تتبني لينا
> قلنا الروب يا والينا
> ابت تتبني لينا
> قلنا يا ابو مروة يا والينا
> ابو مروة ما اشتغل بينا
> ود اخوي صغير قال لينا
> قولوا الله اكبر اسي بتتبني لينا
 سلك كهربا

ننساك كيف و الكلب قال بي ايدينا صممنا لازم نبنيك يا بلدنا
والي لقاء
سلك

الأعمدة

خالد كسلا

الثلاثاء، 12 كانون1/ديسمبر 2017

كمال عوض

الثلاثاء، 12 كانون1/ديسمبر 2017

عبدالمحمود الكرنكي

الثلاثاء، 12 كانون1/ديسمبر 2017

إسحق فضل الله

الثلاثاء، 12 كانون1/ديسمبر 2017

الصادق الرزيقي

الثلاثاء، 12 كانون1/ديسمبر 2017

خالد كسلا

الإثنين، 11 كانون1/ديسمبر 2017

محمد عبدالماجد

الإثنين، 11 كانون1/ديسمبر 2017