الله يلطــــــف بالمـــريخ من أهــل المريـــخ

في السلك

> أي زول بحن لمسقط رأسه ويرتبط به.
> حتى المثل بقول ليك فلان ده تقول دافنين صرتو هنا.
> وهو كناية عن ارتباطه الوثيق بالمكان.
> حتى كان بعد عنو.
> بمشي ويجيهو راجع.
> قدر الله ان يكون مسقط صلعتي دي شارع العرضة بالمياه الاقليمية لدولة المريخ الفتية.
> فنعم الله علي كثيرة واجلها ان يكون مسقط رأسي بجمهورية المريخ.
> لذا كان الارتباط مكاناً ووجداناً.
> تعلمنا المشي في حيشان المريخ.
> وتعلمنا الكلام من مجتمع المريخ.
> حبينا وتاتينا في ارض البطولات ارض المريخ الطاهرة.
> لذا ما حكوا لينا.
> عشنا وشفنا.
> وتعايشنا.
> شفنا المجالس ومعارضيها.
> رأينا وسمعنا كلام الاداري للاداري.
> حديث اللاعب للاعب.
> وحكاوي الجمهور لبعضه.
> عشان كده ما بورونا ولا بقولوا لينا.
> شفنا كيف تمارس المجالس العملية الادارية.
> وكيف تلتزم المعارضة بدعم الكيان.
> اذكر مرة ناس ود الياس كانوا مجلس.
> وغيرهم معارضة.
> جميعهم يأتي للنادي يومياً.
> ويجلسون في حلقتين متجاورتين.
> ديل مجلس وديل معارضة.
> الوكت داك كورتنا ضد الهلال قربت.
> ود الياس من محلو قال.
> يا ناس المعارضة كورة الهلال قربت.
> نحنا ميزانيتنا ضعيفة.
> حانقوم كمجلس بتوفير المعسكر.
> وانتو عليكم الاعاشة.
> لم يتردد اهل المعارضة في قبول التكليف.
> لأنهم يعارضون مجلساً لا كياناً.
> ولا يقبلون بخسارة الكيان حتى وهم على كفة المعارضة.
> والتزموا بالاعاشة.
> والتزم المجلس بتوفير المعسكر.
> وانتصر المريخ على الهلال.
> وشلنا الدوري.
> وعاد المجلس مجلساً.
> والمعارضة معارضة.
> لذا ولذلك ولكل ذلك.
> استغرب واستعجب من اشكال الحرب الاستراتيجية التي يشنها بعضنا على مجالس الادارات تحت غطاء المعارضة.
> ولا يهمه لو قضت تلك الحرب على المريخ نفسه.
> فهو بما انه يعارض المجلس.
> يجب الا يتقدم الكيان في عهد المجلس الذي يعارضه.
> هذا الشكل من المعارضة قبيح.
> وتلك الوجوه التي تنتهجه لا تشبه المريخ اطلاقاً.
> وزاوية النظر لو ما غيرتها في البلي بخرتوك.
> في جوز يخسر.
> وفي لين.
> وفي جكو.
> وفي طيش لين ترس.
> مداخل الخرخرة كتيره.
> حقو نغير زاوية النظر.
> عشان على الاقل نطلع بي بليتنا.
> ايها الناس.
> خبر لافي مفاده ان اعضاء مجلسنا بالامارات شالوا نثرياتهم من حق المريخ بواقع خمسمية دولار للعضو العامل ومثلها للعضو العاطل.
> الاخ علي اسد نفى ان يكون اعضاء المجلس قد عملوا كده.
> وقال في ما معناه انهم ما بلتفتوا لشائعات زي دي.
> هذا النفي وعدم الالتفات يعني لينا معنى واحداً بس.
> انو الخبر حقيقي.
> خلاف ذلك نطالبكم باتخاذ كافة الاجراءات التي تثبت براءتكم من الجرم المنسوب لكم في ذلك الخبر.
> غير كده ما تلوموا جماهير المريخ لو صدقت واتعاملت معكم علي هذا الاساس.
> وخبر تاني غريب جداً.
> يقال ان هناك اعتداءً على قريش في مناسبة.
> هذا الخبر اعاد لي خبر الاعتداء على مدرب المريخ بالاستاد قبل كده ايام ونسي يخيل لي.
> ان صح الخبر.
> لماذا تحدث تلك التصرفات الرعناء؟
> وليه بتحصل في عهود بعينها؟
> لو قلت لي ان تلك الاحداث ترتبط بنتائج.
> حا اقول ليك في نتائج اسوأ من كده بكتير وما حصل عليها ردة فعل زي دي.
> اين سقطت رؤوسكم يا هؤلاء؟
> ايها الناس.
> ان تنصروا الله ينصركم.
> اها.
> نجي لي شمارات والي الخرتوم.
> كان شفت يا والينا.
> في ناس لما تجي تشكر بتقول الحكومة يا والينا.
> ولما تجي تنتقد بتقول الدولة يا والينا.
> دحين قصور الدولة فينا.
> خلانا وجبات للباعوض يا والينا.
> الباعوض المربياهو الدولة لينا.
> عشان كده نناشد الحكومة الرشيدة.
> تداوس لينا الدولة المطرطشة دي وتقرض باعوضها المربياهو فينا.
سلك كهربا
ننساك كيف والكلب قال الحكومة لو ختت بالها من الدولة… الدولة ما بتغلط فينا ولا بنكتفي بالسخينة.
والى لقاء.
سلك

اضغط هنا للانضمام لمجموعات الانتباهة على تطبيق واتساب
زر الذهاب إلى الأعلى