السودان: عاطف فضل المولى يكتب: هو مالو؟

] (ركّاب سرجين وقيع) و(مسّاك دربين ضهيب) والسرج هو الذي يوضع على ظهر الدابه فالذي يركب على سرجين لابد له أن يقع والدرب هو الطريق والذي يسير على طريقين لابد أنه تائه لامحالة.
]رمضان عجب والرشيد قادهما طمع الدنيا ووقعا على إقرارين للهلال بعد أن سال لعابهم لمليارات السوباط وزى ما كلنا عارفين هذه الأيام الظروف صعبة ، و(الكاش يقلل النقاش)، لكن وقعا في شر أعمالهما بعد دخول القنصل حازم على الخط.
]عشان نكون واضحين قروش السوباط خلعت رمضان وود الرشيد لأنو سوداكال كان قنعان منهما، وقال لهما عندو سقف محدد للتمديد، لكن بعد أن دخل حازم الحوبة في التفاوض خلاهم يغيروا رائهما بالتوقيع للمريخ وزي ما عارفين رمضان والرشيد قلبهما مع المريخ وعيونهم في جيب الهلال.
]الحياة فرص وجاءتهما على طبق من ذهب لكن (دقسو) بعد أن جنحا إلى المزايدة والإبتزاز لأنو ما معقول لاعب زى ود الرشيد يطالب بمبلغ (33) مليار عشان يفسخ عقده مع الهلال و رمضان خلاص كمل ، أما ود الرشيد ليس أفضل من الشباب (الزينو) كشف المريخ النهارده.
]أصوات عاقلة طالبت السوباط بالإنسحاب من الصفقة وقالوا ليهو الجماعة ديل ما ناس كورة وعرف الهلال ذاتو لايؤمن بطريقة الهبمتة البعملوا فيها ناس رمضان عجب وودالرشيد ولو لبسا شعارنا ما حايكون عندهما تقدير من جماهير الهلال وغير كدى الحكاية دي بتدخلنا في مشاكل كتيرة في المستقبل مع أولادنا لأنو أنت ياسوباط ذاتو حدك قريب وتتخارج.
]كردنة جمعته جلسة بالسوباط في مكتب الأخير بالعمارات ودار حوار حول هذه الأزمة وزى ما عارفين كردنة زول معلم وبحسبه صاح فقال للسوباط ياااخ انت بالغت عديل لانو الجماعة ديل ما بستاهلوا (العوة ) ده لأنو بكري المدينة بجلالة قدره لما بقى يزايد قلت ليهو داك المريخ أمش وقشة ما تعترليك.
]السوباط شغال بسياسة (لو ثلاثة قالو ليك رأسك ماف أهبشو) لأنو شاور ناس كتار وقالوا ليهو أقنع منهم وخليهم يمشوا المريخ بس يدونا قروشنا كاش وتاني ما بتندم لأنو رمضان عجب أيام المدرب الفرنسى غارزيتو كان بلعبو طرف يمين وودالرشيد كورتو ما بتساوي التكتح مع أبوعاقلة وهو أصلو بلف ويدور ويفكها باص غلط ويلعب شهر وشهر ما تشفو فسيبك منهم.
]المريخ سيد الرأى والفهم شغال مع الجماعة ديل بسياسة النفس الطويل وبعاين من بعيد وزي ما قال الحبيب سلك (33) مليار بتبقى ثلاثة وماله ما كعبة ويمكن نغير رأينا ذاتو وما دايرين نمدد لرمضان وودالرشيد ويمكن ما ننتظر ناس شداد يعملو لينا غداء عمل سفري من أمواج والله الحكاية أتغيرت يا الحبيب أبوبكر الماحي.
]عشان نكون واضحين رمضان سقط في نظر جماهير المريخ لأن طريقتو دي أصلاً ما بتشبه لاعب وضع في زنده شارة الكابتنية .. يارمضان ياخوي خليتنا نقول ياحليل البشير أقصد فيصل العجب لما كان برفض إغراءات الهلال وبجيبوها ليهو بالشوال.
] أما ودالرشيد مطالب بإعتذار للناديين ولازم ويرجع القروش وعشان مستقبلو ما يضيع يمكن أن ويوقع لي أي نادي بالممتاز قبل الفاس ما تقع في الرأس لأنو والله شداد ده لو قبل عليك تاني بشارع العرضة مابتتوصف.
]تعرض الحبيب فاضلابي سخرية لاذعة من بعض وصيفاب مواقع التواصل الإجتماعى بعد ذكره في حوار تلفزيوني عبارة (هو مالو ) ويقصد أخطبوط الهلال السوباط ( وهييي ده مااالا ) تمرق حلوة حلاة من (أميرة القونات) عاشة الجبلية لأنو بالجد الزول ده مالو .. والله .. ياأخوانا وروهو عشان يكون واعي بالحاصل ….(هوى هو مالو)..

اضغط هنا للانضمام لمجموعات الانتباهة على تطبيق واتساب
زر الذهاب إلى الأعلى