إتحاد نقابة الكضابين

خاص ب [الانتباهة]

عزيزي القارئ ….
الكضاب ممكن تلقاهو
زول وجية وممكن تلقاهو زول مخموم وممكن تلقاهو زول دلاهة ساكت .
(فااا)
الوجيه ده غالبا تلقاهو من النوع الذي يستحلب الكلمات استحلابا وينتقي التعابير إنتقاءا ويستخبي خلف عدة الشغل بتاعتو
البدلة الماخمج
والكريمات والمسوح
والعجب كان جابت ليها شوية انقليزي كده
وعبارات (دعني ، اتفق معك ، اخي الكريم)
فالنوع ده زي المنشار (طالع ماكل نازل ماكل)
وديل ياهم كضابين قحت والدعامة اليومين ديل
ناس عزت
ومش عارف انس النور (واااا) اخونا بتاع الجيش زخيرتو كملت داك
وهكذا ….
فهؤلاء الارزقية تلقاهم ….
قابضين من المرحوم وبرضو قابضين من القنوات الفضائية
وطبعا ديل ….
اصصصلا ما عندهم قشة مرة بنجرا ليك عينك عينك
ولا بخجل
انتصرنا
احتلينا اليرموك
نحن ما محتلين منازل المواطنين ولا المستشفيات
وحاجة بالشكل ده
والنوعية دي اصلا عايشة بره وفي امان الله وغالبا تكون حلقات اتصاله ضيقة جدا مع ناس معينين فقط
فيرمي الكضبة زي الما حصل شئ ويزوغ

النوع التاني ….
وهي فئة المخمومين وديل ناس الله ساكت سريعين التاثر بالميديا والفبركات
فااا بقوم المسكين ده ينشرها على حسن نية
ولو قلت ليهو
ياخ الكلام ده غلط
يقول ليك ياخ انا سمعت (حميدتي) باضاني عاوز تغالطني فيهو؟
فهذا النوع لا حظ له في التقانة ولا إعمال الفكر و تمحيص ما تحمله الميديا
ويجب ان توعيتهم فقط إحتسابا للاجر .

اما النوع التالت ….
فهو (الدلاهة) زي الاسمو مين كده عزت مستشار المرحوم فهذا يتفوق على النوع الاول انه لا يملك مقدرات وزن الكضبة واخراجها في قالب معقول للمتلقي
(ودي مشكلة كبيرة جدا طبعا)

مما يوقعه فى كثير من الحرج وهذا النوع ايضا مشهور
بضيق الافق والعجز التام عن الزوغة من زنقات اسئلة الصحفيين .

وانا ما عاوز اكرر قصة الاهبل (عزت) بعد استدراجة من احمد طه (نبًاح) الجزيرة حتى اعترف له كذبا او صدقا (الله اعلم) ان مصر استقبلته رسميا كمستشار للتمرد و …و …..واكدت له انها تقف على مسافة واحده من الجيش والتمرد !

عزيزي متصفح الموبايل ….
استقي معلوماتك من مصادر الدولة الرسمية (اي دولة) ولا تكن اسيرا للميديا فما امثر العواطلية واصحاب الاجندات

ثانيا كن حذراً …
فعندما تقرأ خبر بدايه عااااجل وهااااام ومش عارف ود خالتي قال والزول ده انا بعرفو شخصيا !
فأعلم انه مسترزق و يريد إستغفالك ليلعب بعقلك و يلقمك خبر مصنوع بداخل سم زعاف . فلا تلغي عقلك مهما كان الخبر مجيه من مجاميع الوان الخداع .
مثلا ….
يجيك واحد (ريالتو سايلة) يقول ليك ذخيرة الجيش نفدت !!
يابني …
الجيش منذ ٣٠ عاما لم يستورد رصاصة واحدة بل واصبح المصدر الرئيسي للكثير من الدول في مجال الصناعات الدفاعية وتقانتها .

واللا واحد …
يقول ليك تم احتلال مجمع اليرموك ! ويسبقها ليك ب (عاااجل)
يا بني ….
امريكا واسرائيل بجلالة قدرهما المنحط عجزتا عن تحقيق ذلك .
تقول لي واحد كرعينو ملولاوات احتلاها ؟

(فااا) يا جماعة ….
خلو الجيش يكمل شغلتو ارجوكم ..
وبعدين القصص الجد جد وبالافلام والاعترافات راجياكم
قريب يوم الفرح الاكبر بإذن الله.