السودان: بابكر سلك يكتب: هااااا .. أرفع يامعلم

] سنوات رهيبة عشناها تحت ضغط تسجيلنا ضمن الدول الراعية للإرهاب.
]أزمات شديدة عشناها بسبب العقوبات المفروضة على وطن الجدود ذلك جراء التسجيل ضمن الدول الراعية للإرهاب.
]الشعب مارعى إرهاب ولابعرف للإرهاب.
]والأمة بتاريخها الطويل لم تمارس الإرهاب .
]لكن جونا الجماعة ديك وجعلوا من وطننا غرزة تأوي المجرمين الدوليين تحت ستار الدين ونصرته .
]وخلقوا من سهولنا مخازن لأسلحة الأرهابيين ومعابر يعبر منها السلاح لهم.
]ولما يضربونا نبطبط.
]جات طافية النور بالليل.
]صلاة العشا.
]سايقاها بت.
]الدفاع بالنظر.
]ويوم اليرموك كان السبب بحسب قول ناسنا.
]حداد شغال بالليل ما لابس نضارة لحام والشرارة طارت.
]المهم دفع الشعب التمن.
]أسباب الأزمة لم يدفعوا ثمنا مع الشعب.
]لاباتوا القوى.
]ولاباعوا بيت الورثة ومشوا الحارة الأخيرة حي السودان قفل.
]الحي الذي يفتح على الجبل.
]الجبل الذي قيل أنه شهد على جريمة إعدام شهداء رمضان.
]مادفعوا ثمن بل قبضوا الثمن.
]وحازوا على النواصي.
]وشيدوا عليها بالثمن ناطحات السحاب.
]تعبنا شديد جراء العقوبات.
]ودفعنا ثمن كعكة إلتهمها غيرنا دون أن يقول بسم الله.
]وجاءت الثورة بالبشريات.
]سقطت أشياء وأناس.
]والبقية في الطريق.
]ولازلنا ندفع ثمن العقوبات وثمن خساسات أسباب العقوبات الذين لم يسقطوا بعد.
]وقام حمدوك يسلموا الجابوك بمجهودات كبيرة .
]إلى أن وصل الأمر لتسوية.
]تاني ندفع تمن.
]وقبلنا.
]ننام منتظرين رفع اسم السودان عن تلك القائمة.
]ونصحو على رفع الاسم .
]أوقات مريرة عشناها.
]حتى خلت السودان سيارة يركب على مقودها ترمب .
]والشعب السوداني كلو يدفر.
]ويكورك لي ترامب.
]هااااا.
]أرفع يامعلم.
]أرفع يا معلم.
]أرفع يامعلم.
]نفسنا قام .
]وهمتنا لم تسقط بعد .
]أرفع يامعلم.
]ولما تأكد ترمب من الدفع.
]تم الرفع.
]واتتنا نسائم الثورة الجميلة .
]إنها الخطوة الأولى نحو إنشاء دولة محترمة.
]وتحترم مواطنها وتعمل على إراحته.
]مبرووووووك.
]أيها الناس.
]زمان لما ضقنا قلت ليكم حمدوك زي رودر.
]ماشغال بالمباريات المحلية الآن.
]ولكنه يهتم بالمباريات الدولية.
]أها.
]إرتفعت .
]رأسية من سانتو.
]وكأس الكؤوس في المطار .
]شكراً حمدوك.
]شكراً سوداننا الحبيب.
]ويا حمدوك يسلموا الجابوك.
]والله ينتقم من الكانوا دايرين يجيبوك أبيت تجيهم.
]المهم.
]بعد كده ماتستغرب لو لقيت كاوبوي في المنشية سايق بقرو.
]بلد مامحظورة.
]ماتستغرب لو لاقاك كشك سيدو يهودي ببيع بالتخفيض.
]مالو اليهودي!.
]ما أصحاب كتاب .
]وماتستغرب لو لقيت ألمان زارعين تفاح في الباوقة.
]أو يابان شغالين سكند هاند في شارع الخور.
]وما تستغرب ماتستغرب ماتستغرب.
]لو لقيت جنيهنا بجيب تلاتة دولار.
]المهم .
]اليوم تتويج.
]لو أدوا الهلال نقاط الوادي.
]لو أدوا الوادي نقاط الهلال.
]لو أعادوا ليهم الكورة.
]الليلة باذن الله تتويج المريخ بلقب الممتاز للمرة التالتة توالياً.
]آخر مرة عملناها كانت في ألفين وتلاته ولا ألفين وأتنين مابتذكر.
]بدري الكلام ده . ولكن.
]لو أردناه تتويجاً بجدارة.
]علينا أن نعطي الخصم حقه.
]وعلينا أن نؤدي بنفس الغيرة على الشعار .
]وعلينا أن نصر علي الفوز.
]أكرر الفوز.
]وظروف النصر كلها متوفرة.
]استاد الخرطوم.
]يوم السبت .
]بدون جمهور.
]والغريبة لو الهلال جانا لابس أبيض.
]نسال الله النصر لنا.
]أيها الناس.
]إن تنصروا الله ينصركم.
]أها.
]نجي لي شمارات والي الخرتوم.
]شفت يا والينا.
]أمريكا مضت لينا.
]تباً لعهد إشترى وباع فينا.
سلك كهربا
ننساك كيف والكلب قال جدلينا تاني البطري بشتغل لينا ويشتغل بينا.
وإلى لقاء.
سلك

اضغط هنا للانضمام لمجموعات الانتباهة على تطبيق واتساب
Do NOT follow this link or you will be banned from the site!
إغلاق
إغلاق