أبداً لحكم الفرد لا

بابكر سلك
] الليلة ماعارف أبدأ بالسياسة ولا بالرياضة.
] فالأحداث منفعلة والناس متفاعلة.
] ولأن الحصة وطن.
] والمريخ برضو وطن.
] نجوطة ونتوكل ونبدأ.
] نحن أنصار الديمقراطية التي تجري داخل شراييننا ونجري فيها مجرى الدم.
] لذا نتقوقع داخل إطار مباديء ليس لنا منها فكاك.
] نساند المواقف والمباديء.
] لا نباري رجال ونناصرهم حتى ولو كان الثمن الضرب بالمقدسات عرض الحائط.
] ولا نعادي شخوص وأشخاص لإختلاف في الرأي أو العقيدة.
] لأن عقيدتنا تلزمنا بإحترام الرأي الآخر وتقديره مهما كان الخلاف والإختلاف.
] أقول قولي هذا حتى ولو كان الرأي الآخر لايعترف برأينا ولايقدره ولايحترمه بل ويريد أن يجردنا من حقنا في إعتناق رأي مخالف لهم.
] الشمولية ماحبابها والدكتاتورية لايمارسها إلا دكتاتور أحمق ولايقبل بها إلا ضعيف رعديد.
] أيها الناس
] زماااااااان.
] كتبنا مراراً.
] إن ديمقراطية المريخ ترفض حكم الرجل الواحد وصرف الرجل الواحد ورأي الرجل الواحد ورجل الحزب الواحد وحزب الرجل الواحد.
] واستبشرنا خيراً بقدوم مجلس عن طريق الديمقراطية.
] وثم حلول عهد للحرية والسلام والعدالة بفضل جهود أنصار الديمقراطية الذين أجبروا (التاتشر) على الهروب.
] وأجبروا البعض على (زعمطة) لحاهم.
] وأجبروا فئة على التنصل من ناس ديك.
] وأجبروا فئة أخرى على ركوب قطار الديمقراطية دون خجلة.
] لأنهم أقتنعوا بأن من لا يركب معنا سيغرق حتماً.
] فما بين سفينة نوح وقطار الديمقراطية شبه كبير.
] أيها الناس
] بالأمس سمعنا بإقالة سوداكال لمدير المكتب التنفيذي.
] سألنا عن قرار المجلس حول ذلك.
] قالوا مافي قرار.
] يبقى القرار فردي.
] حيلك ياسوداكال.
] أبداً لحكم الفرد لأ .
] وإن سمح لك أعضاء مجلسك بذلك.
] لن نسمح لك بمخالفة القوانين واللوائح.
] والأمر غير محصور في خيري.
] الأمر يتعلق بكل شؤون المريخ.
] يا آدم.
] قالوا لي وجابوا لي وكلموني.
] ورخية الأضان لـ (القوالات) ظننا أننا قد فارقناها إلى غير رجعة.
] ولكن بالشايفنو وبنسمع بيهو ده.
] يظهر أنو لسة أضان مصدر القرار جاره بالواطة.
] ولتعلم يا حمدوك أقصد يا سوداكال.
] إن الذين وصفوك دوماً بالدجال والمشعوذ والمسجون والمحتال.
] والذين تتودد إليهم اليوم لتقرب المسافة.
] وإن مساندتهم لك في إبعاد خيري.
] أعلم أن آخر عهود مودتهم معك هو إبعاد خيري.
] ليسقطوا وقف إطلاق النار ويعاودوا حربك من جديد.
] هذه المرة ستخوض ضدهم حرباً وأنت تفقد أهم سلاح لديك ماركة هاون موديل خيري قاذف القنابل.
] ووقتها لن ينفع الندم يا سودا.
] أيها الناس.
] منحة الإتحاد للمريخ تمشي المريخ عن طريق بوابة المكتب التنفيذي.
] مابتمشي المجلس ولابقدر يستلمها عمر ولا حسن ولاعبدالله.
] أكشفوا الورق (ووروا) الناس الإشكالية سببها شنو..
] أيها الناس
] عضو المجلس بتاع (عصاية نايمة وعصاية قايمة) والحفر والعمل على إيقاف كل المشروعات التي لاصالح له فيها.
] قولوا ليهو أمرك مكشوف.
] لكن في سؤال.
] القروش المحولة من قطر عشان يتم تسليمها للقطب حامد بدوي لغرض مريخي.
