القصة تكتيك

بابكر سلك
] جمعية التالت من أكتوبر قصتها واضحة وأغراضها محددة ويعلم الاتحاد بذلك ونعلم نحن ويعلم حتى الذين يظهرون أنهم لا يعلمون
] وتبدأ منها تكتيكات ممارسة الديمقراطية تمهيداً لدورة جديدة.
] بالأمس كانت اسموها تنقيح النظام الأساسي.
] وعشان الناس ما يتخلبط عليها الامر
] يقصد بالنظام الاساسي نظام ٢٠١٩ كما ورد بخطاب (الحب ) الرسلو الاتحاد العام(للمصلحة العامة)
] ومن البديهيات ان ادخال اي يد على ذلك النظام يكون تزويراً لارادة جمعية تسعطاشر اكتوبر الفين وتسعطاشر
] لذا لا يمكن ان يحدث تعديل
] كل ما يحدث هو اقتراح تعديل او الغاء او اضافة على بعض الفقرات
] بشرط عرض ذلك على جمعية تلاتة اكتوبر القادم وموافقتها عليه
] هنا سيمتطي سودا صهوة المعارضة للمرة التانية خلال اسبوعين
] سيحاول اعادة جزء من فقرات انفراد الرئيس ببعض القرارات ليتفادى اسقاط المجلس لقراراته مستقبلاً
] هذه الجزئية تفيد بان سودا ينوي خوض دورة جديدة يديرها بالحتة الفيها الحديدة
] فلقد اعتاد الرجل على ضرب المواقف بدهاء يحسد عليه
] والفائدة التانية من مقترح التعديلات هي المحافظة على ماء وجه الذين رفضوا النظام جملة وتفصيلاً
] ثم تواجهوا بالامر الواقع
] هنا بقدروا يقولوا لو لا التعديلات ما كان خلينا النظام الاساسي ده مشى خطوة
] صدقناكم وشرفتونا وهيا لنقدم للمريخ المفيد
] المهم .. سودا يلعب بتكتيك
] وباقي الملعب كترابتو قايمة
] والخوف من الهجمة المرتدة
] ولكن كل ما يهمنا
] ان نحافظ على ديمقراطية تناسبنا
] وان نمارسها دوماً لنتطور مع الممارسة في ممارستها
] الى ان نصل لديمقراطية مثلى يعود نفعها على الكيان وتضعنا مع الاندية الكبيرة قارياً وعالمياً بحق وحقيقة
] المهم
] الخدمة المدنية بعد الثورة هي نفسها الخدمة المدنية قبل الثورة
] ركاكة وفوضى وبيروقراطية مقرفة وتسيب
] الشغالين في شارع الوادي بفطروا في الشنقيطي جمب التقانة .. الشغالين في الشنقيطي جمب التقانة بفطروا في القماير .. والخزنة بتقفل اطناشر
] ومشوار الفطور ماشي وجاي داير ساعتين
] ممكن نسيب جار ناس ايناس الموظفة يموت
] الوزارة كلها الساعة عشرة عز الشغل تمشي البكا
] يطلعوا حافلات الحكومة وبنزين الحكومة ويطلعوا زيت الحكومة ويضيع مواطن يلهث في مكاتب الحكومة لخدمة لا تستغرق عشر دقائق
] والغريبة لما الموظفين يمشوا الصلاة
] اتفكفك وتعال بكرة طوالي
] فالصلاة عماد الدين من حداشر ونص وحتى الترحيل
] ممكن عادي الصلاة تاخد وكت اطول من الوكت البتاخدو العمرة
] وده السودان .. واذا كان ده حالنا
] حقو السودان يمرق من السودان ويشوف ليهو شعب بقدر العمل وبعرف قيمتو وبحترم المواطن
] العيب يا ناس مافي ارض .. ولكن العيب في الانسان
] ايها الناس
] ان تنصروا الله ينصركم
] اها
] نجي لي شمارات والي الخرتوم
] تعرف يا والينا
] نحنا زي الزول الماشي ساااي ولابس صديري وحايم بقينا
] اذا كانت الشبكة طول اليوم كعبة وقاطعة وتقطع وبتقطع لينا
] لزوموا شنو الايصال الالكتروني الهارينا
] ارجعوا لاورنيك خمسطاشر يا والينا
] عشان نمد كرعينا قدر لحافنا ان كان وقوف الصفوف فضل لينا كرعينا
سلك كهربا
ننساك كيف والكلب قال الكتروني وميديا ونت وفلهمة والشبكة في نص البلد الا تطلع ليها في قفص الجداد
والى لقاء
سلك

اضغط هنا للانضمام لمجموعات الانتباهة على تطبيق واتساب
Do NOT follow this link or you will be banned from the site!
إغلاق
إغلاق