الأحد، 25 شباط/فبراير 2018

board

لا هوى جامح ولا طيش بين

> الهوى الجامح هو العشق لدرجة نسيان النفس ذاتها.
> زي قصة كتير بتناسى ايديا في ايديهو

> وزي حكاية انسى عيني في عينيهو
> الهوى الجامح ده هوى شديد خلاص.
> هوى وبجيب هوا.
> بخلي الزول زي المنوم مغنطيسياً.
> ينسى اسمو وينسى رسمو وينسى مقامو وينسى مكانو وينسى عمرو ويتذكر فقط المحبوب.
> والنوع ده من الهوى بمسك الناس الكبار.
> الناس البفترض فيهم الوقار.
> بالله الواحد تلقاهو يهاتي بالمحبوبة تقول مراهق.
> ويمشي يستناها جمب الجامعة من عشرة وهي بتطلع أربعة.
> تلقاهو عمرو ستة وسبعين
> يقع ليك التي شيرتات (بيتر أديني حقنة).
> ويدق السيستم تلقي الحزام في ركبو.
> ويحلق شنبو.
> ويشيل دقنو.
> يشيل فكرتها من رأسو.
> بالله بالصورة تلقاهو زي الاسبليت في الراكوبة.
> ممسح ويرجف كلو.
> ويدخل ليك في مواضيع الروج ده ما اصلي والبدرة دي ماركة.
> يهتم باهتمامات محبوبة لو شققوا عمرو يجيب خمسة من عمرها.
> تشوفو تقول خارش.
> وهو ما خارش.
> لكن من العليهو.
> ده الهوى الجامح.
> أما الطيش البين.
> ده براهو كمان.
> ده جنو كلكي.
> سيدو بتصرف بي طيش للطيش.
> يفعل اي شيء من أجل المحبوبة.
> ولو طلبت منو الانتحار ما بتراجع.
> ويصرف صرف من لا يخشى الفقر في امور لا تستحق.
> طيش شديد.
> ولا يرى أي قصور او خطأ في تصرفه تجاه المحبوبة والذي يدفعه للاتيان بتصرفات كلها طائشة.
> وده غالباً بصيب الشباب العندهم.
> المهم.
> غرزة مدربي.
> أحبه جداً.
> ويحبه كثر.
> والمعلم صاحب قدرات كبيرة كانت سبباً دفعنا لمحبة الرجل.
> هذه المحبة التي يبادلنا لها الرجل.
> يجب أن نمارسها بعقلانية.
> لا نمارسها بهوى جامح يعمينا عن حقائق ويحرمنا من ممارستها بمنطق وعقلانية.
> ولا نمارسها بطيش بين يهدر اموالنا ويبهدل حالنا.
> غرزة لي الليلة ولي بكرة مدربي وعشقي وحبي.
> لكن
> الدولار بي كم؟
> ومتوقع يصل كم؟
> المريخ البدفعوا ليهو كم؟
> دخلو السنوي كم؟
> طيب اضرب أربعين ألف دولار شهرياً في اتنين وعشرين ألف تقريباً شوفها بي كم؟
> بدون أية خلافات مع غرزة.
> التعاقد معه بهذا المبلغ في ظل الظروف دي يعتبر هوى جامحاً نمارسه بطيش بين.
> والمجلس لا يحتاج لإشانة سمعة الرجل كي يتفكفك منو.
> بحسابات بسيطة ببقى القرار مقنع.
> أيها الناس
> غرزة ليس ابن شاخور.
> ولا يحمل اسم ديقو شاخور غارزيتو.
> ولما يجيهو عرض اربعين الف دولار شهرياً.
> بالتأكيد ما من المنطق ان نطالبه برفض العرض وقبول عرضنا الاقل.
> وإن طلبنا منه لن يقبل الا اذا كان واقعاً في هوانا جانحاً طيشه بين.
> او قل يهوانا بجنوح طيشه بين
> لذا من المنطق ان يذهب غرزة مأسوفاً عليه.
> ولو كانت لدينا استثماراتنا التي تدعم موقفنا المالي لزاودنا على غرزة اعتى الفرق.
> ودي مشكلة مجلس ما مشكلة غرزة
> لكن.
> أن يقبل الريس بعرض الاتحاد الليبي كتعاقد جديد مع غرزة.
> ويقبل غرزة بذلك.
> ويأتي غرزة في اليوم التالي.
> من المفترض لتوقيع العقد.
> ثم يفاجئ الناس بمطالبات من 2015 كشرط لتوقيع العقد الجديد.
> وهي نقطة لم يذكرها عند الاتفاق على التعاقد الجديد ولم يثرها.
> ولكنه جعلها شرطاً للتوقيع.
> في هذه الحالة
> ولأن حبنا لغرزة حب لم نغيب عنه العقل ولم نترك امره كاملاً للقلب.
> نقول لغرزة نهواك نعم ولكن لا بهوى جامح ولا بطيش بين.
> نحبك ولكنك في دي غلطاااااااااان.
> في دي الغلط راكبك من رجليك لي عيونك (الخدر ) ديل.
> والحب لا يقبل المقايضة بالمشاعر.
> وهو أخذ وعطاء.
> العطاء فيه مقدم.
> ولا يكون العطاء فيه بنية المقابل ابداً.
> وتظل معلماً.
> وتظل مدربي.
> ولكن للضرورة أحكام.
> ونعتبر أنفسنا حبينا بت الحلة وجا مغترب لف رأسها ولفحها.
> أيها الناس.
> سنعود بالتفصيل الصادق جداً
> أيها الناس.
> إن تنصروا الله ينصركم.
> أها.
> نجي لي شمارات والي الخرتوم.
> كان شفت يا والينا
> أمس ولا استمتعنا بالجو برغم الغيم القيل فينا.
> كنا خايفين فجأة يا والينا
> تطلع الشمس وتقول لينا
> كانت معاكم الكاميرا الخفية
سلك كهربا
ننساك كيف والكلب قال زمان جو زي ده بتقولوا جو فول… يقطع الفول ويقطع سنينوووو.
والى لقاء.
سلك

الأعمدة

د. عارف الركابي

السبت، 24 شباط/فبراير 2018