الدولار والقانون الجنائي 

بابكر سلك
] الموز.
] الموز الواحد ده.
] موز الله والرسول ده.
] الكيلو وصل مية جنيه.
] والمية جنيه ذاتها في حد ذاتها وفي حقيقتها هي مية الف جنيه.
] لكن خجلة سااااااي بنسميها مية جنيه.
] والموز لما وصل المية جنيه
] كتب الحبيب جفون علي صفحته بالفيس العندو ككو يخارجو
] المهم
] الموز في بلدي بقي زي الدولار في وطني
] الصباح عندو سعر والضهر سعر والمغرب سعر وبالليل سعر
] الصباح بمية والضهر بتسعين والعصر تمنين واتنين بمية وخمسين والمغرب باربعين
] بالليل الكيلو بتلتين يا الخليتوا الاكل
] وهذا شأن الدولار
] ولما تجي اسعار الدولار بنتذكر القانون الجنائي
] لما الدولار وصل ١٣٠ قلنا ده القتل العمد ذاتو ياحكومة
] وتدرج
] لما وصل ١٣٩ قلنا اذي
] ولما وصل ١٤٢ و١٤٤ التهديد والارهاب كان واضح
] وخفنا يصل ١٥٤
] لما وصلها حمدنا الله غيروها
] طبعا من الحسنات ما مر علي ١٤٦
] كان بقت فضيحه بجلاجل
] لما وصل ١٧٤ قلنا الجاب سيرة السرقة شنو
] المهم
] ١٧٧ لما وصلها خيانة الامانة كانت واضحة جدا
] فادارة بلد امانة
] ولما وصل ١٧٨ ماكان في تفسير غير الاحتيال
] ١٧٨ سنعبر كيف بس
] ١٧٨ وسنعبر بتبقي عبارة سنعبر مجرد احتيال ولعب علي المن غير دقون لصالح الدقون
] قام وصل ١٨٠
] تملك جنائي يحتاج تفكيك
] دي مادة غير التفكيك واعادة الحق لاصحابو مامعاها حل تاني
] الليلة حايصل ١٨١
] استلام المال المسروق
] ولما نصل للحته دي بنسأل
] من السارق؟
] ومن المسروق منه؟
] ومن المسروق به؟
] ولصالح من تتم السرقات وكيف؟؟؟
] وكيف سنعبر بس!!!!!!!

] ايها الناس
] استلم المريخ حوض السباحة في صمت
] لم يقابلنا ترحيب بالخبر
] وكأن الامر لايعني المريخ
] عشان كده بنقول وصف مريخاب كفاية
] فالتبعية للمسميات الاخري بتخلي الناس فرحها للمريخ مرتبط باناس واوضاع واستراتيجيات غير
] ومجبوووورة خادم الفكي علي الصلاة
] وقطعا اذا تم تفكيك القبة بفكيها
] مافي شى بجبر خادم الفكي تاني علي الصلاة
] ووقتها الشافه في الانداية ماكضب
] فانه المكان الانسب لها
] ايها الناس
] لكل مقام مقال
] ولكل حدث حديث
] ومقام المريخ فوق الجميع
] ايها الناس
] لم نحزن لعلاقة آدم مع من وصفوه بالدجال والمشعوذ والمسجون
] والذين كانوا وراء الطعون
] لاننا كنا ولسسسة مع ديمقراطية لامع شخص ولا اشخاص ولكنها مبادئ
] والانحناء للعواصف ليس من شيم الاشجار العاتية
] لن يسود بالمريخ يا آدم الا قانون
] وعلي بقية اعضاء المجلس تسجيل مواقف مشرفة لهم
] لان التاريخ لايرحم
] فان كانوا كومبارس وكورس
] فاليكثروا من الصفيق خلف المؤدي آدم
] فآدم مجرد مؤدي لاغنيات تكتب له وتلحن وتلقن
] وان كانوا غير ذلك فاليسمعونا صفقه ويورونا شريط هدوم وردحي
] ايها الناس
] استغفر الله لي ولكم ولسائر المسلمين
] حتي اخوتنا في الله الكفار يشملهم استغفاري عله يكون سببا للهداية
] المهم
] امس الحكومة رجعت لقصة المغترب الراجع نهائي يجيب عربية موديلها لي ورا كحد اقصي خمسه سنين
] قصة خمسة سنين دي ماواقعة لي
] افرض انا زول كلاسيكي وداير اركب انجيليا ١٩٦٠
] طالما بحالة جيدة البمنع شنو استمتع بيها في شوارع الخرطوم؟
] بعدين قصة صلاحية المركبة دي ماشغل جمارك ولا شغل وزارة تجارة .. ده شغل مرور وفحص آلي
] خلوا المغترب يجيب العربية الدايرها
] وصلاحيتها تحددها جهات الاختصاص
] ايها الناس
] ان تنصروا الله ينصركم
] اها
] نجي لي شمارات والي الخرتوم
] كان ياوالينا
] الاهله قالوا كردنة تاني مابرأس واحد فينا
] وكردنة قرر يمشي يخلينا
] والجقلبة بدت ياوالينا
] اي زول رفض يمسك الهلال يا اخينا
] البوليس قالوا ليهو امسك الهلال ياوالينا
] البوليس قام فوق وقال منو البدرع في رقبتو حبلا واقع يقوم يودينا
] وتاني رجع كردنة رئيسا علي الجميع وهذا الحال سيلينا ياوالينا
سلك كهربا
ننساك كيف والكلب قال مافي زول عاقل بمسك فريق قمة والحكومة غالبها تمسك الدولار
والي لقاء
سلك

اضغط هنا للانضمام لمجموعات الانتباهة على تطبيق واتساب
Do NOT follow this link or you will be banned from the site!
إغلاق
إغلاق