العيكورة: شغل نضيف يا عمك
بقلم/صبري محمد علي (العيكورة)
خاص ب [الانتباهة]
بيان الناطق الرسمي للقوات المسلحةاليوم السبت جاء مغايرا لسابقاته من البيانات وكأنه يعلن نهاية الحرب من غير ان يصرح بها . و بدأ لي انه يرسم الخطوات الحاسم القادمة التي ستتم .
(قول لي كيفن)
اقول ليك يا صاحبي
البيان افتتح بان قواتنا تعمل طبقا لما هو مخطط وتؤدي مهامها بثبات وثقة ويخوض ابناؤها معركة الكرامة الوطنية برجولة وشرف .
دي كده إفتتاحية كده على الريق تعني ان الموضوع ما فوضى ساكت
لكن اصبر لي الغريق قدام
ومضى البيان ليقول …
التآمر كان كبيرا وخططت له جهات في الداخل والخارج !
يعني شنو يا عب باسط ؟
يعني في موسم حلاقة بلا موية قادم في الطريق .
طيب …
وقال ولكن تكسرت حلقات هذه المؤامرة تحت وطأة صمود وثبات رجال القوات المسلحة
وما جرى احباطة خلال الاسبوعين الماضيين كانت محاولة فاشلة للاستيلاء على الحكم بقوة التمرد وغطاء سياسي كامل هو حقيقة كان اختطافا للدولة السودانية بكل تاريخها لصالح حكم شخص واحد ..
(والله يا جماعة) ..
الكلام الدغري ده انا قاعد يخليني ارجف عديل من الحماس .
بالطبع …
المتابع لخطابات السيد القائد قبل ١٥ ابريل يجد فيه شوية نبرة مصالحة و مهادنة والنفس البارد لكن البيان ده جابا من الاخر
(إختطاف الدولة السودانية)
قال ليك .
ثم مضى البيان ليقول
هذه المعركة
ليس فيها مجال للحياد ! وستنجلي قريبا بالنصر لصالح الدولة السودانية ومؤسساتها
يعني ياناس (لا للحرب) فتحوا عينكم كويس وبلاش الكلام الخايب ده ونحن عارفين بنعمل في شنو .
قال ….
وستأتي لحظة حساب كل مخذل ومرجف باع قضية الوطن مقابل التكسب الرخيص !
(لاحظ انا لغاية هنا ما جبت سيرة دولارت ولا شقق ولا بكاسي)
(فااا) …
قال ليك وسيلفظهم الشعب .
يعني يا عب باسط …
ده حساب تاني غير بتاع (الزيانة بالموس الميته)
مخير الله …!!
ومضى البيان مخاطبا ….
ناس (الاحوال تسوء يوما بعد يوم بالخرطوم) كذبا … فقال (خلي بالك معاي)
بعض القنوات الفضائية اسفرت عن وجهها الحقيقي المعادي للقوات المسلحة ومن حسنات الازمات تمايز الصفوف
(بمعنى إنو) ….
البركاوي في الطريق والمراسلين القاشرين ونضااااف يقدلو في الخرطوم لا سترة لاخوذة واقية من الرصاص وبعد ده يقول ليك انقل لكم الحدث تحت تساقط الرصاص وان الخرطوم غير آمنه !
شفتا النوعية دي ؟
انا عارف بدقوها وين لكن ما بقدر اكتبها . وغايتو (الله يقويهم على الراجيهم) وكلو بالقانووون
وبيان اليوم قال …
(لن) ولن دي شنو ياناس قواعد اللغة العربية ؟
هي لن النافية لاي مصيبة تأتي بعدها
لن يتنازل الجيش عن هدف المحافظة على كيان الدولة السودانية وتخليص البلاد من حالة الاستهبال السياسي وخداع الناس بالشعارات الكذوب .
ايواااا
شايف ليك اطاري هنا يا عب باسط واللا قحت واحد واللا اتنين واللا كديسة سفارات حايمة هنا واللا كلاب سلطة بتتحاوم بي هنا؟
اظن الفقرة لخصت المشهد القادم
(ينصر دينك) سعادة العميد نبيل ياخ
قبل ما انسى …
انا المواطن صبري محمد علي وبكامل قواي العقلية والذهنية
افوض الجيش بقيادة الفريق البرهان (حفظهو الله وابقاهو) بإكمال ما تبقى من الفترة الانتقالية (كاملتن) و تشكيل حكومة تسيير مهام من من يرتضيهم الجيش من كفاءات هذا الوطن تحت سيادة مجلس عسكري
(خريج الكلية الحربية السودانية)
بالكااامل …. فهمتا علي؟
يمثل سيادة الوطن لمدة عامين تنتهي بالسودانيين الى صناديق الاقتراع .
والحشاش بعمل شنو؟
