العيكورة: قلنا ليكم الجيش ما تلعبوا معاهو …!
بقلم/صبري محمد علي (العيكورة)
خاص ب [الانتباهة]
تعرف يا (عب باسط) ….
كلما الواحد يقول خلاص بلاش كتابة ننتظر ( جرة الخمسين) و إعلان القوات المسلحة لكرنفال الفرح عشان نكتب بالقلم التاني
الجماعة ديل يحيروك ….
الجيش الجيش ياخ البارح عمليات ام درمان ، شمال بحري ومش عارف العملية النوعية بحي المطار والاخيرة دي كمان
كلام تاني (خااالس)
قال ليك الحكاية كان فيها حفر نفق عديييل !
انا غايتو فهمت يادوووب كلام البرهان بتاع الحفر بالابرة القالوا يوم داك . بعد حكاية النفق دي
طيب …
ما جرت عليه العادة وعلى امتداد تاريخ قواتنا المسلحة الباسلة ان انتصاراتها كانت تأتي للشعب كاخبار بعد تحقيقها فيحتفل الشعب دون ان يعايش الحرب .
ولكن هذه الامرة …
ولربما لاول مرة ان يخوض حرب فرضت عليه وسط مواطنية بهذه المهنية العالية والتصويب الدقيق والنفس الطويل
ياخي (لي يوم الليلة ده) العالم مذهول من جدارة سلاح الجو السوداني
ياخ …
حتى الامريكان قالوا لم نكن نتوقع ان هناك جيشا بافريقيا بهذه المهنية والاقتدار
خليهم الامريكان ياخ …
(علي الجزيمة)
المصريين لغاية هسي ما مصدقين البشوفو فيهو اليومين ديل !
(فاااا) كمان …
على الصعيد الداخلي من بركات هذه الخطوة (المباركة) ان الشعب السوداني قد فهم جيدا و(جدا) كمان
ماذا يعني الوطن ؟ وماذا يعني ان تصبح مشردا بلا مأوى
و ماذا يعني الجيش للوطن و كيف يكون الوطن بلا جيش !
مااا تعاين لي ….
(ما كانوا في جماعة مخمومين ساكت) طيلة السنوات الاربع العجاف من سواقة الدقداق
لا …
وهم ما كان قطيع ساكت . ده قطيع مشكل من مجاميعو من غير تفصيل ياخ لدرجة تلقى واحد عمك كبييير شايل عمته يقول ليك (معليش معليش ما عندنا جيش) تصور !
ولكن الحمد لله رب ضارة نافعة
الجماعة شافوا دق العيش
كذلك ….
وحدت هذه الحرب كل قطاعات الشعب خلف جيشه واثبت الشعب انه يستحق ان يكون له جيش فى مقام عزة و كرامة هذا الوطن الابي فلم تمنعه قعقعة السلاح وازيز الطائرات ان يخرج مؤاذرا يحمل الطعام والشراب لقواته المسلحة .
وايضا من البركات ….
(آمن من في السودان كلهم اجمعين) ان ….
سعادة الفريق البرهان (حفظه الله وابقاهو) ومن معه من قادة الجيش ناس ما ساهلين وكانوا عارفين بعملوا في شنو ورجال يؤتمنوا على تراب هذا الوطن
وبرضو كمان عرفنا ….
ان الجيش كلامو دقيق ويعي ما يقول جيدا وهذه نهديها لجماعة (التفكيك وكده) وناس كدايس السفارة واتمني ان يكونوا فهموا (النور بطفوه كيفن)
بصراحة اتوقع …..
جدا ان يخرج الشعب قريبا في مسيرات عارمة لتفويض الجيش بإستلام السلطة
(كااااملتن) ….
ولمدة عامين وبالحكومة التي يرتضيها حتى يصل بهذا الوطن لصناديق الاقتراع يختار فيها الشعب من يحكمة .
اعتقد كفاية …
مزايده على الوطن وكفاية سماسرة وارذقية سفارات وكفاية عملاء ومندسين وتافهين ومخنسين كفاية جبناء بكى احدهم بالامس القريب عند سلم احدي الطائرات كما الطفل عندما اوقفه احد الضباط ومنعه من الصعود .
فقد هربوا ….
بجوازاتهم كما كتبنا كثيرا نرسم هذا السيناريو المتوقع ولكن حسنا انها (جاطت لتصفو) و (إستعدلت) والجيل هو ذات الجيل والمخمومين هم ذات المخمومين والراكزين هم ذاتهم وجاءت
لتتمايز الصفوف وليعلمن الله الذين صدقوا وليعلمن الكاذبين
ونكتبها ب(البونض) العريض
اقدل يافرح
وابشر يا وطن
فقد افشل جيش السودان المخطط .
ولا نامت اعيد الجبناء والعملاء والخونة …!
