الجمعة، 15 كانون1/ديسمبر 2017

board

كراع منو?!

> ما تبوز
> لو بوزت حاتبقي بوذي.

> وليس بيننا بوذي.
> بوذا (اله) البوذيين ليس الا رجل زهد الحياه من بعد ترف عاشه هو واسرته.
> واختار الضنك لاجل مبادئ يرى انها الواجب اتباعها.
> المهم.
> كترت طلة نعمة الله علي بوذا واسرتو.
> وكترت الطلة مسخت عليو نعمة الله.
> فقال انه اله.
> ناس كتار عجبتهم المبادئ التي نادي بها بوذا.
> فنصبوه إلهاً يعبد.
> ولتسهيل ممارسة العبادة عند البوذيين.
> سمحت الديانة لمتبعيها ببناء بوذة حجمه قدر قدرة العابد المؤمن.
> يختو في بيتو ويعبدو.
> كلما الدنيا تشلتو ويبوز.
> يدخل على بوذتو بي بويزتو ديك ويشكي ويبكي.
> لكن المشكلة لو دخل على بوذا بي بوزو ولقي بوذا ذاتو بي بوزو.
> باقي الحالة دي عادي ممكن تخلي بوذا يبوز ويلعن اليوم الخلي فيهو العز وزهد الحياة ونصب فيه نفسه الهاً.
> الزمن ده الزول اولادو ما قادر عليهم.
> اولادو شنو.
> رقبتو ما قادر عليها.
> يسوي ليهو عباد كمان يحلحل مشاكلهم.
> ويلبي طلباتهم الما بتنتهي دي.
> الداير عقد عمل.
> يا بوذا جيبو لي.
> الداير ولدو يشتغل.
> يا بوذا شغلو لي.
> الكرهان الحكومة
> شكيتكم على بوذا.
> والداير يحج.
> لا تأشيرة.
> لا امير فوج يأكل حقو ويفطرو بيض.
> ولا مطوف يستفزو.
> ولا رمي جمرات الصينيين القصار الوراهو يطقعوهو بدل الشيطان.
> ولا نيجيريين يلزوهو.
> ولا ايرانيين يقعوا فيهو.
> ولا رافعة تتكوم عليهو.
> لو داير يحج.
> يفتح الغرفة الخاتي فيها بوذتو.
> يتعبد ويتهجد ويقدم طلباتو.
> بوذا اله لم يطلب التأليه من احد.
> ولكن المريدون الهوه واجبروه على اعلان الوهيته.
> وبالورد ناااش ناشا ناشا نوي.
> بودا باك بقبق.
> ايها الناس.
> من قال ان كراع سوداكال حارة عشان كده فقدنا نقطتين امام السلاطين بالامس.
> هو بوذي لا محالة.
> فمريخ الفاشر يلعب معنا في نفس الدرجة، ومن حقه ان يطمح في التعادل كما فعلها واقعاً على ارضنا وبين جماهيرنا داخل القلعة في الدورة الاولى.
> ومن حق اولاد الفاشر ان يطمعوا في الفوز علينا كما فعلوا من قبل بهدف حسن كمال داخل استادنا.
> وقتها لم يكن ذلك بسبب كراع سوداكال الحارة.
> لأن سوداكال لم يكن موجوداً.
> فقد كان في فرنسا ولا لندن ولا شاد ولا في مكان تاني ما عارف.
> والذين يريدون ان ينصبوا سوداكال بوذا فينا.
> فلهم دينهم ولنا دين.
> لا مجال لبوذي بيننا.
> ومن يتمسك ببوذيته عليه ان يبني له بوذا ويضعه في داره.
> ويلزم داره.
> يبوز لي بوذتو.
> ويحج ويعمر.
> بلشوي ناشا ناشا نوي بقبق
> ايها الناس.
> اكرر.
> بوذا لم يطلب من الذين الهوه ان يعبدوه.
> وفرعون غشاهو هامان.
> وما لقي حد يحوشو.
> بودا بااااااك.
> المهم
> هيييع.
> نحنا الكيك.
> فينا الضرب من قريش صقرها.
> وفينا الضرب قريش كلها.
> المهم.
> إذا عدنا لمباراة الأمس نجد أن النقطة كتيرة علينا.
> أداء باهت.
> بدون نفس.
> بدون غيرة.
> بدون احترام للمنافس.
> بدون إصرار.
> بتعالٍ وغرور في فارغة.
> بصمت من صديقي محمد موسى على هذا الاستهتار.
> بإصرار على اشراك كلتشي ثمانين دقيقة، وهو الباقي ليهو من عمرو الافتراضي نص ساعة.
> باعتماد على الحظ وضعف الخصم.
> إنه تعادل مفيد لو خرجنا منه بفائدة وضع نخرتنا دي في واطاة الله سيدنا ده.
> هييييع.
> ايها الناس.
> ان تنصروا الله ينصركم.
> أها.
> نجي لي شمارات والي الخرتوم.
> والينا
> الباعوض ما مخلينا.
> الكافتريات في شارع العرضة عفن موياتها سايل فينا.
> والمعتمد ما سائل فينا.
> وكت الشكوى ما جابت نتائج لينا.
> مضطرين نرفع ايدينا ونشكيكم يا والينا.
سلك كهربا
ننساك كيف والكلب قال شكيتكم علي بوذا.
وإلى لقاء.
سلك

الأعمدة

د. عارف الركابي

الخميس، 14 كانون1/ديسمبر 2017

خالد كسلا

الخميس، 14 كانون1/ديسمبر 2017

بابكر سلك

الخميس، 14 كانون1/ديسمبر 2017

عبدالمحمود الكرنكي

الخميس، 14 كانون1/ديسمبر 2017

محمد عبدالماجد

الخميس، 14 كانون1/ديسمبر 2017

الصادق الرزيقي

الخميس، 14 كانون1/ديسمبر 2017

كمال عوض

الخميس، 14 كانون1/ديسمبر 2017

خالد كسلا

الأربعاء، 13 كانون1/ديسمبر 2017

د. حسن التجاني

الأربعاء، 13 كانون1/ديسمبر 2017

بابكر سلك

الأربعاء، 13 كانون1/ديسمبر 2017

كمال عوض

الأربعاء، 13 كانون1/ديسمبر 2017