الخميس، 23 تشرين2/نوفمبر 2017

board

يذهب غرزه وتفضل حسرة

> الحسرة ليست علي ذهاب غرزه بقدرما هي علي الضرب بالمنهجية والاستقرار الفني عرض الحائط
> والسؤال ليس لماذا ولييييه ذهب غرزه

> لان الحقيقة اعتدنا ان نكسر رقبتها لمن تعرف حاجه
> والمبرراتيه لا يصعب عليهم تبرير سبب الذهاب
> بل يمكن ان يخرجوا علينا بان غرزه غالي في مطالبه واستعمل العرض الليبي كوسيلة ضغط علي المريخ
> فاليذهب غرزه
> وليبقي التنطيط بدون تخطيط بين المدربين هو ديدن المرحلة
> نعم غرزه ليس الوحيد في العالم
> ولكنه ابريق الشيخ فرح القديم المطرقع الذي يعرف تماما عورات الفريق
> وزي ما قلت قبل كده
> مافي داعي لابريق جديد و كلنا عورات وللاباريق السن
> وخشمها خفيف كمان
> العربان الله لا وفقكم
> عبارة تعجبني جدا
> هذه العبارة اعجبتني جدا وانا اطالعها بفيديو علي الواتس اب
> جابوا نسر حشر كرعينو في البحر وشال سمكه واتخارج
> قالوا ده حال امريكا
> جابوا دب لافي ساكت كدب كبير
> قالوا ده حال روسيا
> جابوا اسد رااااقد هيبه وجبرة وبتلفت
> قالوا ده حال انجلترا
> جابوا نمر هايج يمضي قدما وقانص
> قالوا ده حال الصين
> جابوا ديوك خاتنو قرض وبتشاكلو
> يطيروا لي فوق ويتناقدو
> ويطيروا تاني ويترافسو
> وانعمتو ويفرفرو
> قالوا ده حال العرب
> ثم كتبوا علي الشاشة
> حال العربان الله لايوفقكم
> ايها الناس
> سنكمل الموسم بجهاز فني علوق شدة
> لا نخاف خمسات التبلدي
> ولكن نخاف ضياع الزمن لنأتي بجديد في بداية الموسم
> واحتمال الجديد يودينا معسكر زي بتاع تركيا داك
> وعلي بال ما الجهاز الفني يفرز التش من ضفر
> نكون طرنا يا حبيبي طرنا
> وما خايفين من الطيران من بدري
> الجديد علينا شنو
> بس الخوف من التخبط وعدم الاستفادة من الدروس الكتر ده
> لانو القصة دي بتودينا احمد شرفي
> ووقتها الا تأجروا ليكم جماهير بنغاله يشجعوا ليكم
> ويشجعوكم
> تشيلوا الجهاز الفني يصفقوا ليكم
> ترجعوا نفس الجهاز الفني
> برضو يصفقوا ليكم
> لان مايربطهم بالكيان فقط الصفقه
> قمة الطموح ان يصفقوا لكم
> تشطبوا العجب يصفقوا ليكم
> برغم كل ماحدث تشاركوا في المنافسات المحليه كأنو مافي شئ حدث
> يصفقوا ليكم
> تستقيلوا فجأة يصفقوا ليكم
> تقولوا راجعين
> برضك يصفقوا ليكم
> ستصنعون من المدرجات صفاقات
> وللشفوت تابوت لانهم رفضوا في كل الاحوال ان يصفقوا ليكم
> المهم
> البوكلين بعرف كيف ومتين يحفر اعمق حفرة
> ولكنه لا يعرف مكان الدهب
> لذا يقوم البوكلين بالحفر من جديد بعد فشل الحصول علي الذهب في حفرته القديمة
> عشان كده حقو البوكلين قبل يحفر يسأل جهاز الدهب
> احفر هنا في دهب ولا افتح للموضوع ده !
> وداعا غرزه
> اردت ان تبني
> ولكن ارضنا غير صالحة للبناء
> خلينا في جالصونا البشبهنا ده
> وشوف وين محل السيخ والاسمنت والخرط الراقية
> بس الخوف نشوفك محل السيخ الهنا
> الانبهل بالهبل جمبنا
> ووقتها صدقني ستجبرنا علي ان نبارك لجارنا العمارة الشاهقه
> ذات اللوحه المكتوب عليها
> الامييييييييرة
> في الوكت داك البكي مابجيبو ليا
> ايها الناس
> ان تنصروا الله ينصركم
> اها
> نجي لي شمارات والي الخرتوم
> والينا
> السنة دي قول ضبحنا مانطينا
> صحي الضباح البضبح لينا
> لو ماوريناهوا ايصال العوائد مايضبح لينا ???
> زي بتاع الكهربا لو ما اديناهو حق الموية مابدينا
سلك كهربا
ننساك كيف والكلب قال الضحية كايسه ضحية ???
والي لقاء
سلك

الأعمدة

خالد كسلا

الأربعاء، 22 تشرين2/نوفمبر 2017

الصادق الرزيقي

الأربعاء، 22 تشرين2/نوفمبر 2017

عبدالمحمود الكرنكي

الأربعاء، 22 تشرين2/نوفمبر 2017

كمال عوض

الأربعاء، 22 تشرين2/نوفمبر 2017

خالد كسلا

الثلاثاء، 21 تشرين2/نوفمبر 2017

الصادق الرزيقي

الثلاثاء، 21 تشرين2/نوفمبر 2017

إسحق فضل الله

الثلاثاء، 21 تشرين2/نوفمبر 2017