الأربعاء، 20 أيلول/سبتمبر 2017

board

أوتارا وفنيلة ميسي

> بعد هيلمانة اوتارا يا روشا حقو تستفيدوا من الراجل.
> اصلو وكت راجعة لي مراحها.
> مسكلوا ليهو.

> لما يرجع ليكم قولوا ليهو جيب معاك فنيلة ميسي.
> اخير يجيب فنيلة ميسي بدل يرجع مدلدل ايدينو.
> واهي برضك فنيلة ميسي فيها ريحة برشلونة.
> وريحة برشلونة فواحة.
> بتغطي ريحة البصل.
> وريحة الصفر.
> وبرروا عودة اوتارا يا فطومة.
> قولوا برشلونة دفع خمسة وأربعين مليون دولار.
> وكردنة قال علي الطلاق ولا من محلو.
> قاموا جابوا لابورتا من حلتهم.
> دخلوهو واسطة.
> قالوا ليهو اقنع لينا كردنة ده.
> لو حصل كده.
> حايقول ليكم كردنة ده منو؟
> قولوا ليهو كردنة رئيس الهلال.
> حا يقول ليكم الهلال ده شنو؟
> قولوا ليهو فريق في السودان.
> حايقول ليكم السودان ده وين؟
> قولوا ليهو بتعرف جمال الوالي
> حايقول ليكم جيمي رئيس المريخ الجانا هنا ضمن رؤساء الفرق الحائزة على بطولات قارية؟
> قولوا ليهو ياهو زاتو… اها كردنة ده رئيس نادي اسمو الهلال بلعب في سودان المريخ.
> كده لابورتا ممكن يتوسط ويقنعهم يرسلوا ليكم فنيلة ميسي مع اوتارا.
> ما تغسلوها يا روشا.
> الغسيل بمرق ريحة ميسي من الفنيلة.
> واتفنلي.
> قال برشلونة قال.
> اذا اوتارا بلعب في برشلونة الخرطوم الوطني مفروض يكون ضمن اندية الليغا الاسبانية يا محمد عبد الماجد.
> اربعة يا اربعة.
> الكورة دي ركبتوها (مجاناً ) اظنكم.
> عشان كده.
> ايها الناس
> العمل من الحبة قبة لا يمحو صفراً ولا امية.
> الداير يتعلم ما بهمو العمر.
> بمشي محو الامية.
> والداير يمحو الامية الانجازية الجوية.
> ما بودي اوتارا بره.
> بجيب كأس من بره.
> بره كأس الكنغو بره كضب معاكم.
> شداد كان الصحافي المرافق للبعثة للكنغو.
> قال يعميني.
> ويطرشني.
> ما شفت كأس.
> ويسمني.
> المهم.
> اكررها.
> المرحلة تحتاج لعقل وتعقل ونية صافية.
> تحميل الريس للقصور في موضوع غرزة لا يقدم ولا يؤخر ولا يغير المفاهيم والواقع ولا الوقائع.
> واشانة سمعة غرزة لا تفسد للود مع الرجل قضية.
> ولواكة موضوع اللافتة لا يحل المعضلة بقدرما التوجية الداخلي وفي نطاق الاسرة يمكن ان يؤدي الى ضبط النفس داخل الاسرة المريخية اثناء ممارسة العملية التشجيعية.
> والله من وراء القصد.
> قلت لي الزول راجع؟
> ايها الناس.
> ان تنصروا الله ينصركم.
> اها.
> نجي لي شمارات والي الخرتوم.
> والله يا والينا.
> في حشرات اليومين دي لافة فينا.
> لا معروفة رصاصة يا والينا.
> ولا معروفة مدفع بضرب فينا.
> ولا معروفة القيامة قامت يا والينا.
> القرصة ما بي قدوما يا والينا.
> عندها دربكين والقرصة بي دربكينا.
سلك كهربا
ننساك كيف والكلب قال بركة القرصتكم وما اكلتكم كملتكم.
وإلى لقاء.
سلك

الأعمدة

خالد كسلا

الثلاثاء، 19 أيلول/سبتمبر 2017

خالد كسلا

الإثنين، 18 أيلول/سبتمبر 2017

د. حسن التجاني

الإثنين، 18 أيلول/سبتمبر 2017

الصادق الرزيقي

الإثنين، 18 أيلول/سبتمبر 2017