كورتكم شينة يا والينا بابكر سلك

> اتعودنا نتكلم عن الكورة
> الليلة برضو كلامنا في الكورة
> بس كورة من نوع تاني
> معروف ان الكورة ليها خطط وتكتيكات
> وأياً كانت الخطة والتكتيك وطريقة اللعب
> المظهر الجمالي في الاداء بعجب الناس
> يعجب الجمهور الذي يواكب في مستوى تشجيعه مستوى الكورة الشايفها
> فالجمهور المنتشي يغني ويردد الاهازيج ويرتفع بسلوكه وعباراته الى مستوى الكورة
> والجمهور المفروس يسب ويلعن ويسئ ويشبه سلوكه سلوك الكورة التي يشاهد فيها
> الليلة دايرين نتكلم عن كورة الحكومة
> وريتونا كورة يا والينا
> مستوانا التشجيعي بقى زي كورة الحكومة
> وكورة الحكومة اثرت على الجماهير
> الناس كلها ماشه مصنقعة
> الحكومة كورتها فوق
> الاسعار فوق
> الرسوم فوق
> العلاج فوق
> التعليم فوق
> البنزين فوق
> وفوق فوق اسعارنا فوق
> فوق فوق حياتنا فوق
> هكذا اصبحت هتافاتنا
> ولسه كورة الحكومة لي فوق
> كلو يوم تعلي فيها لي فوق
> يا والينا
> ختوا الكورة في الواطة وحنوا علينا
> اتكسرت رقابنا واتيبست ركبينا
> صانع لعب يهدي اللعب يختها واطة يا كافي البلا مافي؟؟؟
> والعام الجديد
> فوق شديد
> سمعنا بي زيادة في رسوم تحويل سجل الاراضي
> وسمعنا بي زيادة في الرسوم عموم
> والينا
> الما لعب كورة الشراب
> ما بكون عندو كونترول كويس
> يقوم يطفش فيها لي فوق بالطريقة دي
> شوفوا ليكم ناس دقوها بالشراب يا والينا
> كورة فوق دي ما بتقدم زول فينا
> ويمكن تفنينا
> ودلائل الكورة الفوق كتيرة يا والينا
> والادلة كثيرة ومثيرة
> مثلاً
> ترخيص العربات
> رسوم استمارة
> رسوم فحص آلي
> رسوم تحت مسمى شهادة سلامة «مطافي»
> ضريبة ترخيص عربات
> معقولة دي
> الضرائب لي الدخل ممكن
> ضرائب على الارباح ممكن
> ضرائب على الترخيص!!!!!
> شينة دي
> لكن شتارة صانع اللعب
> لي فوق
> بالاضافة للتأمين
> في مجملها للعربية العادية تسعمائة وشوية
> يعني قريب مليون عشان ترخص عربيتك
> او
> الحوش يا عمك
> والينا
> ختوا الكورة واطة وحنوا علينا
> عسمتوا رقابنا وصلبتوا ركبينا
> اسي المطافي دي دخلها شنو في عربيتي ؟؟؟؟؟
> يعني ممكن نتوقع مع طفيشكم ده وكورتكم الفوق دي
> يوم في المستشفى يدفعونا رسوم شؤون هندسية
> او يدفعونا رسوم نفايات لما نجي نسجل اولادنا في المدارس
> او يدفعونا دمغة دعم شرطة عند بتاع التسالي
> او ندفع دمغة دعم الوطن ليتحلل زول تاني
> او نسدد رسوم رفاهية لما نجي ندفن زول قنع شال رفات قلبو الحرق وشتت
> والينا
> ختوا الكورة واطة وحنوا علينا
> المهم
> الاندية بدت الاعداد والاستعداد
> فيها السافر بره البلد
> وفيها الما سافر لسه
> وفيها الما قادر يسافر
> لكن
> لو كورة الاندية زي كورة الحكومة كلها فوق
> حقوا نجمد الموسم ده يا والينا
> لو شرطي المرور دخل عشرة عربات الحوش في اليوم
> يبقى دخل قريب عشرة مليون للحكومة في اليوم
> بدخل كم شرطي المرور من يتعين و لما يطلع معاش ؟؟؟؟؟؟
> بالمناسبة
> الترخيص شغال بالليل
> ولما مشينا بالليل
> لقينا ايصال جديد بي خمسة وسبعين الف جنيه
> ليه ؟؟؟
> قالوا خدمات
> لا هزة كانون ولا موية ليمون
> خدمات في شنو ما عارف!!!!
> ختوا الكورة واطة يا والينا
> وحنوا مرة واحدة علينا
> خدمات دي كلمة ساي ولا واقع ؟؟؟؟
> طفيشكم ده ما سمح
> طفيشكم شنه كورتكم وقلل جمهوركم
> بكرة تنزلوا الميدان
> تلقوا الجماهير قاطعتكم
> ختوا الكورة واطة يا والينا
> ومرة واحدة حنوا علينا
> خدمات قال
> ايها الناس
> إن تنصروا الله ينصركم
> اقسم بالله العظيم وكتابه الكريم
> إن تنصروا الله ينصركم
سلك كهربا
ننساك كيف وزمان في الليق عندنا كوتش بقول  لينا طفيشكم ده بطفشكم
والى لقاء
سلك