الأربعاء، 22 تشرين2/نوفمبر 2017

board

مرقتكم المطرة من البل

> قابلت زنطورابي كبير في بتري بمنزل اخونا مرتضى الشيخ.
> قال لي الحكم جاملكم. 
> قلت ليهو في شنو؟ 

> قال لي في بكري؟ 
> قلت ليهو الحكم ولا كردنة الادانا اجمل هدية. 
> قال لي بكري ضرب الزول بونيه والحكم خلاهو. 
> قلت ليهو انت عين السوء ما بتخليك تشوف.
> بكري ضرب الكورة روسية. 
> وقطعت قلبكم.
> قطعت قلب الحضر الكورة من اولها. 
> وقطعت قلب الجا الكورة بعد الشوط الاول .
> وقطعت قلب التابع الكورة من الدقيقة تمنين.
> دائماً يموت الحقد بسم العقرب. 
> واصبروا الدبيب جايينا قريب يا حبيب هدية كالعادة من الحبيب.
> المهم. 
> المطرة مرقت ناس روشا من البل.
> لكن مبلول يا ولدي وان طال السفر. 
> المهم.
> نقدنا للحال الذي وصلت اليه امدرمان وجد استحساناً وتأييداً كبيراً بالذات وسط الناس الذين يتمتعون بالغيرة على الوطن لسه. 
> ننشر تعقيب الاستاذ رشاد نجم الدين 
> السيد المحترم الاستاذ بابكر سلك 
صاحب مقال (في السلك) في جريدة (الانتباهة) الغراء
السلام عليكم ورحمة الله 
> اسمح لي يا استاذ ان اعقب على مقالك بتاريخ 2017/9/6 
> اولاً الشكر كل الشكر لك على هذا المقال الضافي حول ما آلت اليه مدينة ام درمان العريقة والحبيبة علي اهلها. 
> ثانيا ان مقالك ذاك قد نال الاستحسان والقبول من جل اهالي ام درمان ان لم يكن جميعهم، ومازلنا نتوق الى كتابة الكثيرين من اهالي ام درمان حول هذا الموضوع عل وعسى تلك الكتابات تجد آذانا صاغية لدى السيد المعتمد والسادة اركان حربه.
لقد غابت الرقابة والاشراف والمحاسبة على المقصرين في اداء اعمالهم المنوطة بهم تجاه مدينة ام درمان.
لقد ذكرت اخي الكثير والكثير جداً من المسالب الموجودة في ام درمان، وارجو ان اضيف الآتي لما ذكرته: 
 أ/ اصبحت مدينة ام درمان مدينة اشباح للظلام الدامس الذي يكسو احياءها. 
ب/ كثرة المتسولين وجلهم من غير السودانيين تجدهم في الشوارع وتقاطعات الطرق.
ج/ كثرة النشالين والسرقات في الاسواق ومواقف المواصلات. 
د/ كثرة قطوعات الكهرباء والماء عن الاحياء وطفح المجاري والكثير من المسالب التي فات علي ان اذكرها 
ارجو صادقاً ان يهتم السيد المعتمد واركان حربه بما كتبته انت بالامس وما اضفته انا اليوم، وان تعود مدينة ام درمان الى ما كانت عليه من نظافة ونظام وحفظ للآدمية.
> شكراً اخي  بابكر على هذه اللفتة والاهتمام والانتقاد الموضوعي للسيد المعتمد والسادة اركان حربه، ونرجو منهم البدء فوراً في التنفيذ وازالة كل السلبيات التي ذكرت في ملاحظاتنا والله من وراء القصد. 
> اكرر شكري لك اخي بابكر والسلام 
رشاد نجم الدين محمد 
من اهالي ام درمان
> الشكر لك استاذي رشاد نجم الدين.
> الكورة الآن بملعب السيد المعتمد. 
> بيان بالعمل يا سعادتك. 
> فلن تغير الحال الخطب الحماسية واللقاءات الخنفشارية.
> ولا التبريرات الواهية. 
> ولا تعليق الامر على سلوك السكان.
> لأن الذي لا يهذب سلوكه تهذبه اللوائح والاوامر المحلية.
> والمابختشي قطعاً بخاف.
> ايها الناس.
> ان تنصروا الله ينصركم.
> اها.
> نجي لي شمارات والي الخرتوم. 
> الليلة بعد اذنك الشمار لمعتمد امدرمان يا والينا.
> تعرف يا مان 
> ام در ممكن تبقى احلى من نادي الالمان. 
> لو فتحنا الخيران. 
> لو ابدنا الباعوض والضبان.
> تعرف يا مان. 
> يا تتصلح ام درمان. 
> يا نمشي معاك نادي الالمان.
> نحنا ما شبهنا باعوض ولا بنقدر علي الضبان. 
> فهمتني يا مان.
سلك كهربا 
ننساك كيف والكلب قال يا اللونك اسمراني وساكن النادي الالماني الباعوض اذاني قسمتو لي جيراني.
والى لقاء.
سلك

الأعمدة