إسهالات هوائية

بابكر سلك
* ما بنقدر نخلي موضوع السلوك إطلاقاً.
* لأن الثورة سلوك يجب ان نتحلى به.
* لا يمكن ولا يستقيم عقلاً ولا منطقاً.
* ان يختلف سعر نفس السلعة المصنوعة في نفس المصنع ونفس تاريخ الانتاج ونفس الكمية.
* ان يختلف سعرها بين بقالتين متجاورتين.
* نحنا حكاية سعر الصابونة في الخرطوم ارخص من سعرها في نيالا وعطبرة وكوستي عشان الترحيل دي حكاية ما راكبة رأسنا ده.
* وما بتحصل في كل العالم الا في وطننا ده.
* الذي تترك فيه السلطات مسألة التسعير لابشع التجار وافظع مجرمي الحرب.
* فالتلاعب بقوت الناس وخدماتهم يشكل جرائم طالما المواطن يحارب الحياة يومياً بل لحظياً.
* ياخ خلي العالم.
* مصر القريبة دي.
* مصر بت ام مصر دي.
* السلعة في القاهرة والاسكندرية والاسماعيلية واسوان كلها تتفق في السعر تماماً.
* وتجبر الدول عادة التجار على وضع ديباجة للسعر على كل سلعة لوحدها ظاهرة ومقروءة.
* لانها دول تحترم مواطنها وتحميه.
* بل تضع اشد العقوبات على من يخالف امر وضع ديباجة السعر التي تحمى المواطن المسكين من جشع الذين يتسابقون على مص دمه الطاهر.
* حمدوك.
* ايها الزول.
* احترمونا واحمونا وحافظوا على ما تبقى من دمائنا التي سفك اغلاها عند فض الاعتصام.
* ومصمص الباعوض احلاها في غفلة من السلطة.
* ايها الناس.
* واحد شفت كتب.
* حمدوك والهلال يمثلان السودان خارجياً ودولياً.
* وليهو حق.
* لانو حمدوك من امريكا اسي مشي فرنسا.
*والهلال من التمهيدي ومشى المجموعات.
* فالمباراة كانت ضد انيميا النيجيري وليست ضد انيمبا.
* ولكن ذلك لا ينفي حقيقة وجود الهلال بالمجموعات الآن.
* وصعدت فرق ذات مستويات تجعل العزاء في القول المأثور.
* قد ينعم البعض بالبلوى وان عظمت (ديل نحنا الطرنا قبال نلاقي صن داونز).
* وقد يبتلي الله بعض القوم بالنعم (ديل الجماعة الدخلوا المجموعات الفيها صن داونز).
* وتقول التقارير الواردة من الكاف.
* ان اجواء القرعة خريفية.
* وان جميع العرسان يتمنون فتحية.
* ايامك يا فتحية.
* مرغوووووبة. * بس أريتك تفكي البورة.
* لكن ولادة بعد ده. * الله اعلم.
* فقد بلغ العمر عتيا.
* غايتو الاكثار من الدعاء بتاع اللهم لا تذرني فردا.
* كان ربنا قال آمين ممكن.
* نرجع لموضوع سلوك الثورة.
* ناس تموت شان خاطر بلد.
* وناس تتاجر بالدولار عز النهار وسط البلد.
* التاتشرات الكتلت الاولاد والبنات عز النهار مشت وين؟
* ما تجي تدور بلي في الناس البتدور في اقتصادنا يوماتي ويبيعوا العملة.
* تكاثروا شديد الجماعة ديل.
* اقتلوهم قبل ان يتكاثروا اكتر.
* المهم.
* انباء اصابة اهلنا بالنيل الازرق بالاسهالات المائية تحزننا.
* والجهود الحاصلة شعبياً وطوعياً ورسمياً تفرحنا.
* لكن همتكم اكتر.
* ايها الناس.
* ان تنصروا الله ينصركم.
* أها.
* نجي لي شمارات والي الخرتوم.
* كان شفت يا والينا.
* وفي ناس في الخرطوم.
* لما سمعوا بالاسهالات المائية جاتهم اسهالات هوائية.
سلك كهربا
ننساك كيف والكلب قال: التطعيم ضد الإسهالات الهوائية ضروري لأنو صن داونز ده صعب.
والى لقاء.
سلك

اضغط هنا للانضمام لمجموعات الانتباهة على تطبيق واتساب

مقالات ذات صلة

Do NOT follow this link or you will be banned from the site!
إغلاق