السودان: بابكر سلك يكتب: لا أفكر طالما الشيخ يفكر

] لجنة خماسية لتختار من يقود المريخ .
] ملايين المريخاب وآلاف الأعضاء ينوب عنهم خمسة أشخاص في تحديد من يقود المريخ.
] حتي تفويض الخماسية كان تفويضاً فردياً.
] آحاديا.
] طيب خماسية ماكتيرة؟.
] خلوها ثنائية أو ثلاثية أو حتى فردية.
] القصة مابتحتاج طالما معظمنا شغال بمبدأ .
] لا أفكر طالما الشيخ يفكر لي ولنا .
] لنا كلنا .
] فالقطيع لا يسأل من فوض اللجنة.
] لكن طالما القصة كده تمشي على كده.
] بربكم .
] وبربنا.
] معقوله يصل زول لدرجة يعفي نفسو من التفكير لنفسو لأنو غيرو بفكر ليهو؟.
] والقصة ماقصة كيان.
] القصة قصة كيمان .
] بدليل عدد القوائم الطلعت وبعضها وصل الإتحاد.
] والغريبة في ناس عرفهم بالإتحاد ووراهم درب الإتحاد هاشم الزبير.
] قاموا رجعوا الإتحاد بي وراهو وسلموا قائمة تخلو من هاشم الزبير العلمهم وسبقوه على الأبواب.
] هذا هو حال معظم الذين يتسابقون ظاهراً خوفاً على الكيان  وحقيقة أي شيء إلا دي .
] حتى الأخ جعفر سنادة الذي شكل للبعض مأوىً ومرجعاً فكرياً.
] اسقطوه عن قائمتهم غير مراعين على الأقل للملح والملاح والليالي الملاح.
] ده كلو هين.
] لكن البزعل أن تلغي عقلك ليفكر لك غيرك.
] ولن ينصلح الحال في المريخ.
] طالما الحاصل معظمه إمتداد لحشد القطيع بالمصانع والمزارع والحيشان الزمان داك.
] ولكن.
] أكيد لايصح إلا الصحيح.
] وسنظل نحلم ونعمل على يوم تشرق فيه الشمس وتجد عضوية المريخ المستنيرة.
] تفكر بنفسها ولنفسها.
] تتقارع بأفكارها لتتلاقح وتلد مريخاً عالمياً بحق وحقيقة.
] تمارس الإختلاف بأدب الإختلاف.
] ولا ينقص الخلاف بينها من إحترام بعضها لبعضها .
] ووقتها سنحقق الأميرة السمراء قطعاً
] بل ستأتينا منقادة تجرجر أذيالها.
] لكن بالحالة دي.
] الأسي دي .
] سنختم كل المواسم بأغنيتنا المفضلة.
] ترم ترم ترم ترم.
] نهواهو في كل الظروف.
] وفي هوى بدون ظروف.!!!
] أبو الأمين عندو أغنية اسمها (الحب والظروف).
] اللهم أصلح حالنا في المريخ وأصلح حال المريخ بنا .
] وسؤال.
] على أية مادة أستند مجلس إدارة الإتحاد عندما علق مجرد تعليق على جمعية المريخ العمومية؟.
] وياتو مادة من نظامو الأساسي بتخول ليهو يعين لجنة توفيق زي ماسماها؟؟.
] وهل حالة الهلال والخرطوم ألخ .
] تشبة حالة المريخ؟.
] زمان قلنا ليكم الإتحاد ماعين لجنة وفاق للمريخ أيام الريس ود الشيخ.
] ولكن الإتحاد قبل تعيين المجلس المنتخب لأعضاء مضافين.
] لأن الإتحاد ماعندو حق التعيين .
] أما المسميات بتاعت فلان رئيس وأوكتاي نائب رئيس.
] فكانت مسميات إعلامية وعرفية في مجتمع المريخ .
] ولكن وضعهم الحقيقي أعضاء مضافين .
] حايجي زول يقول لي محمد الشيخ كان بتعامل مع الإتحاد كرئيس.
] بقول ليهو محمد الشيخ عمرو ماخاطب الإتحاد كرئيس.
] كان بخاطبهم زيكو بوصفه مديراً تنفيذياً.
] المهم
] إذا استسلم المجلس لما هببه الإتحاد عجاج رجلينو.
] عشان غيرو يشتغل في التسجيلات.
] وإذا إختار المجلس للرهيفة أن تنقد.
] يرفع الأمر محل بتتقده الرهيفة ويواصل في إعادة قيد اللاعبين القدامى وقيد من يراه مناسباً من الجدد.
] و(الفيفا) جات تتقسم ماشه علي تتبسم.
] أيها الناس.
] إن تنصروا الله ينصركم.
] أها
] نجيء لي شمارات والي الخرتوم.
] كان شفت يا والينا .
] أمس طلعت الناس الطالعة عينها .
] وهتفت
] حمدوك يسلموا الجابوك.
سلك كهربا
ننساك كيف والكلب قال لو ربطتنا الحجر على بطوننا من الجوع يا ديل تاني مابتغشونا .
وإلى لقاء
سلك

اضغط هنا للانضمام لمجموعات الانتباهة على تطبيق واتساب
Do NOT follow this link or you will be banned from the site!
إغلاق
إغلاق