الأربعاء، 13 كانون1/ديسمبر 2017

board

سقطت الأمطار والخرطوم

>  سقطت الأمطار وسقطت الخرطوم و نجحت الحكومة في التمسك بكرسيها
>  سقطت الأمطار وسقطت الخرطوم وأعلن المذياع أن نتيجة مدرسة المعتمدين لم ينجح أحد
>  نتيجة مدرسة المحليات لم ينجح أحد

>  وتوصية بإغلاقها جميعاً والاستفادة من مبانيها كمخازن للعدة التي يحضرها ناس الكشة من ستات الشاي وبراميل معروضات ستات الهناي
>  وأعلن المذياع أن نتيجة مدرسة الولاية سقوط شنيييييع
>  وفظييييع
>  ومخجل
>  صفر في كل المواد
>  وغيابات عن بعض الامتحانات بأعذار واهية
>  سقوط شنيع برغم تبرير الغياب بأرانيك الميديكال التي لا تقنع اقرب غنماية واقعة في حفرة من حفر الشارع المنتشرة كانتشار الباعوض الذي يمارس حرية التنقل بيننا وكأنه يحمل رقماً وطنياً يشهد له بالمواطنة
>  ومن حقو
>  مدام السوريين بقدرة قادر بقوا سودانيين
>  من حق الباعوضة التي تنتمي حسباً ونسباً لملك الباعوض جدها الكبير القرص تهراقا في رحلة التنقيب الجاب منها الدهب الذي صنع منه تماثيل الكلاب الكان خاتيها في خشم باب المعبد
>  من حق تلك الباعوضة أن تتمتع بسودانيتها وتنال نظيرها رقماً وطنياً بياناته كلها صحيحة
>  مازي الأرقام الوطنية البتقول ليها مكان الميلاد امدرمان
>  يكتبوا ليك مكان الميلاد عطبرة حي العرب
>  لاقاكم حي العرب في عطبرة ?
>  طيب لاقاكم دايات في حي العرب ?????
>  انه موسم السقوط المؤسف
>  لم ينجح أحد سوى الحكومة التي نجحت في التمسك بالكرسي برغم سقوط المحليات والمعتمديات والولايات وجميع سبل الخدمات
>  حتي الخيرانية منها سقطت
>  اما سقوط الجنيه فهذا لا تتحمله الحكومة الناجحة في التمسك بالكرسي ولكنه سقوط قضاء وقدر
>  ووسط كل ذلك يتردد نشيد
>  خذوا المناصب والمكاسب بس خلولي الوطن
>  عشان علي الأقل أحفر فيهو خور يمرق الموية
>  بالمناسبة
>  انتوا تماثيل كلاب الدهب العملهم تهراقا قاعدات ولا لحقن الجفلن ?
>  يكونش أكلن الجقر ??
>  اها
>  خلونا من الفارغة ونجي للمقدودة
>  باقي حياتنا كلها بقت بين الفارغة والمقدودة
 > نجي لي كورتنا المقدودة دي
>  نجي لقبولنا بالأمر الواقع دوماً
>  حتي ولو كان جبلاً واقعاً على صدورنا يمنعنا التنفس
>  نجي لي سؤال يشغل دواخل الناس كثيراً
>  ليه نحنا كده !!!!
>  ولي متين حانكون كده ??
>  و عشان شنو بقينا كده ???
>  وهل حانقعد لسه ننتقد اننا كده ?
>  ونكتفي بذلك
>  ام سنتغير من الحال الكده
>  الخلانا بعد كنا كده بقينا ما كده (شايفين اصبعي ) ?
>  ليغير الله مابنا !!!!
>  المهم
>  نرجع للديمقراطية الهلالية
>  هوشة الحريم و نعمة الكريم
>  أمات فطومة اختي الجن الانتخابات ديل
>  دحين مابتوديهن عمره يا كردنة ?
>  ما تقول لي السنة الجاية
>  الأعمار بيد الله نعم
>  لكن النسوان ديل كباااااااار
>  إسلام شافت ليهن صورة
>  قالت لي يا بابا الهلال فتح محو أمية ???
>  قلت ليها كردنة ده دكان ود البصير بعملو في الهلال خليهو محو الأمية
>  أيها الناس
>  حانلعب ?
>  نحنا بنلعب !!!!
>  نحنا بنلعب أصلو عشان نلعب !!!
>  تحسبوا لعب ????
>  ايها الناس
>  في موقف جاكسون عربات الشفط تشفط في الموية للمغرب
>  اتوقع تصوير الحدث وبثه تلفزيونياً على أساس انو إنجاز في إطار الجهود المبذولة
>  علي الرغم من ان راعي الضان في الخلا يعلم ان هذا المشهد هو الإخفاق بعينه
>  الموية بفتحوا ليها تمشي براها مابتاتوها تنكر تنكر
>  ايها الناس
>  ان تنصروا الله ينصركم
[ المهم
>  سجلنا لاعب مهول
>  اسمه صالح العجب
>  الزول ده وين ???
>  الزول ده ماساهل
>  واذا وجد الفرصة حايكون شي تاني
>  أرجو أن نشاهده قريباً
>  وأن لانفرط فيهو
>  لأنو الزول ده مستقبلو مضمون كلاعب كبير
>  اها
>  نجي لي شمارات والي الخرتوم
>  كان شفت يا والينا
>  تاني صبت فينا
>  وطينت لينا
>  ومتوقعين كفكفة بناطليكم ومرقت سيقانكم لسنا
>  السنة دي ما فيها سباحة يا والينا ???
سلك كهربا

ننساك كيف والكلب قال كفكفة البناطلين ومرقت السيقان مابتمرق الموية من حلتنا
والي لقاء
سلك

الأعمدة

خالد كسلا

الثلاثاء، 12 كانون1/ديسمبر 2017

كمال عوض

الثلاثاء، 12 كانون1/ديسمبر 2017

عبدالمحمود الكرنكي

الثلاثاء، 12 كانون1/ديسمبر 2017

إسحق فضل الله

الثلاثاء، 12 كانون1/ديسمبر 2017

الصادق الرزيقي

الثلاثاء، 12 كانون1/ديسمبر 2017

خالد كسلا

الإثنين، 11 كانون1/ديسمبر 2017

محمد عبدالماجد

الإثنين، 11 كانون1/ديسمبر 2017