الأربعاء، 20 أيلول/سبتمبر 2017

board

في انتظار القرار

> شاركنا ضد مريخ التبلدي ونحنا لسه منتظرين قرار المجلس حول المشاركة في منافسات يشارك في ادارتها ناس تلتين ابريل.
> نحنا شدة ما ديمقراطيين شاركنا قبل اجتماع المجلس واصدار القرار المناسب

> فكثير من اعضاء مجلسنا قالوا رأيهم بوضوح
> وقليل منهم عصايتو مرة نايمة مرة قايمة
> وواحد يري ان المشاركة لا بد منها
> ولأننا نمارس الديمقراطية تبع القليلين الرأي الواحد
> ناس عصاية نايمة
> ولأن الديمقراطية تصدر قراراتها بالاغلبية
> فقد رجحت كفة الرأي الواحد الميزان
> لان الرأي الواحد بالمريخ هو الاغلبية دوماً
> فتلاتين يونيو اقصد تلاتين ابريل عملت الدايراهو
> والله غالب
> ايها الناس
> اي شيء ما بعيد على الله
> شاهدنا الهلال ضد الوطني على قناة الهلال وعلى الهواء مباشرة
> والمحيرنا الوطني ده فلاحتو فينا بس
> عمرو ما قدر على الهلال
> يكونش عشان هلال الحركة الوطنية؟!
> ولا كيف!
> خرجنا من المباراة بثوابت
> اولها الوطني ما بقدر على الهلال لو مات
> ثانيها ان للهلال قناة تنقل المباريات على الهواء كمان
> ثالثها الوطني عقدتنا
> المهم
> برغم اداء الهلال الباهت
> وبرغم سيادة الوطني
> وبرغم تسلل اوكرا
> وبرغم كل ما حدث فاز الهلال فوزاً لا يستحقه
> ومبارك سلمان استقال بداعي المرض
> مرضتوا الراجل يا مرض
> ما عندكم شيء يا محمد عبد الماجد
> ولكن سيظل الحال ياهو نفس الحال
> طالما نحنا بنلعب قبل نجتمع ونقرر
> يبقى الحكام يعملوا الدايرنو
> فما لجرح ميت ايلام
> ايها الناس
> لماذا لا نستفيد من دكتور زيكو
> لاعب دولي سابق
> مدرب صاحب شهادات
> خريج جامعي في نفس مجاله الرياضي
> وفي الآخر حامل للدكتوراة في نفس التخصص
> فمؤهل زيكو يمكنه من وضع خطة للنهوض بالرياضة في بلد كاملة
> ناهيك عن نادٍ واحد
> هل نستفيد من الرجل ام نتجاهل امكاناتنا كعادتنا؟
> ايها الناس
> بالتأكيد نهدف لتطور ننشده
> في ظل تخطيط سليم وتنظيم دقيق وتنفيذ بالسيسي وتنسيق يخلق هارموني بينهم
> وقبل كل ذلك نية صافية
> وتقبل للرأي الآخر
> ووضع المريخ كقيمة عليا لا تعلو عليها اية جهة مهما كانت
> والا
> انتوا الموردة اخبارها شنوووووو؟
> ايها الناس
> التحية للخرطوم الوطني النادي الأنموذجي
> شوفوا عدد المواهب الجات من مراحل الخرطوم السنية
> ليس بالخرطوم فحسب
> بل في بقية الأندية والمنتخبات
> نجاح منقطع النظير لمراحل الخرطوم السنية
> يقابله فشل كبير في جميع الاندية بما فيها من تسمي نفسها القمة
> فهل وعينا الدرس منهم ام سنظل نكابر ونسعى لضم اشبالهم بالمليارات؟
> ايها الناس
> ان تنصروا الله ينصركم
> اها
> نجي لي شمارات والي الخرتوم
> والينا
> لو لا البوش ما كان لميت فينا
> الفطور (ان وجد) بوش يا والينا
> الغدا (ان وجد لكن ما ظنيت) بوش يا والينا
> العشا اكيد بوش يعالج الوجع الفينا
> والمحيرنا اكتر يا والينا
> يطلع الدولار تطلع الأسعار لينا
> ينزل الدولار (بعد خرف) برضو تطلع الأسعار يا والينا
سلك كهربا
ننساك كيف والكلب قال تاكل في موية الفول لمن بقيت موية زول
وإلى لقاء.
سلك

الأعمدة

خالد كسلا

الثلاثاء، 19 أيلول/سبتمبر 2017

خالد كسلا

الإثنين، 18 أيلول/سبتمبر 2017

د. حسن التجاني

الإثنين، 18 أيلول/سبتمبر 2017

الصادق الرزيقي

الإثنين، 18 أيلول/سبتمبر 2017