ضآءت ليالينا وعم الفرح لينا

خاص بـ [الانتباهة]
بعد العمليتين الكبيرتين بالامس حق للشعب السوداني ان يستعد لمظاهر الاحتفال بالنصر الاكبر خلف قواته المسلحة
وانا بقول ليكم ….
اي زول عندو دلوكة واللا نحاس واللا نوبة واللا كان مندلين يجهز الحاجة بتاعتو
وخليني لغاية الوكت داك
اقول ليك الحاصل شنو …
الحاصل يا صاحبي (بجغم) معسكر طيبة المقر الاهم للمتمردين قد تيتموا (تمامن)
قول لي كيفن؟
هذه المصيبة لم يكن مجرد معسكر على سطح الارض كما يبدو للبسطاء من امثالي ويا ما تحت السواهي دواهي كما يقال
سراديب وانفاق ودهاليز ومخازن تحت الارض !
بنوهن متين والبناهن منو الكلام ده نأجلو شوية وسيكون بالمستندات حتي يعلم الناس حجم المؤامرة
فاااا المهم يا صاحبي …
كانت التاتشرات والمحروقات والامداد بانواعه يطلع من تحت الواطة بتاعت ناس طيبةالحسناب
الجيش عارف !
ما عارف !
الاستخبارات راسمة الكلام ده بقلم الرصاص واللا بقلم الناشف الكلام ده برضو نخليهو لبعد الاحتفال الكبير انشاء الله .

فالتحية لسعادة اللواء (ايوب) وقواته الباسلة على تدمير هذا الشريان الخبيث .
طيب ….
السؤال الطبيعي هو
هل انتهاء الحرب والقضاء على التمرد اصبح وشيكا؟
اقول وبكل ثقة بالله عز وجل ثم في قواتنا المسلحة وهذا الشعب الصامد الصابر
قول (نعم) ….
الحرب الشاملة والنظافة
بدأت؟
اقول بكل تأكيد

والجيش يحيط بالعاصمة؟

اقول ليك نعم جدا
ولااا نملة تستطيع الهروب .

عدة الشغل كلها جاهزة؟
اقول ليك (تمامن)

طيب يا استاذ …
و شوية الدعامة البتحاوموا ديل ؟
اقول ليك ديل كايسين المخارجة وما لاقين ليها طريقة .

علمت مؤخرا ماذا تعني الجملة العسكرية (قوات قطع)
كالتي تحيط بالعاصمة حاليا من جميع الجهات .
فقال ليك دي (معناتا)
يا تملص جوة الخرطوم يا تتبل بره !
(ياخ دي مصيبة شنو الوقعت فيهم دي)؟

فلربما سنرى خلال الساعات القادمة الحكاية دي
إما (ملص) و إما (مسح)
مع اغنية ….
كيف الرجوع لى زول قنع
شايل رماد قلبو الحرق
واللا يطلع لينا واحد من اولانا شعراء الثواني باغنية
(حبيبي املص لي وانا املص ليك) ..

(عقرب مهلب) …
وهذا عنوان اخترته جانبيا ابن خالي الاستاذ مهلب الطيب حقار كان في صغره كثيرا ما تلدغه عقرب عندما يأوي الي فراشه ليلا …!
ولم تستطع الاسرة تحديد من اين تاتي هذه العقرب حتى يقتلوها .
واخيرا اكتشفوا انها تتخذ من حبل (كراب العنقريب) مسكنا لها !

أظن هناك وجه شبه كبير بين مخابئ معسكر طيبة الارضية وبين عنقريب مهلب .

ولكن في النهاية الحمد لله تم العثور عليها و(كتلوها).