العيكورة، اما وقد قلتها يا جبريل فاسمع مني !
بقلم/ صبري محمد علي (العيكورة)
قرأت قبل قليل الجزء الاول من اللقاء الذى اجراه الزميل محمد جمال قندول بصحيفة الانتباهة مع السيد وزير المالية الدكتور جبريل ابراهيم وساركز على نقاط ثلاثه فقط من هذا اللقاء وهى ….
اولها(عمنا جبريل) ما زال موقن تماما ان الاقتصاد فى تعاف وان مؤشر التضخم فى انخفاض !!
واعتقد هذه مصيبتنا ان تتالم امام الدكتور والدكتور يهبش ويقول ليك انت كويس! يا دكتور ياعمك تضخم شنو؟ ومؤشر شنو؟ يا سيدي ناس عثمان ود حاج اللمين الضو ما بفهموا ليك فى الكلام ده
تضخم شنو و رغيفتك ب (….) جنية(ضع اى رقم عزيزي القارئ) .
عمنا جبريل قال من مبشرات التعافي ان هناك انخفاض فى اسعار المحروقات حسب السعر العالمي
(ياشيخ) …. !
(اللتر) بدولار ونصف وتسميه تعافى (حسب السعر العالمي) فكدى بالله راجع المعلومة دي
الحاجة التانية ….
حكاية (بوكسي) ولد اخوه وان كان قد امسكنا عن الحديث عنه فى مقال سابق وقلنا و ماذا عن بكاسي (الخال) الالف وثلاثمائة بوكسي البوكسي ينطح البوكسي ولكنه طالما وقد قالها (عم الولد) فنعتبره اعترافا رغم انه كان اقبح من الذنب .
قول لى كيف ؟
عمنا جبريل طوف بنا كما الاخرين من حملة السلاح من ان اتفاقية سلام جوبا (تسمح) بمثل هذه الاستثناءات للموقعين على (مصيبة سلام جوبا) لكن السيد الوزير قال (الكلام ده ما مكتوب) واردف عشان مافى زول يقول جبتوه من وين ؟ بل (قال ليك) قد تمت (تفاهمات) !! فهمت على
(بالله دى ما بتبلعك علبة حبوب الضغط كلها)؟
يعني الجماعة اثناء المفاوضات قالوا الكلام ده ما تكتبوه وحا نتصرف بعدين (واهو) براكم شايفين البكاسي بالمئات والحاويات الماخمج و … و…. يعني يا اهل السودان هذه الاتفاقية منها السر و الجهر والماعجبو يضرب راسو بالحيطة
ثالث حاجة ….
السيد الوزير فى سؤاله عن دعم المجتمع الدولي لاتفاقية السلام قال (ولاااااا دولار) واحد لم نستلمه وان المجتمع لم يوف بعد قرارات (٢٥) اكتوبر (طبعا ما حا يقول انقلاب) !
طيب يا شيخنا ….
ولدنا مبارك اردول ما قال قبل يومين انه باع دهب بمليار ودقداق دولار بل وباهى بانه قفز بمبيوعاته هذا العام لثلاثمائة مليون دولار زيادة عن العام الماضي . اهاا المليار وشوية ده خليهو .
طيب ياااااا السيد جبريل ….
(حق) صادر الثروة الحيوانية وينو؟ شوية البترول البتسرسر ديك وينو حقها ايرادات الجمارك والضرائب الخلت الناس ماشة (ام فكو) وينو حقها . باقى الدهب المابغباك بدخل الميزانية واللا (فووو) بالطيارات؟
جبريل ده لسه فى حاجات كتييره ما حسبناها ياخ الهواء ده ومجالنا الجوي دخلو وينو ؟
وبعد ده السيد الوزير (يقول ليك) الانسان محتاج يتجه للانتاج هو وينو الانسان ياعمك ؟ و بالله اعفاءتكم دى والبلد المليتوها حديد وهكر دى فى تانى زول بشتغل ما بااااردة سمسرة وبيع والاعفاءات دى خليها (علي انا)
مش ده الحاصل ياجماعة؟
غايتو ننتظر القسم الاخر من المقابلة عشان نشوف (الورم) الباقى شنو؟
عمنا جبريل ياخ انت ما مستهدف لانك حركة مسلحة ولا مستهدف لانك وزير ولا عشان بوكسي ود اخوك انت مستهدف وستظل مستهدفا لانك ما (ناقش حاجة) ! ماسك البلدي زى جردل اللقيمات هاك ياولد … وانتا زح بعيد ما اديناك قبيل .
ياجماعة دى دولة دى ما شركة .
قبل ما انسي: —-
سعادة الفريق البرهان سمعت براااك وزير ماليتك قال ليك التوافق التام من المستحيلات دحين آآ اخوي نجض شغلتك
