الإثنين، 21 آب/أغسطس 2017

board

ختامه ظلم وظلمات

>  اسدل الستار علي بطولة العرب
>  ولأنها اتصفت بعدم الحياد وحياكة المؤامرات
>  جاء ختامها ظلماً وظلمات جعلت من البطولة مسخرة نالت سخط الجميع وسخرت منها حتى الاقدار

>  اول مباراة للترجي في البطولة خرج منها فائزاً نتيجة نقض الحكام لهدف صحيح ولج شباك الترجي
>  في المباراة التي جمعته بالمريخ
>  رأينا كيف اصر الحكم المصري على نرفزة لاعبي المريخ بالذات بكري الذي استجاب للاستفزاز وخرج بالكرت الثاني ليريح الاهلي القاهري في مباراته بالمجموعة التي تضمه كي يتأهل افضل التواني
>  فكان نقض هدف النعسان الصحيح بداعي التسلل
>  وهو نفسه الحكم الذي احتسب الهدف التالت للترجي من تسلل واضح
>  ثم كان قبل كل ذلك التغاضي عن ضربة جزاء صحيحة ارتكبت مع محمد ميدو
>  وضعه دفاع الترجي في كماشة من تلاته مدافعين ثم ضربوه
>  سكت عنها الحكم
>  لانه  لو احتسبها موقف الاهلي سيتأزم  
>  ويا ريت لو بعثتنا الادارية المرافقة قد رفضت التحكيم المصري لمباراتنا ضد الترجي
>  رفض بات
>  حتى ولو دعا الامر للانسحاب من البطولة
>  وقتها كان عرف العرب حاجة
>  كان عرفوا انو هذا الاسد الاسمر لم يروض ولن يروض ولا يروض
>  وكان يمكن الموقف ده غير من سلوك الاتحاد العربي الذي يرسم المسارات للاندية قبل القرعة ويحدد الصاعد منها قبل اللعب
>  لكن الله غااااالب
>  المهم
>  كمان يا فطومة يا اختي جابت ليها قرى للحضر؟
>  ما قلتوا كردنة بمن حضر!!
>  قالوا القرية زول يحلب الغنمنم ما خليتوهوا فيها
>  الخرفن ديل زول يعلفم ما خليتوهو في القرية
>  لكن الحمير جن كلهن
>  حمار قعد في القرية مافي
>  اي حمار جا وهو شايل على ضهرو اسوأ معاول هدم الديمقراطية وما عارف
>  يعرف كيف بس
>  هو لو كان بعرف انو بحمل اسوأ معاول هدم الديمقراطية كان بقي حمار؟
>  حتى العتان يا فطومة !
>  عتوت يشنقل الريكة ماخليتوهو يا روشا؟
>  لكن بصراحة الجداد البلدي المربط في العود على جانب البص ماشفناهو
>  الجداد البلدي ما شارك في المهزلة
>  ليهو شرف عدم المشاركة
>  وحاجة ام بخت ما جات
>  لانها لسه ما تمت الحبس
>  حاجة السرة برضك ما جات
>  كانت عاصرة مع حاجة ام بخت الحبس
>  عصرت الفراش
>  وحضرت السبوع
>  وفي الخمسطاشر كانت اساسية
>  واسي عاصرة الحبس
>  اصيلة يا السرة
>  القرية كلها يوم السبت داك ما كان فيها غير حمارة جادين العرجا
>  والجداد البلدي
>  وخروف عمك التهامي الماسكاهو المائية
>  وحاجة ام بخت وحاجة السرة وحارسن كلب السرة.
>  كلب السرة رفض يغادر القرية للحضر مشاركاً في الشيء المؤسف ده
>  لأن التاريخ يسجل
>  وكلب السرة ما داير في صفحتو بتاعت التاريخ ما يشين
>  المهم
>  اختلطت مياه الامطار بمياه الصرف بمياه البلاليع بمياه الخيران القايم فيها البوص
>  البوص اعلى من اجعص لاندكروزر راكبها معتمد في البلد دي
>  ونتجت عن كل ذلك روائح وفضائح
>  انه الفشل بعينه
>  ولكن ادب الاستقالة اظنه من اعمال الكفار
>  لذا لا نمارسه نحن المؤمنون
>  فمن دواعي الايمان عدم الهروب عند الفشل
>  بل نتمسك بالكرسي دون خجل
>  نخجل لي شنو؟
>  في زول بخجل من نعم الله عليه؟
>  الكرسي نعمة من نعم الله نفخر بها ولا نخجل منها نحن المسؤولين حتى ولو كتلت العفنة كل الشعب
>  ولو توالد الباعوض في اليوم مية مرة
>  ادب الاستقالة هو قلة ادب كفار ساي
>  ايها الناس
>  ان تنصروا الله ينصركم
>  اها
>  نجي لي شمارات والي الخرتوم
>  والينا اضغط معتمدينك الفاكيهم فينا
>  عشان يضغطوا محلياتهم البتهمل فينا
>  عشان المويات في الشوارع ما تتكدس لينا
>  وعشان المويات في المواسير تجينا
>  وعشان الباعوض ما يتوالد فينا
>  والمائية ما تحلج فينا
>  عشان الدواء بقي غاااالي يا والينا
سلك كهربا
ننساك كيف والكلب قال تجيكم من السما تطمبج الواطة؟ ستين سارينا وعوائد لافة فينا ورسوم سمينة وما بنقول ابينا  لي شنو وكت الموية خازنة فينا ولينا!!!
والى لقاء.
سلك