الإثنين، 18 كانون1/ديسمبر 2017

board

قلت لي حكام أجانب !

>  يتناول الإعلام المريخي استعدادات المريخ للممتاز وكأس السودان
>  وكمان يتحدث عن تمسك المريخ بحكام أجانب لمباراة القمة
>  لكن ماورونا اذا رفض الاتحاد المختلط فكرة الحكام الأجانب ماذا سيفعل المريخ ؟

>  هل حايطربق الدنيا ؟
>  هل هايهرش الاتحاد المختلط ويجبره على إحضار الحكام الأجانب ؟؟
> ام سيختار المريخ كالعادة خيار الاستقرار ويكتفي بالشجب والإدانة !!!
>  آخر المعلومات عنديأ المجلس لم يجتمع بعد ليقرر في شأن الموقف من التعامل مع الاتحاد المشترك الذي ضيعنا إفريقياً الحلفاء والشركاء فيه بمنتهى قوة العين وعدم الخوف مننا على اعتبار انه يعلم بمواقفنا جيداً
>  بقينا ما بنخوف
>  كان قلنا أخوووو
>  ما بنخوف
 >  أقول قولي هذا وذكرى رحيل الامبراطور ابو العائلة طلت علينا بالأمس
>  ويكفي الحديث عن الرجل إنه ابو العائلة
>  الف رحمة للفقيد ولنا الصبر وحسن العزاء
>  قلتوا لي حكام أجانب ؟؟
 >  المهم
>  اذا كنا فعلاً نريد بناء فريق بطولات
>  يجب علينا تأكيد الإبقاء على الجهاز الفني
>  وتحليل علمي دقيق لفترته التي قضاها والظروف التي عمل فيها
>  مع استصحاب معسكر تركيا الإعدادي الشهير
>  ورصد نجاحاته بالأرقام وإخفاقاته
>  و النجاحات ليست فقط نتائج المباريات
>  وإنما الشكل العام والمردود الفني وتطور مستوى الأفراد وهبوط ذلك المستوى الفردي اذا حدث
 >  فالناس لا تحكم على الأشياء علمياً بعد تحليل ورصد
>  فنحن انطباعيون للحد
>  اذا ردنا زول سميناهو سعيد
>  وإن كرهنا زول سميناهو ما سعيد
>  أعداء غرزة تارة يرجعون رفضهم لغرزة لأنه يعتمد على تشكيله واحدة ثابتة ويهمل البقية
>  وتارة أخرى يلومون غرزة لأنه يكثر من التجريب ولا يثبت تشكيله واحدة
>  منتهى التناقض
>  لا لشيء سوى إنهم سموا غرزة ما سعيد
 >  ولكن ما ورونا سموا مطالبة المجلس بحكام أجانب لمباراة القمة في ظل سيف الكاملين وحميدتي بي شنووووو؟؟
أيها الناس
>  التش موهوب
>  فقط لاتحملوه ما لاطاقة له به
>  الود في بداية المشوار
>  يحتاج منا لوعي في التعامل معه لصالحه
>  لا للنفخ الزائد عن الحد
>  عليه بالجدية و الإصرار والاقتناع بأنه في أول الطريق
>  نيمار الجا برشلونة لا يشبه نيمار المشي من برشلونة
>  تطور كثيراً لأنه أراد ذلك
>  ولم يركن لعبارات الثناء والإعجاب من جماهير برشلونة
>  عمل جاداً وطور نفسه
>  وعلى التش اتباع نفس الطريق ليصبح نجماً تتغنى الجماهير باسمه
 >  ولسه بسأل
>  صالح عجب وين ؟
 >  المهم
>  اتنين بتاعين بحر داقين الحنك
>  نقو في القنوات السودانية كتييييير
>  واتكلمو عن الهجمة الدرامية التلفزيونية الهندية على الشاشات العربية
>  واحد فيهم قال للتاني البعمل فيهو اميتاب ده حالتو تاب !!!
>  التاني قال ليهو أنا بفكر في تأصيل تلفزيوناتنا
>  لازم تبقى أصلية يا أصلي
>  نحنا شعب أصلي يا أصلي
>  التاني قال ليهو تأصيل القنوات السودانية كيف يا أصلي ؟
>  قال ليهو أنا مثلاً بفكر أعمل برنامج ناشونال جوغرافيك سوداني أصلي يا أصلي
>  اتكلم فيهو عن المرفعين
>  وعن الككو
>  وعن الغزال البخموا فيهو السعوديين خم
>  أول حلقة حا أتكلم عن الأسد
>  التاني قال ليهو الأسد طلع إشاعة يا أصلي
>  قاعد في البيت اليوم كلو واللبوة تمشي تصيد و تجيب الأكل للأسد وأولادو
>  الأول قال ليهو دي الرجالة زااااته
>  بقول ليها قومي يا مره ختي الأكل
>  تقوم تتخارج طوالي
>  أسي في راجل بقدر يجيب لي مرتو سيرة أكل ؟
>  طوالي حاتقول ليهو التلاجة فاضية ويدخل في أضافرينو لأنو جيوبو برضك فاضية
 >  التاني قال ليهو وناشونال جوغرافيك بتاعتك دا حلقة الأسد حاتقول فيها شنو ؟
>  الأول قال ليهو بقول الأسود في البلد دي كانت أنواع
>  نظرة بطرف العين تخلع رجال
>  لكن الحروب خلت معظمهم اتخارجوا
>  زمان حياة الأسود كانت منظمة
>  ما بتلقى أسد براهو
>  ولا لبوة براها
>  كلو أسد معاهو لبوة
>  سمحة شينة قسمتو وراضي بيها
>  وكلو لبوة معاها أسد
>  صدرو واسع أخلاقو ضيقة حجمو قدر الركشة او قدر الكديس المهم أسد
>  قسمتها وراضية بيها
>  أسي بعد الحروب دي تقابلك مية لبوة
>  محل ما تخت كراعك في الغابة دي تلاقيك لبوة
>  وبختن كمان
>  يعاينن ليك جوه عينك
>  و مابلاقيك أسد واحد
>  التاني قال ليهو والحلقه دي السودان بستفيد منها شنو ؟
>  الأول قال ليهو كيف يعني يستفيد منها شنو ؟
>  يشوف أسودو دي مشت وين «!!!
 >  أيها الناس
>  إن تنصروا الله ينصركم
>  اها
>  نجي لي شمارات والي الخرتوم
>  والينا
>  عارف باغة الزيت بي كم ؟
>  كيلو السكر عارفنك عارفو بكم
>  لكن رطل السكر عارفو بي كم ؟؟
>  كيلو الضان خليهو بكم
>  عارف كيلو لحم الراس بقي بي كم ؟
>  سعر البيتزا أكيد عارفو بكم
>  طرقة الكسرة عارفها بتكلف كم ؟
>  الطعمية بتصدق القطعة الواحدة بقت بي كم ؟
>  لو قلنا نربط البطون والفم
>  عارف متر القماش البربط البطن حصل كم ؟؟
>  ده كلو خليهو وخلينا يا والينا من الكيف والكم
>  عارف من مواطننك فاضل كم ؟؟؟
سلك كهربا

ننساك كيف والكلب قال الشماسة بحاربوا الجوع بالسلس دايرين تداقروهم فيهو كمان عشان يبقى بالشي الفلاني ؟؟
والي لقاء
سلك