البنزين التجاري وريشموند 

> لعل الصمت والتجرد والإخلاص.
> هي مرتكزات العمل بقطاع المراحل السنية بالمريخ.
> ولعل المعسكر الإعدادي ببورتسودان جاء في صمت.
> وتسجيل تسعة لاعبين مهرة بالأشبال ومثلهم بالفئة العمرية الأخرى جاء أيضاً صامتاً.
> وحتى انتظام التمارين وتقوية الصلاة وحسن التربية يتم أيضاً في صمت رهيب.
> ولعل النجاحات الباهرة كانت تعبر عن القطاع بقولها.
> إن في الصمت كلاما.
> الشفوت الصامدون الصامتون.
> بعيدون عن الإعلام والشوفونية.
> لأن الهدف عندهم غير.
> ولكن التاريخ يحفظ لهم حسن الصنيع في صمت مهيب.
> وحقهم علينا أن نرفع لهم القبعات.
> ونرفع عنهم الستار.
> لنثبت لهم الحق الأدبي.
> أنهم فتية صدقوا ماعاهدوا عليه أنفسهم.
> أنهم.
> مكتب تنفيذي قطاع المراحل السنية.
1/جعفر سناده أحمد سند/ رئيساً
2/أنور حمد دياب/ نائب رئيس
3/عوض الأمين الكباشي/ مساعد رئيس
4/نصر الدين عمر الشريفي/ أمين المال
5/هشام عبد الوهاب/ رئيس القطاع رياضي
6/ عمار المغربي / منسق إعلامي
7/أحمد جميل/ مدير الكره
8/سامي عبد الله / مقرراً
9/محمد سالم /مدير إداري
> فلهم الإنحناءة والتجلة والتقدير.
> ولهم الإحترام ودعوات التوفيق والسير للأمام.
> شكراً مكتب تنفيذي قطاع المراحل السنية.
> المهم.
> اتحلت ضبيبينة أقصد  مشكلة ريشموند.
> وماعارف الضبيبينة الجديدة شنو.
> ولكني أرشح المحترف الماجانا حنان الريد غشانا ليكون ضبيبينة الحوار المريخي في المرحلة الجديدة.
> وأنا ماعارف مجلس المريخ ده بحب أم ضبيبينات ليه.
> حاجات صغيرة وحلولها بسيطة.
> يتماطل فيها لما تبقى ضبيبينات وألغام تدفن له.
> بل بعضها مشكلات بخلقها المجلس براهو.
> حيرتونا .
> المهم
> ضبيبينة المدرب شغالة والشتل كتر شديد.
> ولاتستغرب أن وجدت الراحل منصور رمضان من ضمن المرشحين لتولي الدفة الفنية خلفاً لأبي عنجة.
> نحيا ونشوف.
> أيها الناس.
> الأهلة لسة بضيعوا في زمنهم ومعتصمين.
> حركات زي دي مابتجيب حقها في المدنية دي.
> قانون كهيه ياروشا.
> كردنة بالكل تفنيش.
> قانون تم كهية.
> كردنة رئيس راميش لي قيامة بالكل تبريكات.
> المهم.
> سمعنا لينا ببنزين تجاري وبالسعر الجاري.
> موش كان أحسن نسمع كلام البدوي و نرفع الدعم؟.
> أسي فتحتوا مية باب للخراب.
> باب تدخل به الشركات المستوردة للمحروقات لسوق الدولار فيزداد السوق الأسود ظلاماً.
> باب تهرب منه الكميات المدعومة لتدخل ضمن التجارية.
> باب تلج منه  المحروقات للسوق الأسود.
> وباب يخرج به المواطن من الحياة الدنيا ويدخل للآخرة مباشرة.
> وباب البند السادس.
> زي باب بارات الخواجات في أفلام الكاوبوي.
> تدفرو جوة يفتح.
> تدفرو بره يفتح.
> وفي الحالتين يتطوطح.
> ليلج منه أخيراً أب كسكتة.
> شايل مسدسو ولابس بوتو.
> ومفلفل شعرو زي موبوتو.
> يشرب مريسة البار كلها.
> ويفك ليهو طلقة في الهواء.
> تعيد الجميع لعمال في حقول كانوا يملكوها.
> أيها الناس
> إن تنصروا الله ينصركم.
> أها
> نجي لي شمارات والي الخرتوم.
> كان شفت ياوالينا.
> الناس في رحلة البحث عن بنزينا.
> طلع ننو عينا.
> وقفنا في صف الطلمبة التي تلينا.
> وقفنا في شارع الوادي والطلمبة في شارع الشنقيطي ياوالينا.
> لما الوقفه طالت علينا.
> قلنا نصل الطلمبة نشوف الحاصل بينا.
> من محل عربيتنا ركبنا ركشة حلف إلا تلتمية عشان للطلمبة يودينا.
> وصلنا لقيناها شغالة أطمأنينا ودعينا ليكم ياوالينا.
> ورجعنا لي محلنا في الصف بتلتمية وخمسين عشان بتاع الركشة بالتلتمية رفض يودينا.
> كده خمسمية وخمسين فضل لينا من مليون إتديناهو للبنزين من الجنيهات أربعمية وخمسين.
> مامشكلة بتكب لينا.
> وتاني بي ميتين فطرنا واتغدينا.
> وكان أتعشينا.
> يانا الما كبينا.
> الناس دي خلااااص الصفوف زادت دينها.
مديونين شديد ياوالينا
و طلعت عينا
سلك كهربا ننساك كيف والكلب قال بكرة يجيكم التجاري تبيعوا العربية عشان تكبوا للعربية…هي مالها معانا العربية؟ تقوم بينا كب..تقع بينا رب.
وإلى لقاء.
سلك

اضغط هنا للانضمام لمجموعات الانتباهة على تطبيق واتساب
Do NOT follow this link or you will be banned from the site!
إغلاق
إغلاق