الأربعاء، 20 أيلول/سبتمبر 2017

board

السكاك

> حرينا
> غمدت لبدت
> سك سك

> كلها وغيرها تمثل مجموعة من العاب الصبا في التاريخ القريب
> الليلة حانتكلم عن السك سك من دون الالعاب دي
> في السك سك في ميس
> وفي سكاك
> وفي ناس بسكوهم
> السكاك بغمد والبسكوهم بتدسوا
> السكاك بقول ليهم خلاص ؟
> المسكوكين بقولوا ليهو لسسسسسسع
> خلاص
> لسسسسسسع
> خلاص
> خلااااااااااااص
> والسكاك يفتح ويبدأ رحلة البحث عن المدسوسين
> إذا وجد منهم واحد بسكو
> وغالباً اذا ظهر واحد بظهروا الباقين
> ويبدأ السك
> الباخد لبعه من السكاك مات يبقى هو السكاك الجديد
> والبخش الميس قبل ما السكاك يحصلو ده فاز واطمأن
> اشهر السكاكين في العهد الحديث هو أوتارا
> ساكي محمد عبد الرحمن من العباسية لي حي العرب
> ميدو دخل الميس ودخل قون والسكاك جاري وراهو
> اعتقد ان برشلونة تعبت من سك رونالدو
> عشان كده فكروا في سكاك خبير ونفسو طويل
> بس الببوظ عليهم القصة دي مطالبة زيدان بميدو
> الحكاية دي بتخلي السكاك لا قادر يركز على رونالدو
> ولا عارف يسك بنزيما
> ولا قادر يحصل ميدو
> ويتجهجه السكاك
> لكن السؤال
> هل طلب برشلونة أوتارا
> ام طالب زول من طرف أوتارا برشلونة عشان تسمح للسكاك باجراء اختبارات هو راسب فيها لا محالة؟
> شريط مباراة ميدو يكفي ناس البارسا ليصرفوا النظر عن اذن الاختبارات الممنوح للزول المن طرف اوتارا
> كان السكاك بلعب في البارسا
> سيما يلعب في السما يعني !!!
> غايتو يا روشا لو نجحت صفقة السكاك
> صدقني يقول خلاص؟
> رونالدو يكون جاب خمسة اقوان ويقول ليهو لسع
> والغريبة بنزيما
> بنزيما عربي والكضب ما بتلفت ليهو
> السكاك يقول ليهو خلاص؟
> بنزيما يكون بقي هداف الدوري ويقول ليهو لسسسسسسع
> لسسسسع يا بنزيما وانت بقيت هداف الدوري واوتارا لسه مغمض لا حصل ميدو ولا لحق رونالدو ولا شاف قون السماني في الحبش؟
> المهم
> نلتقي هلال التبلدي اليوم بالقلعة الحمراء
> بالتأكيد سنشاهد بصمات غرزة التي بدأت تلوح في الافق بعد اخفاقات الاعداد الاساسي بتركيا.
> ان احسن غرزة او اساء
> اضحي الرجل جزءاً من ماضينا
> وما مشكلة
> ففي أحيان كثيرة نفقد عزيزاً لدينا وما بأيدينا
> لأن الأمر بيد اليوم والأجل والقدر
> ومشي امرك يا قدر
> اعداء غرزة اصحاب باع
> اذا ثبت التشكيل يرون ان الرجل يحارب البقية ويضيع المواهب
> واذا لعب بالتدوير واعطاء الفرص للجميع
> يدوروا فيهو ويقولوا ليه ما ثبت التشكيل
> ما رادوهو
> لو رادوهو كان سموهو سعيد
> ما رادوهو
> عشان كده ما سموهو سعيد
> وطبعاً غرزة هو من طالب بتأخير سداد رواتبه عشان يشيلها من حقوق المريخ لدى الكاف علي اساس خصمها وتحويلها ليهو في حسابو بفرنسا.
> والكاف قال انا ما شغال تحت ابو واحد فيكم
> ما بحول
> وروني حسابكم احول ليكم فيهو
> ده كل الحاصل في ما يخص راتب غرزة
> مريخ شنو كمان البأخر راتب غرزة تمنية شهور !!!
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> مواصلات الشهداء الحتانة كانت بي تلاته بتودينا
> فجأة بالنهار بقت بي اربعة يا والينا
> واول المغرب ما يأذن لينا
> حتانه على خمسة يكوركوا لينا
سلك كهربا
ننساك كيف والكلب قال حيرتوا آدم اسميث ذاتو… بالنهار يطلع الدولار وتنزل المواصلات وبالليل ينزل الدولار وتطلع المواصلات وفي الحالتين الروح طالعة
والى لقاء.
سلك

الأعمدة

خالد كسلا

الثلاثاء، 19 أيلول/سبتمبر 2017

خالد كسلا

الإثنين، 18 أيلول/سبتمبر 2017

د. حسن التجاني

الإثنين، 18 أيلول/سبتمبر 2017

الصادق الرزيقي

الإثنين، 18 أيلول/سبتمبر 2017