السودان: بابكر سلك يكتب: المريخ والتباعد الاجتماعي

في السلك
بابكر سلك
المريخ والتباعد الاجتماعي
*كورونا علمتنا ان في التباعد الاجتماعي حياة لاولي الالباب
*الانسان كائن بطبعه اجتماعي جدا
*ولن يستطيع العيش مبسوطا الا وسط مجتمع وجماعه
*فالتواصل ممارسة للغريزة الاجتماعية
*حتي الحيوانات والطيور تعيش في جماعات وقطعان
*علي الاقل توفر لها ثقافة القطيع الحماية اللازمة
*وتكتسب الخبرات التي تعينها علي الحياة من القطيع والتواصل معه والاتصال به
*نخلص الي ان الصلات المجتمعية والتواصل الاجتماعي مفيد للإنسان بل لكل المخلوقات
*حتي الديناصورات كانت لاتعيش احادا
*بل لها قطعانها ومجتماعاتها
*ام بعلو زاتو بعيش وسط اهله وبني جلدته في قطعان
*والانسان لايستغني عن المجتمع باي حال ولو امتلك مال قارون ومزمار داؤود وحكمة لقمان وجمال يوسف ومقدرة عيسي علي شفاء الابرص باذن ربه وكلامه في المهد صبيا
*علي الرسل والانبياء السلام وحلو الكلام
*فمثلا من يملك المليارات من الدولارات هل يستطع ان يناجي دولاراته تلك ويمارس معها مشاعره ويشبع منها غرائزه ويقبل تطبيبها له لو مسكتو حمي؟
*بالتأكيد لا
*ولكن قد يقول عبدة المال نعم
*ويبرروا ذلك بقول الشاعر
*ان الدراهم تكسو الرجال هيبة ومهابة
*فهي اللسان ان اراد كلاما
*وهي السيوف ان اراد قتالا
*والمعني واضح
*العندو الكشكوش الناس كسيرا للتلج في الكهرباء القاطعه دي
*تتحدث نيابة عنه
*وتقاتل دونه
*ونلاحظ ان من يفعل ذلك برضو ناس
*وفي مواجهة ناس
*يبقي صاحب الدراهم برغم دراهمه احتاج للناس والمجتمع حتي ولو كانوا من كساري التلج
*وبعدين لو مافي مجتمع بتاع الدراهم كان جابها من وين؟؟؟؟
*ومن يمن الله عليه بالصوت الجميل
*اكيد لايدرك جمال صوته الا من خلال اعجاب الناس بذلك الصوت
*يبقي احتاج للناس برضو
*لانو بدون ناس لو عندو مزمار داؤود زول بهببو ليهو مافي
*وجمال يوسف الخلي االنسوان قهن لمن حشن اصابعينن
*لو ربنا اداك ليهو ومافي ناس
*الا تغني كلميني يامرايا
*يبقي حوجة الانسان للعيش في مجتمع هي في المرتبة الاولي من حوائجه
*شانها اعلي من حوجته للاكل والشرب
*لذا المت كورونا الناس واصابتهم في مقتل لان الوقاية منها ثمنها غالي وهو التباعد الاجتماعي والانقطاعه
*هذا الالم الذي حس به الناس عند ظهور الكورونا
*حس به اهل المريخ منذ تولي مجلس سوداكال للامور الادارية
*فكانت الكيمان نذيرا بتباعد اجتماعي لن يدفع ثمنه سوي الكيان
*واستفحل الامر الي ان وصل مجتمع المريخ لقناعة مفادها ان التباعد الاجتماعي في المريخ هو السبيل للعيش والحياة بعيدا عن داء كورونا المريخ وهي التحزب والتكوم والعداء المطلق
*يا معانا يا مابنقبلك
*ياخي علي الاقل قولوا بنقبل الماضدنا حتي لو كان مامعانا
*ودفع الكيان التمن
*تمن كورونا الشلليات
*وكان عدم الاستقرار في مجتمع المريخ هو سمة العهد
*ايها الناس
*دعونا نختلف في كل شئ الا المريخ
*فالنمارس عشقنا وجميع حقوقنا في مجتمع معافي لايحمل ضغائن ولايستجيب لوصايا ولا تقهره الضغوط والحروب المفتعله
*فغالبيتنا يمارس فقه رصاصة الرحمه معللين ذلك بانه الموت الرحيم
*ولاتقنطوا من رحمة الله
*فقط صفوا النوايا
*وصفاء النوايا لايكفي
*يحتاج لاعتراف بالآخر واحترام للقوانين واللوائح
*اللهم اجمع قلوب المريخاب علي كيان واحد بعيدا عن مصالح شخصية او شللية او جهوية او قبلية
*ايها الناس
*اسماء في سماء المريخ ترشح نفسها او يرشحها البعض لقيادة الكيان في المرحلة المقبلة
*اقول لهم المال وحده لايكفي كمؤهل لادارة النادي
*وحتي ولو كان الواحد منهم ناجحا جدا في ادارة استثماراته
*فهذه ادارة تختلف عن تلك
*ولايعقل ان كل من جمع مالا هبطرش يكون ذلك مؤهلا له لقيادة كيان من اعرق كيانات افريقيا رياضيا
*واوصيهم جميعا
*ان كانوا جادين عليهم بالتباعد الاجتماعي مريخيا ليكونوا علي مسافة واحدة من كل المسميات
*تباعد اجتماعي زي بتاع الكورونا ان ارادوا حياة
*بمناسبة الكورونا
*فحص الكورونا احر من الكورونا
*يدخلوا ليك عود نص متر في نخرتك ويسوطوهوا ليك
*يعني لو وقعت ليك في فحيص اشتر
*بسوط مخك ويمرقك بعد الفحص هلالابي
*تنكر مانديلا
*وتقول سيكافا كاس المجاعة
*وتغني سيد البلد سيد البلد
*برغم ان اطلاق الاخوة الاهلة لقب سيد البلد(المريخي)علي هلالهم
*يذكرنا باطلاق لقب اسد افريقيا علي البشير
*نفس الملامح والشبه
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*انابة عنينا
*قول لناس الكهربا
*مافيش احسن من كدة
سلك كهربا
ننساك كيف والكلب قال اذا افترقن تكسرت احادا….دحين ده ماكلامكم يا بشر!!!
والي لقاء
سلك

اضغط هنا للانضمام لمجموعات الانتباهة على تطبيق واتساب
Do NOT follow this link or you will be banned from the site!
إغلاق
إغلاق