خطأ طبي

في السلك 

*ماحدث للمريخ إفريقياً كان لخطأ طبي شنيع وفظيع.
*والأخطاء الطبية شائعة ومعروفة.
*لاتسلب الطبيب المخطيء وصف طبيب.
*ولكنها تخصم من رصيده المهني وتحسب عليه.
*وهي أيضاً لا تعطي الحق العامة بوصف الطبيب المخطيء بالبليد.
*فالراجل مهما كان طبيب تأهل لذلك الوصف جامعياً.
*الأمر الذي لايجعل للعامة والهامة الحق في التقليل من المقدرة الطبية للطبيب المخطيء.
*ولكنها أيضاً لاتشكل ساتراً له من النقد والإنتقاد.
*لزم المريخ سرير المرض بعنبر التمهيدي لخطأ طبي.
*كان المريخ يستعد للخروج من العنبر مستشفياً وصحيحاً وقوياً.
*لملم حاجاتو ووزع أهله الحلوى.
*منها وطالع الطبيب المعالج داير يتفولح رقدو جوار دقلها البتلولح في عنبر التمهيدي من جديد ولمدة عام حتى يشفى من أثر الوصفة الطبية الخاطئة التي تناولها بأمر الطبيب المختص قبل خمسة دقائق من مغادرته للعنبر اللعين.
*هذا بالطبع ماحدث للمريخ.
*فالإختصاصي المشرف الصديق إبراهومة إنفعل من الشفاء وانشغل بالحلوى والإحتفال وكتب آخر الروشتات مرتكباً فيها خطاءً طبياً شنيعاً هدم به كل مجهودات العلاج المقدرة التي قام بها مشكوراً.
*معقولة ياديسكو زول غالب تلاتة للدقيقة تسعين ومتأهل ومبسوط يقوم يدخل مهاجمين؟
*هل كنا في حاجة لأهداف؟
*مدرب الجزائر دفع بمهاجمين بعد خراب مالطته عسى بل لعل.
*فدفع ديسكونا بتيري.
*وكانت العسى وتبعتها اللعل.
*ورجعنا للعنبر بعد خرجونا منو.
*محاورك ياديسكو أضعف خطوطك كانو.
*أمير عمرو مانجح كمحور.
*وأنت أصريت عليه كمحور ضارباً بتجارب من سبقوك عرض الحائط .
*وود الرشيد بعيد وماقصر لكنه قطع.
*بعد الهدف التاني ست الشاي الجمبي على المدرجات الشعبية قالت لي بعد ده يدخل الصيني ويلعب بتلاتة محاور وإذا في طريقة زيادة يكثف الوسط بالتاج يعقوب لأنو السماني مابرجع يساعد بيبو الضعيف دفاعياً.
*ويخلي بكري براهو في الهجوم للمرتدات.
*والتش مابطلع لو يرقد في نقالتو جوه الميدان طالما الناس ديل خايفين منو.
*يجمد الكورة ويحصل على مخالفات تكسر الزمن وتعلن تأهل المريخ.
*دي ست الشاي.
*لكنه الخطأ الطبي.
*ابراهومة خبير وشاطر وإبن المريخ وعمل في ظروف قاسية ماقلنا شيء
*لكن إن كنا نحب ابراهومة حقو نبصروا بأخطائه ليستفيد منها.
*نفس الإندفاع والفريق متأهل ويخسر في اللحظات الأخيرة حصل للديسكو مع هلال الأبيض.
*أيها الناس
*في عهد كروجر تعادلنا مع خريبة بهدفين في بلدو.
*في الإياب بأمدرمان احتشد الشفوت داخل الإستاد زي علبة الساردين ممنين الأنفس بتسعة أهداف مريخية.
*الكورة إنتهت صفر صفر.
*الإعلام ماخلى لكروجر جمبة ينوم عليها.
*والجماهير خرجت مستاءة.
*ولكن كان لكروجر رأي آخر.
*أنا متأهل من المغرب.
*أحافظ على تأهلي ذلك أفضل من المخاطرة بالسعي لنصر لايزيد من وصف تأهلي شيئاً وقد تقودني تلك المخاطرة لفقدان التأهل.
*فمثلما هم أخطأوا في بلدهم وأحرزنا هدفين.
*يمكن بالإندفاع أن نخطيء نحن ويحرزوا هم الهدفين على أرضنا ويضيع تأهلنا الذي عدنا به من المغرب نتيجة الإندفاع والطمع .
