لا دايرة حمدوك ولا دايرة جوك يا جوك

بابكر سلك
* ثرنا لمن فترنا.
*وما كتير عليك يا وطن.
*ندرك تماماً ان ما أفسده الجماعة دهراً لا يصلحه حمدوك في شهر او سنة.
*ونعي تماماً ان كثيراً من الامور تحتاج لوقت طويل كي نطبب جراح الوطن العميقة التي نخرها فساد عهد بلغ من العمر ثلاثين سنة.
*لكن كمان في حاجات لا دايره حمدوك ولا دايره تردد وجوك جوك ياجوك.
* قصة سلوكنا الما بشبه الثورة في شيء.
* قصة استقلال بعضنا لبعضنا في وضح النهار.
* بدت من الشهداء صابرين على عشرة.
* ومرت بمرحلة صابرين على خمسطاشر.
*فكانت صابرين على خمسة وعشرين.
* ونركب ونحنا صابرين.
* صابرين لي شنو وعشان شنو؟
* وليه نسكت على استقلال يؤدي لاستفحال ازماتنا يومياً؟
* ازمة المواصلات لا سبب منطقي لها يبررها غير الطمع والفوضى.
* طمع اصحاب الحافلات الذي مكنهم من رقاب الناس.
* فصار الواحد فيهم لي الساعة اتنين الضهر بكون صفي اتنين مليون جنيه.
* تاني شغال لي شنو؟
* وما يصفيها ليه مدام صابرين على خمسة وعشرين واللفة على كيف سواق الهايس والحاج يوسف على الله!
* في حاجات الصبر ما بنفع معاها.
* دايرة تدخل من حكومة الثورة سريع وناجع يبتر كل اشكال الرجعية والاستقلالية.
* الثورة حقتنا والحكومة حكومتنا والدولة دولتنا.
* يبقى على حكومتنا ان تتدخل بسرعة لتنزل شعارات ثورتنا على ارض الواقع لتحمي دولتنا من الانتهازيين والطفيليين الذين يستغلون الناس.
* قصة المواصلات دي تحتاج لغرفة عمل تحصي عدد المركبات وتدون خطوط عملها كي تعرف اي خط فيهو كم عربية ويحتاج لكم.
* حتى الحافلات الملاكي التي تعمل في النقل ما على كيفها.
* يتحدد لكل حافلة خط محدد.
* ثم تعريفة محددة تحمي المواطن المسكين.
*ومع التعريفة يجب انشاء غرفة اخرى تعنى باسعار السلع.
* الفاسدون عندما حرروا الاسعار استعبدوا الناس.
*وده كان الهدف من تحرير الأسعار.
* فهل تقبل حكومتنا بمواطنها عبداً لرغبات الجشعين من التجار والمستغلين من اصحاب الهايسات فينا على كيفن؟
* يبقى نعمل غرفة لتنظيم وتنسيق ومراقبة عمل الحافلات.
*حتى الركشات تحتاج لذلك.
* لأن مشوار الركشة استغلالاً اصبح اقرب لضعف نفس المشوار بترحال.
* عادي جداً بتاع الركشة ام بستم واحد وجالون بنزين يحومها اليوم كلو.
* يقول ليك من هنا لي هنا بي ميتين الف جنيه.
* اذن قبل ان يفلت العيار اكثر.
* حقو حكومة الثورة تنشئ الغرفة دي وتراقب وتنسق وتسعر اكراماً للمواطن.
* ولا بد لحكومة الثورة ان تنشئ جهة تختص بتحديد الاسعار ومراقبتها واعلان الاسعار للمواطن.
* ولن تنجح غرفة النقل ولا غرفة الاسعار الا اذا كان جزاء المخالفة لاحكامها جزاءً قاسياً وحاسماً
* فاذا بعضنا لا يريد ان يتربى بالذوق.
* يتربى بالقانون لصالح الجماعة.
* كفانا فوضى وغفلة واستهتاراً بالمواطن.
* المهم.
* اقول لمن قالوا انه كفر وزيرة رياضتنا بسبب دوري الجكس لكرة القدم.
* اقول له جكس السعودية في الميدان يا حميدان.
*يلا كفر الملك سلمان لو كنت مان.
* مع العلم.
* بأن كرة القدم النسائية تم وضع لبناتها الاولى في عهد دولة الاسلام ايام حكم رضوان الله عليهم القاعدين اسي هناك.
*حتى الدين الكيل فيه بمكيالين؟
* ويل للمطففين.
* ايها الناس. * بعد طرنا عربياً.
* اتفرغنا للاستمتاع ببطولة اوروبا للاندية.
*وستكون متعتنا الكبرى في مجموعة ناس روشا.
* وبهذه المناسبة نحيي الذكرى المازمبية.
* فقد مرت علينا يوم اربعة اكتوبر.
* ايها الناس.
* ان تنصروا الله ينصركم.
* أها.
* نجي لي شمارات والي الخرتوم
* كان شفت يا والينا.
* على خمسة وعشرين من الشهداء لي صابرينا.
* في تدخل من جنابكم ولا سايبنهم يطيحوا فينا.
سلك كهربا
ننساك كيف والكلب قال: بالطريقة دي يوم حا نسمع الآخرة على كيفك اركب يا مستعجل.
وإلى لقاء.
سلك

اضغط هنا للانضمام لمجموعات الانتباهة على تطبيق واتساب

مقالات ذات صلة

Do NOT follow this link or you will be banned from the site!
إغلاق