السودان: بابكر سلك يكتب: يا مستجد

] لن ندعي شرفاً لا علاقة لنا به.
] ولن ننتظر شهادة من شخص تؤكد علاقتنا وقناعتنا بالديمقراطية.
] ولن نتشعبط في قطار الثورة لأننا وقوده.
] شوفوا الركبوا بعد حداشر أبريل.
] والأرشيف قاااعد.
] فحينما كنا نتحدث عن ديمقراطية المريخ ورفضها لحزب الرجل الواحد.
] ما كنا نكتب ذلك على الحوائط ليلاً.
] ولكن على صفحات الصحف نهاراً جهاراً.
] ولن نستشهد بالمحاكم التي رقصت طرباً ونحن ندافع عن الثوار والإنقاذ تمارس سعراً وغلظةً وتهدد بكتائب الظل.
] نحنا مابورونا الديمقراطية.
] والديمقراطية مابعرفوها بينا.
] بتعرفنا زي جوع اليومين دي.
] ولن نتخلى عنها ولو رفضها كل الناس الذين يبحثون عن الشمولية والتسلط.
] يبقى لما تقول رأي أدرسو كويس يامستجد.
] فالديمقراطية حاشاها أن تطلق علينا لقب مستجد.
] يامستجد.
] وبنتمرد على الواقع على التاريخ.
] ونطلع بره للشارع في وش الريح.
] في وش الريح بنتمدى.
] نقيف للطلقة نتحدى.
] عن أهدافنا وعن المبدأ.
] أبداً ما حانرتدى.
] الكلام ده يامستجد كان بزين كثير من كتاباتنا على الصحف.
] وقع ليك يامستجد.
] أيها الناس.
] تحدثنا عن لجنة الإنتخابات وسلطاتها.
] نط واحد قال كيف لجنة يعينها المجلس تشيلو.
] تخيلوا؟.
] زول بعارض في النظام الأساسي تلاتة سنين.
] وماعارف لجنة الإنتخابات منو البعينها وسلطاتها شنو.
] ولكنه يعارض كقطيع.
] وفعلاً القلم مابزيل بلم.
] أرجعوا للنظام الأساسي.
] أقروهوا أول مرة.
] على الأقل تقدروا تعارضوا بفهم.
] اللهم أنعم على الزعيم بالعضوية أم راس.
] العضوية بالراس دي مابتقدم شبر.
] فهم القطيع أن يساق ويوجه.
] ودي مامرحلة كده.
] كل الإحترام للذين يعارضون النظام الأساسي بعد الإطلاع عليه.
] مهما كان رأيهم.
] لكن الكورس البردد في أغنية مافاهمها ببوظ الحفلة.
] المهم.
] الشعب بقى زي اللابس كيس(اتي).
] كلو يوم بضيق عليهو.
] نعم سبب الضيق اليابا صديق.
] ذلك العهد الفاسد الظالم.
] لكن استفحاله لهذه الدرجة يعود للحكومة الإنتقالية.
] لأنها إلى الآن لم تمس سبب الداء.  تكمن العلة في دوائر يجب تفكيكها بسرعة.
] معلوم أن النظام المباد لم يترك للبلد فرصة لتنتج سلعة.
] كلو مستورد إلا صابون بشرى والدكوة.
] تلك الدوائر هي.
] المورد.  الوكيل.
] الرقيب.
] وتلاتتهم كيزان.
] كيف تستقر الأسعار يا مدني؟.
] فكك التلاتة دوائر دي وشوف شعبك حاينعم باستقرار الأسعار كيف.
] والقصة مادايرة شرح أكتر من كده.
] أيها الناس
] عشان رفع العقوبات قبلنا الإبتزاز
] جيب التربيزة دي وأمشي ألعب.
] تجيب التربيزة.
] بس أملأ الجك وختو فيها وأمشي ألعب.
] تجيب الجك وتختو.
] أقفل الباب الصغير وتعال أمرق بي جاي أمشي ألعب.
] تقفل الباب الصغير وتجيء.
] هاك أمشي الدكان جيب لي ساردين وجيبو وأمشي ألعب.
] تجيء تقول الدكان قافل.
] يقول ليك أمشي الدكان الفي الحلة التانية جيب الساردين وأمشي ألعب.
] تجيب الساردين من الدكان البهناك وتجيء.
] يقول ليك لأ ده فيهو صلصة رجعو ليهو وجيب القروش وأمشي ألعب.
] ترجعو وتجيب القروش وتجيء تلقي الدنيا مغربت ومافي طريقة للدافوري واللعب.
] تتخمد جوة تلقى أمريكا هي الوحيدة البتلعب.
] القصة دي دايره شفتنة سياسية مابوصوك عليها ياحمدوك.
] أيها الناس.
] إن تنصروا الله ينصركم.
] أها
] نجيء لي شمارات والي الخرتوم.
] كان شفت يا والينا.
] أمريكا مادايرانا نلعب.
] دايرة تلعب علينا.
سلك كهربا
ننساك كيف والكلب قال هم اليهود مالهم؟.
وإلى لقاء
سلك

اضغط هنا للانضمام لمجموعات الانتباهة على تطبيق واتساب
زر الذهاب إلى الأعلى