*قام بيخ ليهم الكورة جنس بياخة.
*إنها حسابات كرة القدم ياعزيزي الديسكو.
*لذا كان الخطأ الطبي.
*أيها الناس
*البعض ينادي بأن نقرع الواقفات ونخلي الجفلن.
*الواقفات مابنقرعن.
*الواقفات الوداد المغربي الخطير.
*وأخطر مافيه الطرف الأيمن.
*القصاد بيبو.
*ومحمود أمبده قاعد بره.
*الأسهل نرجع الجفلن يا أخوي.
*الواقفات مابنقرعن.
*أيها الناس
*أتابع جميع القروبات.
*الذين كانوا ينتقدون زولفاني حتى وهو منتصر.
*لم يفتح الله عليهم ببنت شفه عند لزومنا عنبر التمهيدي ٢٠١٩
*عارفين ليه؟.
*لأنو غالبيتنا تمارس عشق المريخ بالخيار والفقوس.
*إن كنت منهم أنت من الخيار والأشراف ومنزه.
*وأنت كنت غير ذلك فأنت فقوس ساي.
*لذا تضيع في غالب الأحيان كلمة الحق التي يحتاجها المريخ
*المهم .
*روح الثورة وأدبها كانا حضوراً داخل الإستاد وسط صور الشهداء وعبارات الثناء والإعتراف لهم بالجميل.
*وسلوك الثورة كان يشكل أدبنا الجديد على صفحة شعب الهلال التي تمنت الفوز للمريخ وطالبت بالمساندة.
*إنه السودان الجديد .
*المهم
*سوداكال أي كلمة عندو بتبدأ بي حا
*وحدو (الحا ) دي
*حا أدفع
*حا أجيب
*حا أبني
*حا استثمر
*ولايدري سوداكال إن (حا) دي ضيعت البشير.
*بحاحي تلتين سنة لما الرغيفة وصلت الف جنيه والدولار وصل تمنين الف.
*بعد داك (حا) ماشفعت ليهو.
*بي طريقتك دي يا آدم مابقول ليك (حا) نشيلك.
*لكن (حا) دي براها بتشيلك.
*المهم
*روشا فرحان لخروجنا الإفريقي
*طبعاً الصفراب لا يفرحهم إلا خروج المريخ.
*لأن صفرهم يلازمهم أينما حلو.
*ولو كانت القرعة بترمينا مع دكان أسبورت الرواندي أو الاتصالات الجيبوتي أو زين التشادي أو أريبا بتاع إفريقيا الوسطى.
*صدقني لو ماجينا الميدان مابنطير.
*أفرح بولد طايع الموريتاني.
*ففي منتصف الطريق في ترجي خمسات والمغاربة ستات
*وستظهر البشتنة ورقاد الواطة من جديد .
*ماشفت الثوار طالبوا حمدوك يشوف ليهم طريقة مع الجريف رقدات وانبراشات.
*أيها الناس
*الثورة مستمرة
*وهاهم شباب المدنية
*بانت والعباسية
*يعيدون للشارع ألقه بالبناء والتعمير بعد أن بسطوا عليه بطولاتهم وتضحياتهم وقدموا له شهدائهم الذين كتبوا بدمائهم على الشارع حرية سلام وعدالة.
*وبالمناسبة دي.
*لو كل شباب الثورة.
*ردم البلاليع والحفر كل في حيه
*وعملوا على تفريغ المياه الراكضة.
*وحاولوا إعادة فتح الخيران والمجاري
*موش بتكون حرب مقدرة على (الضبان) المالي السودان والباعوض العذب الإنسان؟.
*إذا كانت الثورة لسة مستمرة.
*يبقى الحاجات دي تتعمل بسرعة ونحافظ على الانجاز
*الحلة ماكبيرة على شبابها
*المهم
*قالوا الفريق اللعب مع الهلال أمس اسم ماعندو
*حظوظ غريبة
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا
*ده شنو البحصل في بورتسودان بين أهالينا؟
*لاقبلية لاهمجية لاتبعية شعارات لينا
*يبقى الناس دي تفهم ياوالينا
*دايرين نبني وطن ومافي زمن لدينا
سلك كهربا
ننساك كيف والكلب قال الخطأ الطبي عادي جداً…بس نستفيد منو
وإلى لقاء.
سلك

اضغط هنا للانضمام لمجموعات الانتباهة على تطبيق واتساب
زر الذهاب إلى الأعلى