بابكر سلك يكتب: من صرع من يا ريس

] طالما نمشي جميعاً على الشارع العام
] قام الجنيه غار وهو ذاتو عام
] الفي البر عوام
] والجنيه ابن الوز قد يكون عوام
] وعوام جداً كمان
] وقد يتحالي ليهو العوم ويبقى بطل سباحة اولمبي
] يدهش العالم ببراعته في العوم والسباحة
] وممكن جنيهنا بعد فكوهو عام
] يتفنن في العوم كمان
] مرة يعوم فراشة ومرة يعوم ككو
] جنيهنا ايامو الكان في البر
] كان بحب الجلبقة
] امال حايعمل شنو وهو في نص الوحل والطين
] جنيه متطين وغاطس في الترعة
] وعوم البحر ما زي عوم الحوض ما زي عوم الترعة ما زي عوم الكنار ولا زي عوم ابوعشرين
] نتمنى التوفيق لجنيهنا في منافسات السباحة الدولية بعد فكوهو عام
] لكن تعودنا ان لا نثق في واجهاتنا الاقتصادية وقدرتها على التخطيط السليم والخروج بالمواطن من قعر الفقر والحاجة الى سطح الحد الادنى من العيش الكريم
] وآخر المحاولات الفاشلة
] كان تحدي اللجنة الاقتصادية على لسان رئيسها
] الدولار ده يا رمانا يا رميناهو
] وكلنا حول الحلبة شاهدنا ما حدث
] وبرغم كل ما حدس
] نتوقع جولة اخيرة نصرع فيها الدولار بالقاضية
] لكن نسأل
] حتى هذه اللحظة
] من صرع من يا لجنتنا الاقتصادية المتحدية
] المهم
] اليوم لنا لقاء
] الهدف من لقاء اليوم تلاتة نقاط
] واحد صفر اربعة صفر اتنين واحد
] المهم التلاتة نقاط تجي
] لا اعذار اطلاقاً .. نلقط نقاطنا
] بعدين نشوف باقي مشاكلنا
] نقاط الارض زي العرض
] والبفرط في ارضو عادي بفرط في عرضو لا سمح الله
] كنا دايرنها بجمهور
] عشان الشفوت من المدرجات بعرفو يجيبو تلاتة نقاطهم كيف
] لكن الكورونا الله لا بارك فيها
] عملت على قطع صلة الرحم بين الجمهور والمدرجات
] ايها الناس
] اتفقت الجماهير على صناديق الاقتراع
] وتأسس اتفاقها على نظام ٢٠١٩
] وهو نفس النظام الذي نكره نفس الناس الاعترفوا بيهو اسي
] وقتها كانت الفرصة متاحة
] نقبل باجازة النظام وبعدها انتخابات المجلس الجديد
] اضعناها ] تتذكروا الكورة الضاعت من سعيد السعودي اللعبها ساكواها؟؟؟
] الفرصة ديك تاني بتجي؟؟؟
] اها دي زي اضاعت فرصة اجازة نظام ٢٠١٩
] ونقعد نتغالط
] ناس يقولوا سعيد ضيعها
] وناس يقولوا الحضري السبب
] لو ما استهتر في الكورة البدقدق قدامو ديك
] كان اتأهلنا ويظل الخلاف
] وتظل الحقيقة واااحدة
] الفرصة ضاعت
] مع فائق احترامي للبطل سعيد السعودي
] ففترة ذلك البطل كانت فترة للتضحيات والذود عن الشعار برجولة
] ايها الناس
] الجنيه نازل يعوم قال
] يا غرق يا جيت حازما
] ايها الناس
] ان تنصروا الله ينصركم
] اها
] نجي لي شمارات والي الخرتوم
] كان شفت يا والينا
] عوموهوا لينا
] وبقينا نغني يا والينا
] عدي بينا وعدي بينا يا مراكبي
] عدي بينااااااا
] عدي بينا يا ريس
سلك كهربا
ننساك كيف والكلب قال ما قالوا ليكم سنعبر… اصبروا شوية …. سنعبر
والى لقاء
سلك

اضغط هنا للانضمام لمجموعات الانتباهة على تطبيق واتساب
زر الذهاب إلى الأعلى