الجمعة، 15 كانون1/ديسمبر 2017

board

أبونا آدم

> وأمنا حواء.
> نحن بشر نصيب ونخطئ.

> واول خطوات تصحيح الخطأ هي الاعتراف به.
> وعشان نعترف بالخطأ يلزمنا ان نوقف عمليات كسير التلج.
> وان نبتعد عن التبريرات الواهية.
> وليس بالضرورة ان نلوم المخطئ منا.
> لأن الهدف هو الاصلاح في المقام الاول.
> وليس الهدف رمي الناس بالملامة.
> ايها الناس.
> المريخ في وضع حرج جداً.
> فريق الكرة في حتة ضيقة شديد.
> اصابات بالجملة ولا معالج.
> لياقة في واطات الله دي وبدون معد بدني.
> متأخرات واستحقاقات ظاااهرة في وشوش اللاعبين وادائهم ولا حد سائل.
> محمد موسي برااااهو في الجهاز الفني.
> زول ساي يشاورو مافي.
> فهل في التسليم والتسلم لا يشعر المجلس القديم بالحرج من وضع فريق الكرة.
> معقولة زول يسلم فريق (توتال لوست)؟
> ايها الناس
> الخجلة في شنو وكلنا اولاد آدم.
> والخوف من منو وكلنا وشوشنا شبر.
> نحنا ناس الصلع ديل وشوشنا يمكن تكون شبر ونص.
> مفروض الخوف من الله.
> وممكن يكون الخوف على المريخ.
> لكن الخوف من زول دي شينة.
> والاقبح كسير التلج والاتيان بالتبريرات الواهية.
> والاشنة القرد.
> ولسه بسأل.
> جمال سالم مشكلتو مادية ولا معنوية؟!
> ايها الناس.
> الناس الداخلة المجلس مع سوداكال.
> خاشين برضو ساي ولا عندكم دعم ورأي؟
> اذا خاشين منجهة ساي.
> حقو الرجل يعين موظفاً مديراً للاستاد وموظفاً مدير كرة متفرغاً ومتخصصاً، ومديراً تنفيذياً ومدير حسابات ومحاسباً.
> ومدير استثمار (وده اهم زول)
> ويدير النادي براهو.
> ويخليكم اعضاء مجلس تشريفي.
> تجوا وقت الاحتفال بالانجازات تقعدوا على مقاعد كبار الزوار.
> وممكن تجروا لقاءات تلفزيونية واذاعية وصحفية لزوم القشرة.
> فعبارات.
> اعتقد.
> وافتكر.
> ومن هذا المنطلق
> ونحسب أنا
> ونعد
> ما بتكلف شيء.
> وبنمشيها ليكم.
> فنحن بشر.
> واخوة.
> وأبونا آدم.
> المهم.
> حال فريق الكرة لا يسر.
> برغم المواهب التي جمعها المجلس السابق وتلك التي اتت بها لجنة التسيير القبل الفاتت في فترتها الاولى قبل التجديد لها لفترة ثانية قبل ان تعين لجنة التسيير السابقه في فترتها الاولي قبل التجديد لها للفترة الاخيرة.
> من خلال لجان التسيير الكثيرة.
> استطاع المريخ ان يجلب اجود الشتول.
> ولكن الإهمال كان عند الري والتسميد وابعاد الآفات.
> فهل يستطيع المجلس الجديد ان يدرك الشتول قبل فوات الاوان ويفتح كل مجاري الري التي تبل العروق ليذهب الظمأ ويعود جمال سالم ورفاقه لسابق عهدهم.
> ولا نقنع ويصيب اليباس شتولنا ونزرع نيم؟
> أبونا آدم.
> أسس حياة كل البشر.
> فهل نتخذ من آدم رمزاً ومثالاً في تعمير دنيا المريخ.
> ام نواصل ما أدمناه من تعكير صفو الجماهير.
> ايها الناس.
> إن تنصروا الله ينصركم.
> اها.
> نجي لي شمارات والي الخرتوم.
> كان شفت يا والينا.
> باعوضنا امس عرس باعوضة ناس صفية جيرانا.
> جنس باعوض حضر الحفلة.
> عملوها في قاعة المركز الثقافي بام درمان.
> جنس ربة.
> اجتمع الحبان.
> الباعوض والضبان.
> ربوها ربة يا والينا.
سلك كهربا
ننساك كيف والكلب قال ثقافة شنو مع الخيران والباعوض والضبان… بتلعبوا انتو؟
والى لقاء.
سلك

الأعمدة

د. عارف الركابي

الخميس، 14 كانون1/ديسمبر 2017

خالد كسلا

الخميس، 14 كانون1/ديسمبر 2017

بابكر سلك

الخميس، 14 كانون1/ديسمبر 2017

عبدالمحمود الكرنكي

الخميس، 14 كانون1/ديسمبر 2017

محمد عبدالماجد

الخميس، 14 كانون1/ديسمبر 2017

الصادق الرزيقي

الخميس، 14 كانون1/ديسمبر 2017

كمال عوض

الخميس، 14 كانون1/ديسمبر 2017

خالد كسلا

الأربعاء، 13 كانون1/ديسمبر 2017

د. حسن التجاني

الأربعاء، 13 كانون1/ديسمبر 2017

بابكر سلك

الأربعاء، 13 كانون1/ديسمبر 2017

كمال عوض

الأربعاء، 13 كانون1/ديسمبر 2017