] عدم وصولها لليوم ياربي سببو شنو؟
] الزول الاستلمها قفل تلفونو وهج السعودية.
] قلنا يمكن لما يرجع بالسلامة يرجعها.
] ورجع ومارجعها.
] الزول ده موش أحسن ليهو يرجعها بدل يمشي بين الناس بالفتنة ويفشل المواضيع عشان يضرب غيرها؟.
] المهم.
] ياسوداكال ماتبقى زي (ضنب الغنماية مركب فيها ومابغطيها).
] ولما الضنب يكون كدة.
] مافي داعي للجديع وهز الضنب المابستر.
] أها
] نجي لي وطن السياسة
] نحنا مامرقنا الشارع عشان نشيل البشير ونرجع بيوتنا.
] مرقنا لوطنا.
] مرقنا شان أهلنا.
] مرقنا جابرانا معاناتنا.
] مرقنا شان ترتاح أجيالنا البعدنا.
] لكن بعد مرقتنا قست علينا دنيتنا.
] كان بالإمكان أفضل مما كان.
] فالحياة استحالت.
] وتقتلنا الخجلة من أرواح الشهداء.
] نعلم فساد الماضي جيداً.
] ولكننا نعلم أيضاً أن بالإمكان الخروج من النفق دون حاجة لإدخالنا لأعمق حتة في النفق.
] فعبارة سنعبر صنعت منا (كورس) يردد مع النور الجيلاني.
] عدي بينا عدي بينا ياريس.
] ماتغرق المركب خلي الشباب يركب ياريس.
] وعدي بينا عدي بينا يامراكبي.
] الحبيب حمدوك نعلق عليهو آمالاً عراض وطوال.
] ولانشك في كفاءته.
] شخصياً أنا معاك ياحمدوك.
] فالناس مواقف وأنا (مبركن) صاح.
] لكن كمان المناصحة واجبة ياناس.
] حمدوك زي فيصل عجب.
] حريييف لكن ماعندو روح الكابتنية.
] الكابتن ياحمدوك مدرب داخل الميدان.
] كلم باقي (التيم) وحمّسهم.
] شيل شيل.
] معاو.
] أمرقوا.
] أمرقوا دي أهم حاجة ياحمدوك.
] يمرقوا عشان يفكوا الحصار.
] يمرقوا عشان يهاجموا يمكن يجيبوا قون يؤهلهم.
] (الدرون) ده كويس مع العدو.
] بطيرنا كلنا وبتأهل العدو.
] دايرين قرارات يا(كابتن) فيها ردم مافيها حرفنة.
] ناس كتااار ومهن كتيرة تحتاج لردم ياحمدوك.
] صر وشك وأردم.
] أمرقوا لي قدام.
] بالذات نحن نعاني ضعفاً في عمق الدفاع ياحمدوك.
] الأتنين مابشيلوا (هد).
] وأي باص بينهما بننضرب بيهو.
] باص بيني بين الصناعة والتجارة ونعلن طيراننا من التمهيدي يا (كابتن) حمدوك.
] قول ليهم أمرقوا ماتخندقوا.
] وجيب ليك محور نجييييض يلعب قدامهم.
] وبرغم كل ماحدث ياحمدوك نؤيدك.
] فالناس مواقف وأنا (مبركن) صاح.
] أيها الناس.
] إن تنصروا الله ينصركم.
] أها
] نجي لي شمارات والي الخرتوم.
] والينا.
] شفت السخانة القاجه فينا؟.
] سخانة في الجو وسخانه في الجيب ومن سخانة الغيب الله يستر علينا.
] النسوان عرفنها يا والينا.
] عندهن جلاليب بيت مشرطات تلقى كل الحاجات مارقات ياوالينا.
] ونحنا الخمخمة مع السخانة مدودرة بينا.
] حقو تاني نمرق ساااااي.
] البلد دي بسخانتها دي مابلد سترة ياوالينا.
سلك كهربا
ننساك كيف والكلب قال تاني مطرة واحدة الفيل والتمساح والأسد بجوكم مدام مطرة واحدة جابت ضبابين العالم وبواعيض الشرق الأوسط وحشرات الخليج.
وإلى لقاء.
سلك

اضغط هنا للانضمام لمجموعات الانتباهة على تطبيق واتساب
Do NOT follow this link or you will be banned from the site!
إغلاق
إغلاق