العيكورة: ياخ لكن شغل نضيف

بقلم/صبري محمد علي (العيكورة)

خاص ب [الانتباهة] تعرف يا (عب باسط) ..
لمن الواحد يكون فاااطر كده ويادوب ختا ليك كباية الشاهي الحاار بعد اخر رشفة فى الواطة وطلع كيسو وقعد يدردم في (السفة) بتاعتو والتلفزيون القومي قدامو شغال ليك اناشيد وبطولات عسكرية واخبار من النوع بتاعت (لم ينجو احد ديك) !
شفتا الوكت داك …
الواحد بكون متكيف كيف وهو يزاحم جيشو الكتف بالكتف واقلاااها بكفكف يد جلابيتو لمن يشوف ليك طيارة ناقداهم ليك (ككف وجع) !

ياخ الجيش ده حيرنا عديل خليهم الامريكان نحن زاتنا علي الطلاق خلانا نآمن بالشغل ونعرف النور ده زاااتو بطفوه كيفن !
اكتر حاجة مكيفاني …..
تصريحات القائد البرهان (حفظه الله وابقاهو) ذخرا لهذا الوطن .
الزول ده …
يتصلوا عليهو (مش عارف) الامريكان واللا العرب واللا غيرهم …
يا سعاتك ….
عاوزين هدنه
يقوليهم و مالو ؟ موافقين ويديهم كلمتين تلاته من النوع البنعس داك عن المساعدات الانسانية وكده واصبعو على الزناد
بس جماعتك …
القعدوا يسرقوا في غنم الناس من الجوع دقائق بس يخرقوها !
لانهم اصلا ليس لديهم تواصل مع قيادتهم (ان وجدت حية) ولافين ساكت
فاااا
كباشي طوالي يقول للبرهان ومعاها ضحكة كده
(ياريس براك شفتا)
والحكاية تاني تدور ومن مجاميعو .. يعني باختصار كده الجيش تفاهم تف العيش والشريف مبسوط منه وماوعنده اي مشكلة مع العاام الخارجي
حرفية واقتدار وجسارة اذهلت الامريكان من اول يوم ولم يخفوها .
يعني الجماعة القالوا إما الاطاري او الحرب يبحثون الان عن ايقاف الحرب !!

والمكيفني اكتر كمان ….
ان الحياة بدأت تعود لطبيعتها بالخرطوم من غير بيان (واللا بتاع) الاسواق فتحت والجماعة ناس صينية المنارة اليوم بام درمان شالوا فطورهم
يا (سيد اللمنتي ليك)
وفطروا تب مع قواتهم المسلحة في الشارع و (لايفات) ستات الشاهي والخدار والجزارين والمواصلات ما تديك الدرب
اها (فهمت يا دعمامي) !
واللا ازيدك؟
فاحسن ليك يا ابني تسلم وتلملم باقى العمر شيلو بدلا من تشيلو ليك (ساخوي) واللا مصيبة من مصائب قواتنا المسلحة الباسلة

(حقيقتن)
لا ارى داع لاذاعة بيان يبشر بدحر التمرد اصصصلا
لان الشعب هو من قرر ذلك والموضوع اصبح واقعا معاشا منذ اليوم الرابع بس منتظرين (المزيكا) للعرضة بتاعة (سودانية سود)
ياخ الاغنية دي انا بتسيح ركبي عديييل .

قبل ما انسي …
بالامس ارسلت (مقطع فيديو) للشيوعي الرشيد سعيد وكيل وزارة اعلام حكومة حمدوك وهو (مشتت) ضمن الرعايا الفرنسيين .
ارسلت المقطع لاحدى السيدات الفضليات التي تتابع ما نكتب
فكان تعليقها …
(اجي يا الرشيد) !!
تفتكروا …
لو ارسلت لها صورة عمر قمر الدولة وزير الخارجية المكلف لحكومة حمدوك وكاتب العقوبات علي السودان التى قال انه لن يعتذر عنها وهو ببورتسودان ينتظر الاجلاء مع الامريكان
فماذا كانت ستقول
(أجي يا …..) !

غايتو الرجالة تطير !